ଲଣ୍ଡନ, ୧୪/୦୮ : ଇଂଲଣ୍ଡର ମହାନ ପେସ୍‌ ବୋଲର ଜେମ୍ସ ଆଣ୍ଡରସନ ଫ୍ରାଞ୍ଚାଇଜ କ୍ରିକେଟ୍‌ ଖେଳିବାକୁ ମନ ବଳାଇଛନ୍ତି । ଗତ ମାସ ଲର୍ଡ୍ସରେ ସେ ୱେଷ୍ଟଇଣ୍ଡିଜ୍‌ ବିପକ୍ଷରେ ବିଦାୟୀ ଟେଷ୍ଟ ଖେଳିଥିଲେ । ଏବେ ତାଙ୍କୁ ୪୧ ପୁରି ୪୨ ବର୍ଷ ବୟସ ଚାଲିଛି । ତଥାପି ସେ ଥକି ନାହାନ୍ତି । ବିଶ୍ୱରେ ବିଭିନ୍ନ ଟି-ଟ୍ୱେଣ୍ଟି ଫ୍ରାଞ୍ଚାଇଜ କ୍ରିକେଟ୍‌ ଏବଂ କାଉଣ୍ଟି ଖେଳିବା ପାଇଁ ଯୋଜନା ରଖିଥିବା ନିଜେ ଆଣ୍ଡରସନ୍‌ ସୂଚନା ଦେଇଛନ୍ତି । 

ଫାଇନାଲ୍‌ ୱାର୍ଡ ପଡକାଷ୍ଟକୁ ସାକ୍ଷାତାକାର ଦେଇ ଆଣ୍ଡରସନ୍‌ କହିଛନ୍ତି, ମୋ ନିକଟରେ ଏବେବି କ୍ରିକେଟ୍‌ ବାକି ଥିବା ଅନୁଭବ କରୁଛି । ଆଉ କିଛି ଦିନ ଖେଳିବା ପାଇଁ ଚାହୁଁଛି । ଯଦି ଟି-ଟ୍ୱେଣ୍ଟି ଫ୍ରାଞ୍ଚାଇଜ କ୍ରିକେଟ୍‌ ଖେଳିବା ପାଇଁ ପ୍ରସ୍ତାବ ମିଳେ ନିଶ୍ଚିତ ଭାବେ ଖେଳିବାକୁ ଚାହିଁବି । ଦ ହଣ୍ଡ୍ରେଡ୍‌ ଟୁର୍ଣ୍ଣାମେଣ୍ଟର କିଛି ମ୍ୟାଚ୍‌ ଦେଖିଥିଲି । ପ୍ରାରମ୍ଭିକ ୨୦ଟି ବଲ୍‌ ସୁଇଂ ହେଉଥିବା ଦେଖିଥିଲି । ମୁଁ ଏବେବି ବଲ୍‌ ସୁଇଂ କରାଇପାରିବି । କେବେ ଫ୍ରାଞ୍ଚାଇଜ କ୍ରିକେଟ୍‌ ଖେଳିନାହିଁ । ୪୨ବର୍ଷ ବୟସରେ ମୋତେ କୌଣସି ଦଳ ସୁଯୋଗ ଦେବ କି ନାହିଁ ଜାଣିନି । ସେହିପରି ଲଙ୍କାସାୟର ପକ୍ଷରୁ କାଉଣ୍ଟି ଖେଳିବା ନେଇ ଚିନ୍ତା କରୁଛି ।’ ଆଣ୍ଡରସନ୍‌ ୨୦୧୯ରେ ଶେଷ ଥର ଅନ୍ତର୍ଜାତୀୟ ଟି-ଟ୍ୱେଣ୍ଟି ଖେଳିଥିଲେ । ଏହାପରଠୁ ସେ ସୀମିତ ଓଭର ଫର୍ମାଟ କ୍ରିକେଟ୍‌ ଖେଳିନାହାନ୍ତି । ସେ ୧୮୮ଟି ଟେଷ୍ଟ ଖେଳି ମୋଟ ୭୦୪ଟି ୱିକେଟ୍‌ ଅକ୍ତିଆର କରିଥିଲେ ।