- ସାର୍କ ସମୂହ ରାଷ୍ଟ୍ରର ସ୍ବପ୍ନ ହୋଇଯିବ କି ଧୂଳିସାତ୍?
- ଇତିହାସ ପାଲଟିଯିବ କି ବହୂ ଚର୍ଚ୍ଚିତ ସାଉଥ୍ ଏସିଆ ୟୁନିଭର୍ସିଟି?
- ଚୁକ୍ତି ହୋଇଥିଲା, ସମୂହ ସାର୍କ ରାଷ୍ଟ୍ର ମିଳିତ ଭାବେ ଅର୍ଥ ଯୋଗାଇବେ
- ଏବେ ବଦଳି ଯାଇଛି ପ୍ରତିଶୃତି, ସବୁ ରାଷ୍ଟ୍ର ପାଖରେ ବକେୟା ଟଙ୍କା
- ଆର୍ଥିକ ସଙ୍କଟରେ ଜୁଝି ହେଉଛି ବିଶ୍ବବିଦ୍ୟାଳୟ
- ପାକିସ୍ତାନ ଆଡ଼େ ବକେୟା ୪୩ କୋଟି
ନୂଆଦିଲ୍ଲୀ,୦୨/୧୨: ଏକଦା ସାର୍କ ଦେଶଗୁଡିକ (ଭାରତ, ପାକିସ୍ଥାନ, ବାଂଲାଦେଶ, ଶ୍ରୀଲଙ୍କା, ନେପାଳ, ଭୁଟାନ ଏବଂ ମାଲଦ୍ୱୀପ) ନୂଆଦିଲ୍ଲୀରେ ଏକ 'ବିଶ୍ୱ ସ୍ତରୀୟ ବିଶ୍ୱବିଦ୍ୟାଳୟ' ନିର୍ମାଣ କରିବାର ସ୍ୱପ୍ନ ଦେଖିଥିଲେ। ସମସ୍ତେ ଏଥିପାଇଁ ସମ୍ବଳ ସଂଗ୍ରହ କରିବାକୁ ପ୍ରତିଶୃତି ଦେଇଥିଲେ। ପାଞ୍ଚ ବର୍ଷର କଠିନ ପରିଶ୍ରମ ପରେ, ପ୍ରସ୍ତାବଠାରୁ ଆରମ୍ଭ କରି ସମସ୍ତ କାଗଜ ପ୍ରକ୍ରିୟା ଦେଇ ଭାରତର ପ୍ରଥମ 'ଆନ୍ତର୍ଜାତୀୟ ବିଶ୍ୱବିଦ୍ୟାଳୟ' ଖୋଲାଗଲା। ଏବଂ ଏହାର ନାମ ରଖାଯାଇଥିଲା ଦକ୍ଷିଣ ଏସୀୟ ବିଶ୍ୱବିଦ୍ୟାଳୟ (South Asian University, SAU)। କିନ୍ତୁ ସମ୍ପ୍ରତି ଏହା ଏକ ଭୟଙ୍କର ଆର୍ଥିକ ସଙ୍କଟ ଦେଇ ଗତି କରୁଛି। ବିଶ୍ୱବିଦ୍ୟାଳୟଣ ଏପରି ସଂକଟ ଆସିବାର ମୁଖ୍ୟ ଭୂମିକା ପାକିସ୍ତାନର। ପଡ଼ୋଶୀ ଦେଶ ଏହି ବିଶ୍ବବିଦ୍ୟାଳୟ ପାଇଁ ଯେଉଁ ଅର୍ଥରାଶି ସାର୍କ ରାଷ୍ଟ୍ର ମଧ୍ୟରେ ପଡ଼ିଥଲା, ଏହାର ପ୍ରଥମ କିସ୍ତିର ସମ୍ପୂର୍ଣ୍ଣ ରାଶି ମଧ୍ୟ ପଡ଼ୋଶୀ ଦେଶ ପ୍ରଦାନ କରିନାହିଁ। ଏବଂ ବର୍ତ୍ତମାନସୁଦ୍ଧା ପାକିସ୍ତାନ ଉପରେ ଏହାର ମୋଟ ୪୩ କୋଟି ଟଙ୍କା ବାକି ଅଛି।
ପଢ଼ନ୍ତୁ: ଇଟାଲୀର ପ୍ରଧାନମନ୍ତ୍ରୀ ସେୟାର କଲେ ସେଲଫି , ପିଏମ୍ ମୋଦିଙ୍କ ଆସିଲା ପ୍ରତିକ୍ରିୟା
