ନୂଆଦିଲ୍ଲୀ, ୮/୬ : ଲୋକସଭା ନିର୍ବାଚନ ୨୦୨୪ଶେଷ ହେବା ପରେ ଏବେ ନୂଆ ସରକାର ଗଠନ ହେବାକୁ ଯାଉଛି । ନରେନ୍ଦ୍ର ମୋଦୀ ରବିବାର ପ୍ରଧାନମନ୍ତ୍ରୀ ଭାବେ ଶପଥ ନେବେ । ଏହି ସବୁ ମଧ୍ୟରେ ଉତ୍ତରପ୍ରଦେଶର ନଗୀନା ସିଟ୍ ଜିତି ସାଂସଦ ହୋଇଥିବା ଆଜାଦ ସମାଜ ପାର୍ଟିର ମୁଖ୍ୟ ଚନ୍ଦ୍ର ଶେଖର ଆଜାଦ କହିଛନ୍ତି କି ଯଦି ଏନଡିଏ ତାଙ୍କୁ ପ୍ରଧାନମନ୍ତ୍ରୀ ବି କରିବ ତେବେ ବି ସେ ସେହି ସଂଗଠନରେ ସାମିଲ ହେବେ ନାହିଁ । 

ଏକ ଗଣମାଧ୍ୟମକୁ ସାକ୍ଷାତକାର ଦେବା ସମୟରେ ସେ କହିଛନ୍ତି କି, ‘ନଗୀନାର ଜନତା ମୋତେ ତାଙ୍କ ହିତ ରକ୍ଷା ପାଇଁ  ଭୋଟ୍ ଦେଇଛନ୍ତି । ସମ୍ବିଧାନର ବିରୋଧିଙ୍କୁ ଉଚିତ ଶିକ୍ଷା ଦେବାକୁ ଭୋଟ ଦେଇଛନ୍ତି । ରାଜନୈତିକ ଶକ୍ତି ଜରୁରୀ ଅଟେ ମାତ୍ର ସେଥିଲାଗି ବିଚାରଧାରା ସହ ବୁଝାମଣା ନୁହେଁ ଏବଂ ଏଭଳି ସ୍ଥଳେ ଏନଡିଏରେ ସାମିଲ ହେବାର ପ୍ରଶ୍ନ ଉଠୁ ନାହିଁ । ’ 

ସେହିଭଳି ସେ ବିଜେପି ଉପରେ ଆକ୍ରମଣ କରି କହିଛନ୍ତି କି, ସରକାରୀ ଦଳ ଯଦି ଏତେ ଭଲ ହୋଇଥାନ୍ତା ତ ଏତେ କମ୍ ସିଟ୍ ଆସି ନଥାନ୍ତା । ଏହା ଏକ ପରାଜୟ ଭଳି ଅଟେ । ସରକାରୀ ଦଳ ୪୦୦ର ଦାବି କରିଥିଲା ଏବଂ ଜନତା ତାଙ୍କୁ କେଉଁଠି ନେଇ ପହଞ୍ଚାଇଲେ । ଯଦି ବିଜେପିର ଶୀର୍ଷ ନେତା ଡ୍ୟାମେଜ କଣ୍ଟେ୍ରାଲ ନ କରିନଥାନ୍ତେ ତ ତାଙ୍କ ସିଟ୍ ୨୦୦ରୁ ବି କମ୍ ରହିଥାନ୍ତା । ଆଜାଦ ସମାଜ ପାର୍ଟି ନିଜ ହିତ ଲାଗି କାମ କରିବ । ମୁଁ ପଦ ପ୍ରତିଷ୍ଠା ଲାଗି ରାଜନୀତିରେ ଆସି ନାହିଁ ।’

ଏଏସପି ମୁଖ୍ୟ କହିଛନ୍ତି କି, ‘ମୁଁ କେବଳ ଦଳିତଙ୍କ ଭୋଟରେ ନୁହେଁ ବରଂ ପାଳ, ପ୍ରଜାପତି, କଶ୍ୟପ, ସ୍ୟାନୀ ମୋର୍ଯ୍ୟ, ଶାକ୍ୟ ଏବଂ ମୁସଲିମ୍ ସବୁ ଲୋକେ ମୋତେ ଭୋଟ ଦେଇଛନ୍ତି ।’