ନୂଆଦିଲ୍ଲୀ: ବେଆଇନ ଭାବରେ ଭାରତରେ ରହୁଥିବାରୁ ମହାରାଷ୍ଟ୍ରର ପାଲଘର ଜିଲ୍ଲାରୁ ୫ ଜଣ ବାଂଲାଦେଶୀଙ୍କୁ ଗିରଫ କରିଛି ପୋଲିସ । ସୂଚନା ମିଳିବା ପରେ ସେପ୍ଟେମ୍ବର ୨୨ରେ ପୋଲିସର ମାନବ ଚାଲାଣ ନିରୋଧୀ ସେଲ୍ (AHTC) ନାଲା ସୋପାରା ବସ୍ତିରେ ପହଞ୍ଚି ୫ ଜଣ ବାଂଳାଦେଶର ନାଗରିକଙ୍କୁ ଗିରଫ କରିଥିଲା । ଏନେଇ ଇନ୍ସପେକ୍ଟର ସୌରଭୀ ପାଓ୍ବାର କହିଛନ୍ତି ।
ଗିରଫ ଅଭିଯୁକ୍ତମାନେ ହେଉଛନ୍ତି, ଅର୍ଶଦ ରେହମନତୁଲ୍ଲା ଗାଜି (୫୨), ଅଲି ମହମ୍ମଦ ଦିନମହମ୍ମଦ ମଣ୍ଡଳ (୫୬), ମିରାଜ ସାହେବ ମଣ୍ଡଳ (୧୯), ସାଜାଦ କାଦିର ମଣ୍ଡଳ (୪୫) ଏବଂ ସାହେବ ପଞ୍ଚାନନ ସର୍ଦ୍ଦାର (୪୫) । ଭାରତରେ ପ୍ରବେଶ ଲାଗି ସେମାନଙ୍କ ପାଖରେ କୌଣସି ବୈଧ ଦସ୍ତାବିଜ୍ ନାହିଁ ବୋଲି ସୌରଭୀ କହିଛନ୍ତି ।
ଅଭିଯୁକ୍ତମାନେ ୧୦ ବର୍ଷ ପୂର୍ବେ ବେଆଇନ୍ ଭାବରେ ନଦୀ ଦେଇ ଭାରତରେ ପ୍ରବେଶ କରିଥିଲେ । ମହାରାଷ୍ଟ୍ରର ପାଲଘରରେ ସେମାନେ ଶ୍ରମିକ ଭାବରେ କାର୍ଯ୍ୟ କରୁଥିଲେ । ପୋଲିସ ସେମାନଙ୍କ ବିରୋଧରେ ବିଦେଶୀ ଆକ୍ଟ ୧୯୪୬ ଏବଂ ପାସପୋର୍ଟ ଆକ୍ଟ ୧୯୫୦ ଅଧୀନରେ ମାମଲା ରୁଜୁ କରି ତଦନ୍ତ କରୁଥିବା ଜଣାପଡ଼ିଛି ।