ମନମୋହନ ସିଂ ରଖିଥିଲେ ପ୍ରସ୍ତାବ:
ଘଟଣା ୨୦୦୫ର। ୧୩ ତମ ସାର୍କ ସମ୍ମିଳନୀ ବାଂଲାଦେଶର ରାଜଧାନୀ ଢ଼ାକାରେ ଚାଲିଥାଏ। ସେହି ସମ୍ମିଳନୀରେ ଭାରତର ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂ ଦେଶର ପ୍ରଥମ ଆନ୍ତର୍ଜାତୀୟ ବିଶ୍ବବିଦ୍ୟାଳୟର ମହତ୍ବାକାଂକ୍ଷୀ ବିଚାରଧାରାକୁ ପ୍ରସ୍ତାବ ଆକାରରେ ସହଯୋଗୀ ରାଷ୍ଟ୍ରମାନଙ୍କ ସାମ୍ନାରେ ରଖିଥିଲେ। ଏହି ବିଶ୍ୱବିଦ୍ୟାଳୟର ଉଦ୍ଦେଶ୍ୟ ଥିଲା ସାର୍କ (SAARC) ଦେଶର ଛାତ୍ର ଏବଂ ଗବେଷଣାକାରୀଙ୍କୁ ବିଶ୍ୱ ସ୍ତରୀୟ ସୁବିଧା ଏବଂ ବୃତ୍ତିଗତ ଅଧ୍ୟାପିନାର ସୁଯୋଗ ଦେବା।
ସାଉଥ୍ ଏସିୟା ୟୁନିଭର୍ସିଟି କ୍ୟାମ୍ପସ୍
ପ୍ରଧାନମନ୍ତ୍ରୀଙ୍କ ପ୍ରସ୍ତାବ ପରେ ବାଂଲାଦେଶର ଜଣେ ଜଣାଶୁଣା ଐତିହାସିକ, ପଣ୍ଡିତ ତଥା ଶିକ୍ଷାବିତ୍ ପ୍ରଫେସର ଗୌହର ରିଜବିଙ୍କୁ ଏସ୍ଏୟୁ ପାଇଁ ଏକ ଧାରଣା କାଗଜ ପ୍ରସ୍ତୁତ କରିବାର ଦାୟିତ୍ବ ଦିଆଯାଇଥିଲା। ବହୁ ବିଚାର ବିମର୍ଶ ପରେ, ୪ ଏପ୍ରିଲ ୨୦୦୭ ରେ ନୂଆଦିଲ୍ଲୀରେ ଆୟୋଜିତ ୧୪ ତମ ସାର୍କ ସମ୍ମିଳନୀରେ ବିଶ୍ବବିଦ୍ୟାଳୟ ପ୍ରତିଷ୍ଠା ପାଇଁ ସାର୍କ ଦେଶଗୁଡିକ ଏକ ଆନ୍ତଃମନ୍ତ୍ରୀସ୍ତରୀୟ ଚୁକ୍ତିନାମା ସ୍ୱାକ୍ଷର କରିଥିଲେ। ୨୦୦୮ରେ ଭାରତ ସରକାର ଏସ୍ଏୟୁ ପାଇଁ ଏକ ପ୍ରକଳ୍ପ କାର୍ଯ୍ୟାଳୟ ଖୋଲିଥିଲେ। ଏହାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ) ର ପୂର୍ବତନ କୁଳପତି ପ୍ରଫେସର ଜି.କେ. ଚଡ୍ଡାଙ୍କୁ ନିଯୁକ୍ତ କରାଯାଇଥିଲା। ଏସ୍ଏୟୁର ପ୍ରତିଷ୍ଠା ତଦାରଖ କରିବା ପାଇଁ ସମସ୍ତ ସାର୍କ ଦେଶର ସଦସ୍ୟଙ୍କୁ ନେଇ ଏକ ସାର୍କ ପରିଚାଳନା କମିଟି ଗଠନ କରାଯାଇଥିଲା।
