ଲମତାପୁଟ, ୨୭/୦୫ : ଥାନା ପରିସରରେ କନେଷ୍ଟବଳଙ୍କୁ ମରଣାନ୍ତକ ଆକ୍ରମଣ କରି ଫେରାର ହୋଇଥିବା ଅଭିଯୁକ୍ତ ସାହିନ ଖାନକୁ ଗିରଫ କଲା ନନ୍ଦପୁର ପୋଲିସ। ହିକିମପୁଟ ଗ୍ରାମରେ ଶ୍ଵଶୁର ଘରେ ଲୁଚି ରହିଥିଲା ଅଭିଯୁକ୍ତ। ନନ୍ଦପୁର SDPO ସମ୍ବିତ ମାଝୀ ଏକ ସ୍ୱତନ୍ତ୍ର ଟିମ୍ ଗଠନ କରି ସାହିନକୁ ଗିରଫ କରିବାରେ ସଫଳ ହୋଇଛନ୍ତି।

ସୂଚନାନୁଯାୟୀ, କିଛିଦିନ ପୂର୍ବେ ଜଣେ ନାବାଳିକାଙ୍କୁ ଅପହରଣ କରାଯାଇଥିବା ନେଇ ନନ୍ଦପୁର ଥାନାରେ ଅଭିଯୋଗ ହୋଇଥିଲା । ମାମଲାର ତଦନ୍ତ କରି ଗତ ୨୨ ତାରିଖରେ ପୁଲିସ ପାତ୍ରପଣ୍ଡି ଗାଁର ଉମେଶ ଗୁଣ୍ଠାକୁ ଧରିଥିଲା । ଥାନାରେ ଅଟକ ରଖି ପଚରାଉଚରା କରୁଥିଲା । ୨୩ ତାରିଖ ଦିନ କୌଶଳକ୍ରମେ ଉମେଶ ଥାନାରୁ ଖସି ପଳାଇଥିଲା । ତାକୁ ଧରିବାକୁ ପୁଲିସ ବିଭିନ୍ନ ସ୍ଥାନରେ ଚଢ଼ଉ କରିଥିଲା । ଉମେଶର ଘନିଷ୍ଠ ବନ୍ଧୁ ସାହିନ୍‌ ଖାଁକୁ ତାର ଶ୍ୱଶୁର ଘର ବିଲାପୁଟରୁ ପୁଲିସ ଉଠାଇ ଆଣିଥିଲା । ତାକୁ ପଚରାଉଚରା କରୁଥିଲା । ଗତକାଲି ସ୍ଥାନୀୟ ବଜାରରେ ଉମେଶ ବୁଲୁଥିବା ନେଇ ପୁଲିସ ଖବର ପାଇଥିଲା । ତାକୁ ଧରିବାକୁ ଥାନାଧିକାରୀ ମମତା ପଣ୍ଡା, ଏସ୍‌ଆଇ ବେଦବର ସାହୁ, ଦୀପ୍ତିମୟୀ ଧାରୁଆ ଟିମ୍‌ ସହ ଯାଇଥିଲେ । ଥାନାକୁ କେବଳ ଜଣେ କନେଷ୍ଟବଳ ଜଗିଥିଲେ । ଏହାର ସୁଯୋଗ ନେଇ ଅପରାହ୍ଣ ପ୍ରାୟ ସାଢ଼େ ୩ଟା ବେଳେ ସାହିନ୍‌ ସେଣ୍ଟ୍ରି ଦାୟିତ୍ୱରେ ଥିବା କନେଷ୍ଟବଳଙ୍କୁ ଆକ୍ରମଣ କରିଥିଲା । ପରେ ଥାନା ପାଚେରି ଡେଇଁ ଫେରାର୍‌ ହୋଇଯାଇଥିଲା । ଖବରପାଇ ଏସ୍‌ଡିପିଓ ସମ୍ବିତ କୁମାର ମାଝୀ ଥାନାରେ ପହଞ୍ଚି ରକ୍ତାକ୍ତ ଅବସ୍ଥାରେ କନେଷ୍ଟବଳଙ୍କୁ ଉଦ୍ଧାର କରି ଡାକ୍ତରଖାନା ନେଇଥିଲେ ।