ନୂଆଦିଲ୍ଲୀ ୦୪/୦୯: ଭାରତର ଅନ୍ୟତମ ସବୁଠୁ ପ୍ରେରଣାପ୍ରଦ କ୍ରୀଡ଼ାବିତ୍ ଶୀତଲ ଦେବୀ । ୧୭ ବର୍ଷୀୟା ଏହି ତୀରନ୍ଦାଜ୍ ପ୍ୟାରିସ୍ ପାରାଲିମ୍ପିକ୍ସ-୨୦୨୪ରେ ଚମତ୍କାର ପ୍ରଦର୍ଶନ ଜରିଆରେ ଖବରର ଶିରୋନାମା ହୋଇଛନ୍ତି । ବ୍ୟକ୍ତିଗତ ପ୍ରତିଯୋଗିତାରେ ଯଦିଓ ସେ ପଦକ ହାସଲ କରିପାରି ନାହାନ୍ତି, ମିକ୍ସଡ୍ ଟିମ୍ କମ୍ପାଉଣ୍ଡ ଇଭେଣ୍ଟ୍ରେ ରାକେଶ କୁମାର ଓ ଶୀତଲଙ୍କ ଯୋଡ଼ି କାଂସ୍ୟ ପଦକ ଜିତିଛି । ଚଳିତ ପାରାଲିମ୍ପିକ୍ସରେ ପ୍ରଥମ ପଦାର୍ପଣ କରିଥିବା ଶୀତଲଙ୍କ ଆହ୍ୱାନଭରା ଓ ସଂଘର୍ଷପୂର୍ଣ୍ଣ ଯାତ୍ରା ଅଗଣିତଙ୍କୁ ପ୍ରେରିତ କରିଛି । ସେମାନଙ୍କ ମଧ୍ୟରେ ଭାରତର ଜଣାଶୁଣା ଉଦ୍ୟୋଗୀ ଆନନ୍ଦ ମହିନ୍ଦ୍ରା ବି ସାମିଲ । ପ୍ୟାରିସ୍ ଗେମ୍ସରେ ଶୀତଲଙ୍କ ପ୍ରେରଣାଦାୟକ ପ୍ରଦର୍ଶନ ବିଷୟରେ ଜାଣିବା ପରେ ତାଙ୍କୁ ଦେଇଥିବା ପ୍ରତିଶ୍ରୁତିକୁ ଆନନ୍ଦ ପୁଣି ଥରେ ଦୋହରାଇଛନ୍ତି ।
ଗତ ବର୍ଷ ଶୀତଲଙ୍କ କ୍ରୀଡ଼ା ପ୍ରଦର୍ଶନରେ ପ୍ରେରିତ ହୋଇ ଆନନ୍ଦ ତାଙ୍କୁ ସମସ୍ତଙ୍କ ଗୁରୁ ବୋଲି ସମ୍ବୋଧନ କରିଥିଲେ । ସେତିକି ନୁହେଁ, ନିଜ ବ୍ରାଣ୍ଡ୍ର ଯେକୌଣସି ଏକ କାର୍ ଚୟନ କରିବାକୁ ଶୀତଲଙ୍କୁ ଅଫର୍ ବି ଦେଇଥିଲେ । ଶୀତଲଙ୍କ ବ୍ୟବହାର ଲାଗି କମ୍ପାନି କାର୍କୁ ସେହିଭଳି ଭାବେ ଡିଜାଇନ୍ କରିବ ବୋଲି ଆନନ୍ଦ ସୋସିଆଲ ମିଡିଆ ପ୍ଲାଟ୍ଫର୍ମ ଏକ୍ସରେ ସ୍ପଷ୍ଟ କରିଥିଲେ । ତେବେ, ସେତେବେଳେ କାର୍ ଚଳାଇବା ପାଇଁ ଶୀତଲଙ୍କ ବୟସ ହୋଇନଥିଲା । ତେଣୁ ୧୮ ବର୍ଷ ବୟସ ହେବା ପରେ କାର୍ ନେବେ ବୋଲି ଶୀତଲ କହିଥିଲେ । ଚଳିତ ପ୍ୟାରିସ୍ ପାରାଲିମ୍ପିକ୍ସରେ ଶୀତଲଙ୍କ ଦମ୍ଦାର ପ୍ରଦର୍ଶନ ପରେ ଆନନ୍ଦ ତାଙ୍କୁ ନିଜର ପ୍ରତିଶ୍ରୁତି ମନେପକାଇ ଦେଇଛନ୍ତି ।
Extraordinary courage, commitment & a never-give-up spirit are not linked to medals…#SheetalDevi, you are a beacon of inspiration for the country—and the entire world.