ତତ୍କାଳୀନ ବୈଦେଶିକ ବ୍ୟାପାର ମନ୍ତ୍ରୀ ପ୍ରଣବ ମୁଖାର୍ଜୀ ୨୬ ମଇ ୨୦୦୮ରେ ଦକ୍ଷିଣ ଦିଲ୍ଲୀର ମୈଦାନ ଗଡ଼ି (ମହରୌଲି) ଠାରେ ୧୦୦ ଏକର ଜମିରେ ଏସଏୟୁ କ୍ୟାମ୍ପସର ମୂଳଦୁଆ ପକାଇଲେ। ୨୦୧୦ ରେ ଥିମ୍ଫୁରେ ଆୟୋଜିତ ହୋଇଥିବା ୧୬ ତମ ସାର୍କ ସମ୍ମିଳନୀରେ କାଗଜପତ୍ର ପ୍ରକ୍ରିୟା ଚୂଡାନ୍ତ ହୋଇଥିଲା ଏବଂ ଏସ୍ଏୟୁ ଅଗଷ୍ଟ ୨୦୧୦ ରେ ଛାତ୍ରମାନଙ୍କ ପାଇଁ ଦ୍ୱାର ଖୋଲିଥିଲା।
ଭାରତର ପୂର୍ବତନ ରାଷ୍ଟ୍ରପତି ଶ୍ରୀ ପ୍ରଣବ ମୁଖାର୍ଜୀ
ପଢ଼ନ୍ତୁ: ସୁଡ଼ଙ୍ଗରେ ଫସି ଥିବା ୪୧ ଲୋକଙ୍କୁ କେଉଁ ଜିନିଷ ବଞ୍ଚାଇ ରଖିଲା ? ଘରେ ପହଞ୍ଚି ଗୋଟି ଗୋଟି କରି କହିଲେ ସୁଖରାମ
ବର୍ତ୍ତମାନ, ବିଶ୍ୱବିଦ୍ୟାଳୟ ପ୍ରତିଷ୍ଠା ହେବାର ପ୍ରାୟ ୧୩ ବର୍ଷ ପରେ, ସଦସ୍ୟ ଦେଶମାନଙ୍କ ପାଖରେ ବିଶ୍ୱବିଦ୍ୟାଳୟର ୧୦୦ କୋଟି ଟଙ୍କା ପଡ଼ିରହିଛି। ବିଶ୍ୱବିଦ୍ୟାଳୟ ଏକ ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଛି। ୨୦୧୦ ମସିହାରେ ବିଶ୍ୱବିଦ୍ୟାଳୟର ରାଜକୋଷରେ ୬୯ କୋଟି ଟଙ୍କା ଥିଲା, ଯାହା ଚଳିତ ବର୍ଷ ଜୁଲାଇ ୩୧ ସୁଦ୍ଧା ହ୍ରାସ ପାଇ ୧ କୋଟି ୨୩ ଲକ୍ଷ ଟଙ୍କାରେ ପହଞ୍ଚିଛି।
ସୂଚନାନୁସାରେ, ୭୦୦ ରୁ ଅଧିକ ଛାତ୍ର, ସାତୋଟି ବିଭାଗରେ ୫୬ ଶିକ୍ଷକ କର୍ମଚାରୀ ଏବଂ ୪୨ ଜଣ ଅଣଶିକ୍ଷକ କର୍ମଚାରୀଙ୍କ ସହିତ ବିଶ୍ୱବିଦ୍ୟାଳୟ ଚଳାଇବା ପାଇଁ ବାର୍ଷିକ ଖର୍ଚ୍ଚ ୭୦ କୋଟିରୁ ଅଧିକ ଅଟେ। ଏହି ଜରୁରୀକାଳୀନ ପରିସ୍ଥିତି ବିଷୟରେ ବିଶ୍ୱବିଦ୍ୟାଳୟ କେନ୍ଦ୍ରକୁ ସୂଚନା ଦେଇଛି। ସୂଚନାନୁସାରେ, ଏହି ଆର୍ଥିକ ବର୍ଷରେ ଏପର୍ଯ୍ୟନ୍ତ ଭାରତ ବ୍ୟତୀତ କୌଣସି ସାର୍କ ଦେଶ ବିଶ୍ୱବିଦ୍ୟାଳୟ ଚଳାଇବା ପାଇଁ ସ୍ଥିର ହୋଇଥିବା ଆର୍ଥିକ ଯୋଗଦାନ ଦେଇନାହାଁନ୍ତି।
କେଉଁ ଦେଶ ଦେବା କଥା କେତେ ଟଙ୍କା?
