ଭୁବନେଶ୍ୱର/ଭବାନୀପାଟଣା,୨୪/୦୯: ଭବାନୀପାଟଣା ଜାରିଂ ହାଇଟେକ୍ ନର୍ସରୀ ଫରେଷ୍ଟର ସଞ୍ଜୟ ନାୟକ ଆତ୍ମହତ୍ୟା ଘଟଣାରେ ସ୍ଥାନୀୟ ଡିଏଫ୍ଓଙ୍କ ସଂପୃକ୍ତି ଅଭିଯୋଗ ଆସିବା ପରେ ବିଭାଗୀୟ ତଦନ୍ତ ଆରମ୍ଭ କଲା ବନ ବିଭାଗ । ମାମଲାର ତଦନ୍ତ ଦାୟିତ୍ୱ ଜଣେ ସିସିଏଫ୍ ର୍ୟାଙ୍କ୍ ଅଧିକାରୀଙ୍କୁ ଦିଆଯାଇଛି । ଏନେଇ ସୂଚନା ଦେଇଛନ୍ତି ପିସିସିଏଫ୍ ଦେବୀଦତ୍ତ ବିଶ୍ୱାଳ ।
ପିସିସିଏଫ୍ ଶ୍ରୀ ବିଶ୍ୱାଳ କହିଛନ୍ତି, ଫରେଷ୍ଟରଙ୍କ ସୁଇସାଇଡାଲ ନୋଟ୍ରେ ଡିଏଫ୍ଓ ଦେବେନ୍ଦ୍ର ବେହେରାଙ୍କ ସମ୍ପର୍କରେ ଉଲ୍ଲେଖ ଥିବା ପୁଲିସ ସୂଚନା ଦେବା ପରେ ବିଭାଗୀୟ ତଦନ୍ତ ନିର୍ଦ୍ଦେଶ ଦିଆଯାଇଛି । ଯଥାଶୀଘ୍ର ତଦନ୍ତ ସାରି ରିପୋର୍ଟ ଦାଖଲ ପାଇଁ ନିର୍ଦ୍ଦେଶ ଦିଆଯାଇଛି । ଦୋଷୀ ଥିବା ନେଇ ତଦନ୍ତରୁ ଜଣାପଡ଼ିଲେ ବଡ଼ କାର୍ଯ୍ୟାନୁଷ୍ଠାନ ନିଆଯିବ । ଫରେଷ୍ଟର ସଞ୍ଜୟ ନାୟକ ନିଜ କ୍ୱାର୍ଟର୍ସରେ ଆତ୍ମହତ୍ୟା କରିଥିଲେ । ପୁଲିସ ମୃତଦେହ ଉଦ୍ଧାର ବେଳେ ସୁଇସାଇଡ୍ ନୋଟ୍ ଜବତ କରିଥିଲା ।
ସଞ୍ଜୟ ସୁଇସାଇଡ୍ ନୋଟ୍ରେ ଲେଖିଥିଲେ, ଡିଏଫ୍ଓ ଦେବେନ୍ଦ୍ର ବେହେରା ବାରମ୍ବାର ପିସି ମାଗୁଥିଲେ । ଗତବର୍ଷ ୭ ଲକ୍ଷ ଓ ଗଣେଶ ପୂଜା ବେଳେ ସେ ଡିଏଫ୍ଓଙ୍କୁ ସାଢ଼େ ୩ ଲକ୍ଷ ଟଙ୍କା ଦେଇଥିଲେ । ଡିଏଫ୍ଓଙ୍କ ଘରେ ଏସି ଲଗାଇବା ସହ ଟ୍ୟୁବ୍ୱେଲ ଖୋଳାଇଛନ୍ତି । ଗୋଟିଏ ମନ୍ଦିର ପାଇଁ ମଧ୍ୟ ୪୦ ହଜାର ଟଙ୍କା ଡୋନେସନ୍ ଦେଇଥିଲେ । ପ୍ରମୋସନ ରୋକିବା ଓ ଟ୍ରାନ୍ସଫର ଧମକ ଦେଇ ଡିଏଫ୍ଓ ପିସି ମାଗୁଥିବା ସୁଇସାଇଡ୍ ନୋଟରେ ସଞ୍ଜୟ ଉଲ୍ଲେଖ କରିଥିଲେ । ଏହି ଘଟଣା ରାଜ୍ୟରେ ଘୋର ଆଲୋଡ଼ନ ସୃଷ୍ଟି କରିଥିଲା । ସଞ୍ଜୟଙ୍କ ପତ୍ନୀ ପ୍ରିୟଙ୍କା ସୁବୁଦ୍ଧି ସମାନ ଅଭିଯୋଗ ଆଣିଛନ୍ତି । ଡିଏଫ୍ଓ ୭ ଲକ୍ଷ ଟଙ୍କା ପିସି ମାଗି ମାନସିକ ଚାପ ପକାଇବାରୁ ସଞ୍ଜୟ ଆତ୍ମହତ୍ୟା କଲେ ବୋଲି ପ୍ରିୟଙ୍କା ଅଭିଯୋଗ କରିଥିଲେ ।
