ପୁରୀ,୦୪/୦୨: ଆଜିଠୁ ପ୍ରତିଦିନ ଅର୍ପଣ ରଥକୁ ମିଳିଥିବା ଦାନ ଚାଉଳରେ ମହାପ୍ରଭୁଙ୍କ ନିମନ୍ତେ ଖେଚୁଡ଼ି ଓ କାନିକା ରନ୍ଧା ଯିବ । ପ୍ରତିଦିନ ପ୍ରାୟ ୧୦୦ ଦାସିଆ କୁଡ଼ୁଆରେ ଖେଚୁଡ଼ି ଓ କାନିକା ରନ୍ଧା ଯିବା ପରେ ଶ୍ରୀମନ୍ଦିର ୩ ଦ୍ୱାରରେ ବଣ୍ଟାଯିବ । ପ୍ରଥମ ସକାଳ ଧୂପ ପରେ ଏହି ଭୋଗ ହେବ ଓ ଦିନ ପ୍ରାୟ ୧୦ଟା ପରଠାରୁ ରାତି ପର୍ଯ୍ୟନ୍ତ ଭୋଟ ସରିବା ପର୍ଯ୍ୟନ୍ତ ଶ୍ରଦ୍ଧାଳୁଙ୍କୁ ବଣ୍ଟାଯିବ । ଏନେଇ ସୁଆରମହାସୁଆର ନିଯୋଗ ସମ୍ପାଦକ ନାରାୟଣ ମହାସୁଆର ସୂଚନା ଦେଇଛନ୍ତି । ଅର୍ପଣ ରଥକୁ ମିଳିଥିବା ଚାଉଳ ଯାଞ୍ଚ ଓ ମହାପ୍ରସାଦ ରାନ୍ଧିବାକୁ ଗଠିତ ସ୍ୱତନ୍ତ୍ର କମିଟିର ବୈଠକ ପରେ ଏହି ନିଷ୍ପତ୍ତି ହୋଇଛି । ଅର୍ପଣ ଚାଉଳ ସରିବା ପର୍ଯ୍ୟନ୍ତ ପ୍ରତିଦିନ ଏଭଳି ମହାପ୍ରସାଦ ରନ୍ଧା ଯାଇ ବଣ୍ଟା ଯିବ ।
ଶ୍ରୀ ମହାସୁଆର କହିଛନ୍ତି, ପ୍ରତ୍ୟେକ ଦ୍ୱାର ନିକଟରେ ଶ୍ରଦ୍ଧାଳୁଙ୍କୁ ଖଲି ଦନାରେ ଏହି ମହାପ୍ରସାଦ ମାଗଣାରେ ସେବନ ନିମନ୍ତେ ଦିଆଯିବ । ଶ୍ରଦ୍ଧାଳୁମାନେ ସୁଦ୍ଧପୁତ ଭାବେ ଚପଲ ଖୋଲି ଏହାକୁ ସେବନ କରିପାରିବେ ।
ସେପଟେ ଅର୍ପଣ ରଥକୁ ଶ୍ରଦ୍ଧାଳୁମାନେ ଦେଇଥିବା ଦାନ ଟଙ୍କା ପରିମାଣ ଗଣତି ଶେଷ ହୋଇନି । ଶ୍ରୀମନ୍ଦିର କାର୍ଯ୍ୟାଳୟରେ ଏବେବି ବିଭିନ୍ନ ଜିଲ୍ଲାରୁ ଦାନ ଟଙ୍କା ପହଞ୍ଚୁଛି । ଏହି ଦାନ ପରିମାଣ ୩ କୋଟି ଡେଇଁଥିବା ପ୍ରଶାସନିକ ଜଣେ ଅଧିକାରୀ କହିଛନ୍ତି । ଟଙ୍କା ଗଣତି ପରେ ବ୍ୟାଙ୍କରେ ଜମା କରାଯାଉଛି । ଦାନ ଅର୍ଥ ଆସିବା ଶେଷ ହେବା ପର୍ଯ୍ୟନ୍ତ ଏହି ଗଣତି ଚାଲୁ ରହିବ ବୋଲି ଜଣାପଡ଼ିଛି ।
ସେପଟେ ବିପୁଳ ପରିମାଣର ଦାନ ଚାଉଳ ପହଞ୍ଚୁଥିବାରୁ ପ୍ରଶାସନ ପକ୍ଷରୁ ଶ୍ରୀଗୁଣ୍ଡିଚା ମନ୍ଦିର ବାଦ୍ ଅନ୍ୟ ସ୍ଥାନରେ ଏହାକୁ ସୁରକ୍ଷିତ ଭାବେ ରଖିବା ନିମନ୍ତେ ପଦକ୍ଷେପ ନିଆଯାଉଥିବା ମଧ୍ୟ ଜଣାପଡ଼ିଛି । ତେବେ ପ୍ରଶାସନ ପକ୍ଷରୁ କେଉଁ ଜିଲ୍ଲାରୁ କେତେ ଅର୍ଥ ଆସିଛି ଓ କେତେ ଚାଉଳ ଆସିଛି ତାହାର ହିସାବ ଦିଆଯାଉନି । ଯାହାକୁ ନେଇ ଭିନ୍ନ ଚର୍ଚ୍ଚା ହେଉଛି । ଦାନ ଚାଉଳ ଓ ଟଙ୍କା ଶ୍ରୀମନ୍ଦିର ପ୍ରଶାସନ ଗ୍ରହଣ କରୁଥିଲେ ହେଁ ଏହାର ସୂଚନା ସାଧାରଣରେ ପ୍ରକାଶ କରାଯାଉନାହିଁ । ପ୍ରଶାସନ କାହିଁକି ସ୍ପଷ୍ଟ ସୂଚନା ଦେବାକୁ କୁନ୍ଥୁକୁନ୍ଥୁ୍ଥ ହେଉଛି ତାହା ସଭିଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି ।
ସୂଚନା ମୁତାବକ, ରାଜ୍ୟର ୩୦ଟି ଜିଲ୍ଲାରୁ ପ୍ରାୟ ୧୨ ହଜାର କ୍ୱିଣ୍ଟାଲ ଚାଉଳ ଶ୍ରୀମନ୍ଦିର କାର୍ଯ୍ୟାଳୟକୁ ହସ୍ତାନ୍ତର ହେବ ବୋଲି ପ୍ରାଥମିକ ସୂଚନା ମିଳିଥିଲା । ଯେତେବେଳେ କି ୨ କୋଟି ଟଙ୍କା ଅର୍ପଣ ରଥରୁ ମିଳିବା ପରେ ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର ହେଉଥିବା ମଧ୍ୟ ପ୍ରାଥମିକ ଭାବେ ଜଣାପଡିଥିଲା । ହେଲେ ଏବେ ଏହା ୩ କୋଟି ଟପିଛି ।