— anand mahindra (@anandmahindra) September 2, 2024
Almost a year ago, as a salute to your indomitable spirit, I had requested you to accept any car from our… pic.twitter.com/LDpaEOolxA
ସେ ନିଜ ଏକ୍ସ ହ୍ୟାଣ୍ଡେଲ୍ରେ ଲେଖିଛନ୍ତି ‘ଅଦ୍ୱିତୀୟ ସାହସ, ସଂକଳ୍ପ ଓ କଦାପି ନ ହାରିବାର ଜିଦ୍ କେବଳ ପଦକ ସହ ସଂଶ୍ଳିଷ୍ଟ ନୁହେଁ । ତୁମେ ଦେଶ ଓ ସମଗ୍ର ବିଶ୍ୱ ପାଇଁ ପ୍ରେରଣାର ସ୍ରୋତ । ତୁମ ଅଦମ୍ୟ ସାହସକୁ ସାଲ୍ୟୁଟ୍ । ଗତ ବର୍ଷ ତୁମେ ପ୍ରତିଶ୍ରୁତି ଦେଇଥିଲ, ୧୮ ବର୍ଷ ବୟସ ହେବା ପରେ ଆମ କମ୍ପାନିର ଯେକୌଣସି କାର୍ ଗ୍ରହଣ କରିବ । ଆସନ୍ତା ବର୍ଷକୁ ତୁମେ ୧୮ ବର୍ଷ ବୟସରେ ପାଦ ଦେବ । ତୁମକୁ ଦେଇଥିବା ସେଇ ପ୍ରତିଶ୍ରୁତିକୁ ପୂରଣ କରିବାକୁ ମୁଁ ଅପେକ୍ଷା କରିଛି । ତୁମ ବ୍ୟତୀତ ଆଉ କେହି ବି ଆଜି ପାଇଁ ମୋର ପ୍ରେରଣା ହୋଇ ପାରିନଥାନ୍ତେ ।’ ୨୦୦୭ ମସିହାରେ ଜନ୍ମିତ ଶୀତଲ ଫୋକୋମେଲିଆରେ ପୀଡ଼ିତ । ଏହା ଏକ ବିରଳ ଜନ୍ମଜାତ ରୋଗ । ଏଥିଯୋଗୁ ତାଙ୍କ ବାହୁ ସମ୍ପୂର୍ଣ୍ଣ ବିକଶିତ ହୋଇନଥିଲା । ଗତ ବର୍ଷ ହାଙ୍ଗଝୋଉରେ ଅନୁଷ୍ଠିତ ଏସିଆନ୍ ପାରା ଗେମ୍ସରେ ବ୍ୟକ୍ତିଗତ ଓ ମିକ୍ସଡ୍ ଇଭେଣ୍ଟ୍ରେ ଦୁଇଟି ସ୍ୱର୍ଣ୍ଣ ଏବଂ ଡବଲ୍ସ କମ୍ପାଉଣ୍ଡ୍ରେ ଗୋଟିଏ ରୌପ୍ୟ ପଦକ ହାସଲ କରିଥିଲେ ।