ଚୁକ୍ତିନାମା ଅନୁଯାୟୀ, ଏସଓୟୁର ସ୍ଥାୟୀ କ୍ୟାମ୍ପସ୍ ନିର୍ମାଣର ସମ୍ପୂର୍ଣ୍ଣ ଖର୍ଚ୍ଚ ଭାରତ ସମେତ ସଦସ୍ୟ ଦେଶ ବହନ କରିବାକୁ ହେବ। ଅନୁଷ୍ଠାନ ଚଳାଇବା ପାଇଁ ଆବଶ୍ୟକ ସବୁ ଖର୍ଚ୍ଚକୁ ସମସ୍ତ ସାର୍କ ଦେଶ ମିଳିତ ଭାବେ ଭରଣା କରିବେ। ଭାରତ ପରିଚାଳନା ଖର୍ଚ୍ଚର ୫୭.୪୯%, ପାକିସ୍ତାନ ୧୨.୯%, ବାଂଲାଦେଶ ୮.୨୦%, ଶ୍ରୀଲଙ୍କା ଏବଂ ନେପାଳ ୪.୯% ଏବଂ ଆଫଗାନିସ୍ତାନ, ଭୁଟାନ ଓ ମାଲଦ୍ୱୀପ ମୋଟ ଖର୍ଚ୍ଚର ୩.୮୩୦% ବହନ କରିବେ।
ବିଶ୍ୱବିଦ୍ୟାଳୟ ପ୍ରତିଷ୍ଠା ପରେ ପ୍ରଥମରୁ ଅଧ୍ୟାପକଙ୍କ ବେତନ ଦେବାରେ ବିଳମ୍ବ କରିଥିଲା କାରଣ ଏହା ବିଦେଶ ମନ୍ତ୍ରାଳୟ ଅର୍ଥାତ୍ ୨୦୨୨-୨୩ ଆର୍ଥିକ ବର୍ଷ ପାଇଁ ୪୩ କୋଟି ଟଙ୍କାର ଅବଦାନରୁ ଅର୍ଥରାଶି ଜାରି କରିବାକୁ ଅପେକ୍ଷା କରିଥିଲା। ବର୍ତ୍ତମାନ ଏହା ୩୦ କୋଟି ଟଙ୍କାର ପ୍ରଥମ କିସ୍ତି ସହିତ କାମ କରୁଛି ଯାହା ଜୁଲାଇରେ ବୈଦେଶିକ ମନ୍ତ୍ରଣାଳୟ ଦ୍ୱାରା ଅନୁମୋଦିତ ହୋଇଥିଲା।
ପଢ଼ନ୍ତୁ: ଫିଲିପାଇନ୍ସରେ ଶକ୍ତିଶାଳୀ ଭୂକମ୍ପ, ସୁନାମୀ ଚେତାବନୀ ଜାରି…
ଇଣ୍ଡିଆନ୍ ଏକ୍ସପ୍ରେସ୍ ଏସ୍ଏୟୁର କାର୍ଯ୍ୟକାରୀ ଅଧ୍ୟକ୍ଷ ରଞ୍ଜନ କୁମାର ମହାନ୍ତି, ବିଶ୍ୱବିଦ୍ୟାଳୟର ପ୍ରେସ ଅଫିସର ତଥା ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ରଙ୍କ ସହ ଯୋଗାଯୋଗ କରିଥିଲେ ମଧ୍ୟ ବିଶ୍ୱବିଦ୍ୟାଳୟର ଆର୍ଥିକ ସ୍ଥିତି ସମ୍ପର୍କରେ କୌଣସି ସରକାରୀ ପ୍ରତିକ୍ରିୟା ମିଳିନଥିଲା। ଜଣେ ଏସଏୟୁ ଅଧିକାରୀ କହିଛନ୍ତି, “ବିଶ୍ୱବିଦ୍ୟାଳୟ ଏହାର ପ୍ରଥମ ପର୍ଯ୍ୟାୟରେ (୨୦୧୦-୨୦୧୮ ମଧ୍ୟରେ) କୌଣସି ଆର୍ଥିକ ସମସ୍ୟାର ସମ୍ମୁଖୀନ ହୋଇନଥିଲା। ପାକିସ୍ତାନ ବ୍ୟତୀତ ସମସ୍ତ ସଦସ୍ୟ ଦେଶ ସେମାନଙ୍କର ଅଂଶ ପ୍ରଦାନ କରିଥିଲେ। ପ୍ରଥମ ପର୍ଯ୍ୟାୟରେ ପାକିସ୍ତାନ ପ୍ରାୟ ୬୫ କୋଟି ଟଙ୍କା ଦେବାର ଥିଲା, ସେଥିମଧ୍ୟରୁ ୩.