ନୂଆଦିଲ୍ଲୀ,୧୭/୦୩: ଦେଶର ବୃହତ୍ତମ ଇ-କମର୍ସ କମ୍ପାନୀ ଫ୍ଲିପକାର୍ଟର ଅବସ୍ଥା ଭଲ ନାହିଁ। କମ୍ପାନୀର ପୁଞ୍ଜି ପାଞ୍ଚ ବିଲିୟନ ଆମେରିକୀୟ ଡଲାର ହ୍ରାସ ପାଇଛି ଅର୍ଥାତ୍ ଦୁଇ ବର୍ଷ ମଧ୍ୟରେ ପ୍ରାୟ ୪୧,୦୦୦ କୋଟି ଟଙ୍କା ତଳକୁ ଖସିଛି। ଏହି ସୂଚନା ଫ୍ଳିପକାର୍ଟର ଆମେରିକୀୟ ଆଧାରିତ ପ୍ୟାରେଣ୍ଟ୍ କମ୍ପାନୀ ୱାଲମାର୍ଟର ଇକ୍ୱିଟି କାରବାରରୁ ଗ୍ରହଣ କରାଯାଇଛି। ଫ୍ଲିପକାର୍ଟରେ ୱାଲମାର୍ଟର ଇକ୍ୱିଟି ଢ଼ାଞ୍ଚାରେ ହୋଇଥିବା ପରିବର୍ତ୍ତନ ଅନୁଯାୟୀ, ୩୧ ଜାନୁୟାରୀ ୨୦୨୨, ଶେଷ ଆର୍ଥିକ ବର୍ଷରେ ଇ-କମର୍ସ କମ୍ପାନୀର ମୂଲ୍ୟ ୪୦ ବିଲିୟନ ଡ଼ଲାର ଥିଲା, ଯାହା ୩୧ ଜାନୁୟାରୀ ୨୦୨୪ ସୁଦ୍ଧା ୩୫ ବିଲିୟନ ଡ଼ଲାରକୁ ଖସି ଆସିଥିଲା।
ଫ୍ଲିପକାର୍ଟ ମୂଲ୍ୟାଙ୍କନରେ ହ୍ରାସ କାରଣକୁ ଫିନ୍ଟେକ୍ କମ୍ପାନୀ ଫୋନ୍ ପେକୁ ଏକ ପୃଥକ କମ୍ପାନୀରେ ବିଭକ୍ତ କରିଥିବା କହିଛି। ତେବେ ସୂତ୍ରରୁ ପ୍ରକାଶ ଯେ ଫ୍ଲିପକାର୍ଟର ବର୍ତ୍ତମାନର ମୂଲ୍ୟ ୩୮-୪୦ ବିଲିୟନ ମଧ୍ୟରେ ଅଛି। ୱାଲମାର୍ଟ ଫ୍ଲିପକାର୍ଟର ଆଠ ପ୍ରତିଶତ ଅଂଶକୁ ୨୦୨୧-୨୨ ଆର୍ଥିକ ବର୍ଷରେ ୩.୨ ବିଲିୟନ ଡଲାରରେ ବିକ୍ରି କରିସାରିଛି। ଏହି ଅନୁଯାୟୀ, ଇ-କମର୍ସ କମ୍ପାନୀର ମୂଲ୍ୟ ୪୦ ବିଲିୟନ ଡ଼ଲାରରେ ପହଞ୍ଚିଛି।
୨୦୨୩-୨୪ ଆର୍ଥିକ ବର୍ଷରେ, ଆମେରିକାର ଖୁଚୁରା କ୍ଷେତ୍ରର କମ୍ପାନୀ ୩.୫ ବିଲିୟନ ଡଲାର ଦେଇ କମ୍ପାନୀରେ ଅଂଶଧନକୁ ୧୦ ପ୍ରତିଶତ ବୃଦ୍ଧି କରି ୮୫ ପ୍ରତିଶତ କରିଛନ୍ତି। ଏହାକୁ ଆଧାର କରି ଫ୍ଲିପକାର୍ଟର ଭେଞ୍ଚର ଭାଲ୍ୟୁ ୩୫ ବିଲିୟନ ଡ଼ଲାରରେ ପହଞ୍ଚିଛି। ତେବେ ୱାଲମାର୍ଟର ରିପୋର୍ଟ ଅନୁଯାୟୀ ମୂଲ୍ୟ ହ୍ରାସକୁ ଫ୍ଲିପକାର୍ଟ ପ୍ରତ୍ୟାଖ୍ୟାନ କରିଛି ଏବଂ କମ୍ପାନୀର ମୂଲ୍ୟରେ ଉପଯୁକ୍ତ ସଂଶୋଧନ ହେତୁ ଏହା ହୋଇଛି ବୋଲି କହିଛି।
ଫ୍ଲିପକାର୍ଟ ମୁଖପାତ୍ର କହିଛନ୍ତି ଯେ ଏହି ବ୍ୟାଖ୍ୟା ଭୁଲ ଅଟେ। ଫୋନ୍ ପେ'କୁ ଅଲଗା କରିବାର କାମ ୨୦୨୩ରେ ଶେଷ ହୋଇଥିଲା। ଏହା ଫ୍ଲିପକାର୍ଟର ପୁଞ୍ଜିରେ ଉପଯୁକ୍ତ ସନ୍ତୁଳନ ଆଣିଥିଲା। ଫ୍ଲିପକାର୍ଟର ସୂତ୍ରରୁ ପ୍ରକାଶ ଯେ ଏହି ଉଦ୍ୟମର ମୂଲ୍ୟାଙ୍କନ ୨୦୨୧ ମସିହାରେ ଶେଷ ହୋଇଥିଲା ଏବଂ ସେହି ସମୟରେ ଫିଣ୍ଟେକ୍ ଫାର୍ମ ଫୋନପେ'ର ମୂଲ୍ୟ ମଧ୍ୟ ଇ-କମର୍ସ କମ୍ପାନୀର ମୋଟ ମୂଲ୍ୟରେ ସାମିଲ କରାଯାଇଥିଲା। ନିବେଶକ ଗୋଷ୍ଠୀ ଜେନେରାଲ ଆଟଲାଣ୍ଟିକ୍, ଟାଇଗର ଗ୍ଲୋବାଲ୍, ରିବଟ୍ କ୍ୟାପିଟାଲ୍ ଏବଂ ଟିଭିଏସ୍ କ୍ୟାପିଟାଲ୍ ଫଣ୍ଡ ଇତ୍ୟାଦିରୁ ୮୫୦ ମିଲିୟନ ଡଲାର ସଂଗ୍ରହ କରିବା ପରେ ଫୋନ୍ ପେ ର ମୂଲ୍ୟ ବର୍ତ୍ତମାନ ୧୨ ବିଲିୟନ ଡ଼ଲାରରେ ପହଞ୍ଚିଛି।