ସଞ୍ଜୟଙ୍କ ପତ୍ନୀଙ୍କ ଅଭିଯୋଗ ପରେ ପିସିସିଏଫ୍ ଶ୍ରୀ ବିଶ୍ୱାଳ କହିଥିଲେ କି, ପୁଲିସ ଯଦି ପ୍ରାଥମିକ ତଦନ୍ତରେ ଅଫିସରଙ୍କ ସଂପୃକ୍ତି ନେଇ କିଛି ପ୍ରମାଣ ପାଏ, ତାହାହେଲେ ଆମେ ନିଶ୍ଚିତ ତଦନ୍ତ କରିବୁ । ଯଦି ଚାରା ଦୁର୍ନୀତି ହୋଇଥିବ, ତାହାହେଲେ ଆମ ପାଖରେ ଡକ୍ୟୁମେଣ୍ଟ୍ ପ୍ରମାଣ ନିଶ୍ଚିତ ଥିବ । କାରଣ ବନବିଭାଗ ପାଖରେ ଏକ ସବିଶେଷ ଆକାଉଣ୍ଟିଂ ସିଷ୍ଟମ ରହିଛି । ଡବଲ ଏଣ୍ଟ୍ରି ସିଷ୍ଟମ ଅଛି । ତେଣୁ ଦୁର୍ନୀତି ହୋଇଥିଲେ, ନିଶ୍ଚୟ ଜଣାପଡ଼ିବ । ତଦନ୍ତ କଲେ ସବୁ ସ୍ପଷ୍ଟ ହୋଇଯିବ । ପୁଲିସର ପ୍ରାଥମିକ ତଦନ୍ତରୁ ଯଦି କିଛି ସନ୍ଦେହ କଲାଭଳି ତଥ୍ୟ ମିଳିବ, ଆମେ ତଦନ୍ତ କରିବୁ । ଦୋଷୀ ବିରୋଧରେ ଆଇନ ଅନୁସାରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ । ତେଣୁ ସଞ୍ଜୟଙ୍କ ସୁଇସାଇଡାଲ ନୋଟରୁ ଡିଏଫ୍ଓଙ୍କ ସଂପୃକ୍ତି ଥିବା ଉଲ୍ଲେଖ ଥିବାରୁ ଜଣେ ସିସିଏଫ୍ଙ୍କୁ ଏହାର ତଦନ୍ତ କରିବାକୁ ନିର୍ଦ୍ଦେଶ ଦିଆଯାଇଥିବା ପିସିସିଏଫ୍ ଶ୍ରୀ ବିଶ୍ୱାଳ କହିଛନ୍ତି ।
ଅନ୍ୟପକ୍ଷରେ ଡିଏଫ୍ଓ ଶ୍ରୀ ବେହେରା ଫେରାର ଅଛନ୍ତି । ତାଙ୍କ ବୟାନ୍ ରେକର୍ଡ ରେକର୍ଡ କରିବା ପାଇଁ ସୋମବାର କଳାହାଣ୍ଡି ଏସପିଙ୍କ କାର୍ଯ୍ୟାଳୟରେ ଉପସ୍ଥିତ ହେବାକୁ ତାଙ୍କୁ ନୋଟିସ୍ ଦିଆଯାଇଥିଲା । ମାତ୍ର ଡିଏଫ୍ଓ ଆସିଲେ ନାହିଁ । ଭବାନୀପାଟଣା ଜିଲ୍ଲା ପୁଲିସ୍ ମୁଖ୍ୟାଳୟରେ ହାଜିର ହେବାକୁ ପୁଲିସ୍ ପକ୍ଷରୁ ତାଙ୍କୁ ଦୁଇଥର ସମନ୍ ହୋଇସାରିଛି । ମାତ୍ର ସେ ଧରାଛୁଆଁ ଦେଉନାହାନ୍ତି । ତାଙ୍କୁ ଯୋଗାଯାଗ କରାଯିବାକୁ ପ୍ରୟାସ କରାଯାଉଛି । ମାତ୍ର ତାଙ୍କ ମୋବାଇଲ୍ ଫୋନ୍ ସ୍ୱିଚ୍ ଅଫ୍ ରହିଛି । ସେ ଫେରାର ହୋଇଯାଇଛନ୍ତି ବୋଲି କଳାହାଣ୍ଡି ଏସପି ଅଭିଳାଷ ଜି ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି ।
ଘଟଣାରେ ଗତ ଶନିବାର ଭବାନୀପାଟଣା ଟାଉନ୍ ପୁଲିସ୍ ମୃତ ଫରେଷ୍ଟର ସଞ୍ଜୟଙ୍କ ବଡ଼ଭାଇ ରବି ନାରାୟଣ ନାୟକଙ୍କ ବୟାନ୍ ରେକର୍ଡ କରିଛି । ପ୍ରକାଶଯୋଗ୍ୟ ଯେ, ଗତ ବୁଧବାର ଜାରିଂ ହାଇଟେକ୍ ନର୍ସରୀର ସେଲ୍ଭି କଲଚର୍ ରିସର୍ଚ୍ଚ ୱିଙ୍ଗ ଦାୟିତ୍ୱରେ ଥିବା ସଞ୍ଜୟ ନାୟକ ତାଙ୍କର ଭବାନୀପାଟଣାସ୍ଥିତ ସରକାରୀ କ୍ୱାର୍ଟରରେ ଆତ୍ମହତ୍ୟା କରିଥିଲେ ।
