ନୂଆଦିଲ୍ଲୀ, ୨୮/୯ : ତେଲୁଗୁ ସୁପରଷ୍ଟାର ଜୁନିୟର ଏନଟିଆରଙ୍କ ଫିଲ୍ମ ‘ଦେବରା’ ୨୭ସେପ୍ଟେମ୍ବରରେ ଓ୍ବାଲ୍ଡଓ୍ବାଇଜ ରିଲିଜ ହୋଇଛି । ଏହି ଫିଲ୍ମ ବକ୍ସ ଅଫିସରେ ବମ୍ପର ଓପନିଂ ଦେଇଥିଲା । ପ୍ରଥମ ଦିନ କେତେକ ବ୍ଲକବଷ୍ଟର ଫିଲ୍ମର ରେକର୍ଡ଼ ଭାଙ୍ଗିଥିବା ଦେବରାର ଦ୍ବିତୀୟ ଦିନ ବି ବକ୍ସ ଅଫିସରେ ଧୁମ୍ ମଚାଇଛି ।

ଜୁନିୟର ଏନଟିଆରଙ୍କ ଏହି ଫିଲ୍ମରେ ତାଙ୍କ ସହ ମୁଖ୍ୟ ଭୂମିକାରେ ବଲିଉଡ଼ ଅଭିନେତ୍ରୀ ଜାହ୍ନବୀ କପୁର ଅଛନ୍ତି । ସେହିଭଳି ବଲିଉଡ଼ ଅଭିନେତା ସୈଫ ଅଲୀ ଖାନ ଫିଲ୍ମରେ ଭିଲେନ ଭୂମିକା ନିଭାଉଛନ୍ତି । ପ୍ରକାଶ ଯେ, ସୈଫ ଏବଂ ଜାହ୍ନବୀ ଏହା ମାଧ୍ୟମରେ ନିଜର ସାଉ ଡେବ୍ୟୁ କରିଛନ୍ତି । ୩ ଷ୍ଟାରଙ୍କ ଏହି ଫିଲ୍ମ ପ୍ରଥମ ଦିନ ବହୁତ ଭଲ କଲେକ୍ସନ କରିଥିଲା । ସେହିଭଳି ଦ୍ବିତୀୟ ଦିନ ବି ବକ୍ସ ଅଫିସରେ ଫିଲ୍ମ ବହୁତ ଭଲ କଲେକ୍ସନ କରିଛି । ଆସନ୍ତୁ ଜାଣିବା ଶନିବାର ଦେବରା କେତେ କଲେକ୍ସନ କରିଛି ।

ଜୁନିୟର ଏନଟିଆର ଏବଂ ଜାହ୍ନବୀ କପୁରଙ୍କ ଫିଲ୍ମ ଦେବରାକୁ ଦର୍ଶକଙ୍କ ତରଫରୁ ଜବରଦସ୍ତ ରେସପନ୍ସ ମିଳୁଛି । ଶୁକ୍ରବାର ପରେ ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ଶନିବାର ବି ଜବରଦସ୍ତ ଏକ୍ସାଇଟମେଣ୍ଟ ନଜର ଆସୁଛି । ସ୍ୟାକନିଳ୍କିର ରିପୋର୍ଟ ଅନୁସାରେ ଦେବରା ଶନିବାର ସନ୍ଧ୍ୟା ୬ଟା ୨୦ମିନିଟ ପର୍ଯ୍ୟନ୍ତ ସବୁ ଭାଷାରେ ୨୪.୫କୋଟି ଟଙ୍କାର କଲେକ୍ସନ କରି ନେଇଛି ।

ଫିଲ୍ମ ରିଲିଜର ଦ୍ବିତୀୟ ଦିନ ଭାରତରେ ୧୦୦କୋଟିର କଲେକ୍ସନ ପାର୍ କରି ସାରିଛି । ସ୍ୟାକନିଳ୍କର ରିପୋର୍ଟ ଅନୁସାରେ ୨୭ସେପ୍ଟେମ୍ବରରେ ନିଜର ପ୍ରଥମ ଦିନ ଦେବରା ଘରୋଇ ବକ୍ସ ଅଫିସରେ ମୋଟ ୮୨.୫କୋଟି ଟଙ୍କାର କଲେକ୍ସନ କରିଥିଲା । ସବୁଠାରୁ ଅଧିକ ୭୩.୨୫କୋଟି ଟଙ୍କା ତେଲୁଗୁ ଭର୍ସନରେ କରିଥିଲା । ଏହାପରେ ସବୁଠାରୁ ଅଧିକ କଲେକ୍ସନ ହିନ୍ଦୀ ଭର୍ସନ (୭.୫କୋଟି ଟଙ୍କା)ରେ ହୋଇଛି । ଓପନିଂ ଡେ ରେ ୮୨.୫କୋଟି ଟଙ୍କା ଏବଂ ଦ୍ବିତୀୟ ଦିନ ୨୪.୫କୋଟି ଟଙ୍କାର କଲେକ୍ସନ ପରେ ଦେବାରର ଇଣ୍ଡିଆନ ବକ୍ସ ଅଫିସରେ ମୋଟ କଲେକ୍ସନ ୧୦୭.୦୪କୋଟି ଟଙ୍କା ହୋଇସାରିଛି ।