ନୂଆଦିଲ୍ଲୀ, ୧୨/୦୯: ଚୀନର ହୁଲନବୁଇର ଠାରେ ଚାଲିଥିବା ପୁରୁଷ ହକି ଚାମ୍ପିଅନ୍ସ ଟ୍ରଫିରେ ଡିଫେଣ୍ଡିଂ ଚାମ୍ପିଅନ୍ ଭାରତ କ୍ରମାନ୍ୱୟରେ ତୃତୀୟ ବିଜୟ ସହ ସେମି ଫାଇନାଲ୍ରେ ପ୍ରବେଶ କରିଛି । ବୁଧବାର ଅନୁଷ୍ଠିତ ମ୍ୟାଚ୍ରେ ଦଳ ଏକତରଫା ୮-୧ ଗୋଲ୍ରେ ମାଲେସିଆକୁ ପରାସ୍ତ କରିଥିଲା । ରାଜ କୁମାର ପାଲ୍ ହ୍ୟାଟ୍ରିକ୍ (ତୃତୀୟ, ୨୫, ୩୩ମିନିଟ୍) ଗୋଲ୍ କରି ବିଜୟରେ ହିରୋ ସାଜିଥିଲେ । ଗୁରୁବାର ଭାରତ ପରବର୍ତ୍ତୀ ମ୍ୟାଚ୍ରେ ଦକ୍ଷିଣ କୋରିଆକୁ ଭେଟିବ ।
ବୁଧବାର ମୋକି ଟ୍ରେନିଂ ବେସ୍ ଗ୍ରାଉଣ୍ଡ୍ରେ ଭାରତ ଓ ମାଲେସିଆ ସାମ୍ନାସାମ୍ନି ହୋଇଥିଲେ । ପ୍ରଥମ କ୍ୱାର୍ଟର ଆରମ୍ଭରୁ ଭାରତ ଘନଘନ ଆକ୍ରମଣ କରି ତୃତୀୟ ମିନିଟ୍ରେ ଗୋଲ୍ ଖାତା ଖୋଲିଥିଲା । ରାଜକୁମାର ଏହି ଗୋଲ୍ କରିଥିଲେ । ପରବର୍ତ୍ତୀ ୪ମିନିଟ୍ ମଧ୍ୟରେ ଦଳ ଆଉ ୨ଟି ଗୋଲ୍ ଦେଇ ମ୍ୟାଚ୍କୁ ନିଜ ନିୟନ୍ତ୍ରଣକୁ ନେଇଥିଲା । ଷଷ୍ଠ ମିନିଟ୍ରେ ଅରଇଜିତ୍ ସିଂହ ହୁଣ୍ଡାଲ ଓ ସପ୍ତମ ମିନିଟ୍ରେ ଯୁଗରାଜ ସିଂହ ଗୋଲ୍ ସ୍କୋର କରିଥିଲେ । ଏହି ଭାଗ ଖେଳ ଶେଷ ସୁଦ୍ଧା ଭାରତ ୩-୦ରେ ଆଗୁଆ ରହିଥିଲା । ଦ୍ୱିତୀୟ କ୍ୱାର୍ଟରରେ ମାଲେସିଆ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲେ ମଧ୍ୟ ଖାତା ଖୋଲିପାରିନଥିଲା ।
ଅନ୍ୟ ପଟରେ ଭାରତ ଆଉ ୨ଟି ଗୋଲ୍ କରି ୫-୦ରେ ଆଗେଇ ଥିଲା । ୨୨ମିନିଟ୍ରେ ଅଧିନାୟକ ହର୍ମନପ୍ରୀତ ସିଂହ ଏବଂ ୨୫ମିନିଟରେ ରାଜ କୁମାର ଗୋଲ୍ ଦେଇଥିଲେ । ତୃତୀୟ କ୍ୱାର୍ଟରରେ ଭାରତ ଆଧିପତ୍ୟ ବିସ୍ତାର କରି ଖେଳି ଆଉ ୩ଟି ଗୋଲ୍ କରିଥିବାବେଳେ ମାଲେସିଆ ଗୋଟିଏ ଗୋଲ୍ ପରିଶୋଧ କରିଥିଲା । ୩୩ମିନିଟ୍ରେ ରାଜ କୁମାର ନିଜର ହ୍ୟାଟ୍ରିକ୍ ପୂରଣ କରିଥିଲେ । ସେହିପରି ୩୯ ମିନିଟ୍ରେ ଅରଇଜିତ ନିଜର ଦ୍ୱିତୀୟ ଏବଂ ୪୦ମିନିଟ୍ରେ ଉତ୍ତମ ସିଂହ ଗୋଟିଏ ଗୋଲ୍ ଦେଇଥିଲେ । ତୃତୀୟ କ୍ୱାର୍ଟର ଶେଷ ସୁଦ୍ଧା ଭାରତ ୮-୧ରେ ଆଗୁଆ ରହି ବିଜୟ ନିଶ୍ଚିତ କରି ସାରିଥିଲା । ଚତୁର୍ଥ ତଥା ଅନ୍ତିମ କ୍ୱାର୍ଟର କଡ଼ା ସଂଘର୍ଷପୂର୍ଣ୍ଣ ହୋଇଥିଲା। ଏଥିରେ କେହି କାହାରିକୁ ଗୋଲ୍ ଦେଇ ପାରିନଥିଲେ । ଫଳରେ ମାଲେସିଆ ୧-୮ରେ ପରାଜିତ ହୋଇଥିଲା ।
ସୂଚନାଯୋଗ୍ୟ, ଗତ ୨୦୨୩ ଏସିଆନ୍ ଚାମ୍ପିଅନ୍ସ ଟ୍ରଫି ଫାଇନାଲ୍ରେ ଭାରତ ୪-୩ ଗୋଲ୍ରେ ମାଲେସିଆକୁ ହରାଇ ଚାମ୍ପିଅନ୍ ହୋଇଥିଲା । ଚଳିତ ଟୁର୍ଣ୍ଣାମେଣ୍ଟରେ ଭାରତ ମୋଟ ୯ପଏଣ୍ଟ ସହ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । କୋରିଆ ଓ ପାକିସ୍ତାନ ସମାନ ୫ପଏଣ୍ଟ ଲେଖାଏଁ ପାଇ ଯଥାକ୍ରମେ ଦ୍ୱିତୀୟ ଓ ତୃତୀୟ ଏବଂ ଚୀନ ୩ପଏଣ୍ଟ ସହ ଚତୁର୍ଥ ସ୍ଥାନରେ ରହଛି।