୬ କୋଟି ଟଙ୍କା ଏବେ ବି ବକେୟା ରହିଛି। ଦ୍ୱିତୀୟ ପର୍ଯ୍ୟାୟରେ (୨୦୧୯-୨୦୨୩) ଏହି ସମସ୍ୟା ଆରମ୍ଭ ହୋଇଥିଲା, ଯେତେବେଳେ ଅନ୍ୟ ଦେଶ ମଧ୍ୟ ସେମାନଙ୍କ ଅବଦାନରେ ଅନିୟମିତତା ହେବାକୁ ଲାଗିଥିଲେ। ”
କେଉଁ ଦେଶ ଉପରେ କେତେ ବାକି?
ଶ୍ରୀଲଙ୍କା - ୧୧.୬ କୋଟି ଟଙ୍କା (୨୦୨୦ରୁ କୌଣସି ଯୋଗଦାନ ନାହିଁ)
ଆଫଗାନିସ୍ତାନ - ୯ କୋଟି ଟଙ୍କା (୨୦୨୦ରୁ କୌଣସି ଯୋଗଦାନ ନାହିଁ)
ବାଂଲାଦେଶ- ୧୮ କୋଟି ଟଙ୍କା (୨୦୨୦ରୁ କୌଣସି ଯୋଗଦାନ ନାହିଁ)
ମାଲଦ୍ୱୀପ - ୬.୯ କୋଟି ଟଙ୍କା (୨୦୨୧ରୁ କୌଣସି ଯୋଗଦାନ ନାହିଁ)
ଭୁଟାନ - ୧.୮ କୋଟି ଟଙ୍କା (୨୦୨୧ରୁ କୌଣସି ଯୋଗଦାନ ନାହିଁ)
ଭାରତ - ୧୩ କୋଟି ଟଙ୍କା (୨୦୨୨ରୁ କୌଣସି ଯୋଗଦାନ ନାହିଁ)
ନେପାଳ - ୨.୧ କୋଟି ଟଙ୍କା (୨୦୨୧ରୁ କୌଣସି ଯୋଗଦାନ ନାହିଁ)
ପାକିସ୍ତାନ- ୪୩ କୋଟି ଟଙ୍କା (୨୦୧୯ ପରଠାରୁ ଯୋଗଦାନ ଦେଇନାହିଁ)
ଶ୍ରୀଲଙ୍କା ଦୂତାବାସ ସୂତ୍ରରୁ ପ୍ରକାଶ ଯେ, ଦେଶରେ ମହାମାରୀ ତଥା ଅର୍ଥନୈତିକ ସଙ୍କଟ କାରଣରୁ ଏସଓୟୁକୁ ଅର୍ଥ ପ୍ରଦାନରେ ବିଳମ୍ବ ହୋଇଛି। ନେପାଳ ହାଇ କମିଶନ ସୂତ୍ର ଇଣ୍ଡିଆନ ଏକ୍ସପ୍ରେସକୁ କହିଛନ୍ତି ଯେ, ଆମେ ନିୟମିତ ଦେୟ ଦେଉଛୁ ଏବଂ ଦେୟକୁ ଅଗ୍ରଗତି କରିବାକୁ ଏକ ଦୀର୍ଘ ଅନୁମୋଦନ ପ୍ରକ୍ରିୟା ଅଛି। ଆମେ ଏସଏୟୁରୁ ବିଲ୍ ଗ୍ରହଣ କରିଛୁ ଏବଂ ଆବଶ୍ୟକ ଦେୟ ପ୍ରଦାନ ପ୍ରକ୍ରିୟାରେ ଅଛୁ।”
ପଢ଼ନ୍ତୁ କ୍ରିଡ଼ା ସମ୍ପର୍କିତ ଖବର: ଟି-୨୦ରେ ଇତିହାସ ରଚିଲା ଭାରତ, ଏହି କ୍ଷେତ୍ରରେ ହେଲା ବିଶ୍ବର ପ୍ରଥମ ପ୍ରଥମ ଦଳ
ଟଙ୍କା ପାଇବାରେ ବିଳମ୍ବ କାହିଁକି?
ଏସ୍ଏୟୁ ଏକ ଅନନ୍ୟ ପ୍ରୟୋଗ ଅଟେ। ତେବେ ଆରମ୍ଭରୁ ଆଶଙ୍କା ରହିଥିଲା ଯେ, ଆଞ୍ଚଳିକ ଭୂ-ରାଜନୀତି ଏହାର କାର୍ଯ୍ୟକାରିତା ଉପରେ ପ୍ରଭାବ ପକାଇବ। ୨୦୧୯ ଠାରୁ ପ୍ରାୟ ପାଞ୍ଚ ବର୍ଷ ମଧ୍ୟରେ ଏସ୍ଏୟୁର ପରିଚାଳନା ଖର୍ଚ୍ଚରେ ପାକିସ୍ତାନ ଯୋଗଦାନ ଶୂନ। ୩୧ ଜୁଲାଇ ୨୦୨୩ ପର୍ଯ୍ୟନ୍ତ ପାକିସ୍ତାନ ଆଡ଼େ ପ୍ରାୟ ୪୩ କୋଟି ଟଙ୍କା ବକେୟା ରହିଥିଲା।
ପାକିସ୍ତାନର ଏହି ମନୋଭାବ ଭାରତ ସହିତ ଥିବା ତିକ୍ତ ସମ୍ପର୍କ ସହିତ ଜଡ଼ିତ। ମୁମ୍ବାଇ ଆତଙ୍କବାଦୀ ଆକ୍ରମଣ ପରେ ଦୁଇ ଦେଶ ମଧ୍ୟରେ ସମ୍ପର୍କ ତୀବ୍ର ହେବାରେ ଲାଗିଥିଲା। ୨୦୧୪ ରେ ବିଜେପି ନେତୃତ୍ୱାଧୀନ ସରକାର କ୍ଷମତାକୁ ଆସିବା ପରେ ଉରି, ପଠାନକୋଟ ଏବଂ ପୁଲୱାମା ଭଳି ଆତଙ୍କବାଦୀ ଆକ୍ରମଣ ଘଟିଛି। ୨୦୧୯ରେ ଜାମ୍ମୁ କାଶ୍ମୀରରୁ ଧାରା ୩୭୦ ଏବଂ ୩୫ କ ରଦ୍ଦ ହେବା ପରେ ଏହି ତିକ୍ତତା ଆହୁରି ବଢ଼ିବାରେ ଲାଗିଥିଲା।ସମ୍ପର୍କ ଏତେ ଖରାପ ହୋଇଛି ଯେ ୨୦୧୫ ମସିହାରୁ ସାର୍କ ସମୂହ ପାକିସ୍ତାନରେ ଏକ ଶିଖର ସମ୍ମିଳନୀ ଆୟୋଜନ କରିବାରେ ସକ୍ଷମ ହୋଇ ନାହିଁ।
ଇଣ୍ଡିଆନ୍ ଏକ୍ସପ୍ରେସ୍ ଦ୍ବାରା ଏସଏୟୁର ଆର୍ଥିକ ରେକର୍ଡଗୁଡିକର ଏକ ଅଧ୍ୟୟନରୁ ଜଣାପଡିଛି ଯେ ୧ ଜାନୁୟାରୀ ୨୦୧୯ ରୁ ୩୧ ଜୁଲାଇ ୨୦୨୩ ମଧ୍ୟରେ ସାର୍କ ଦେଶ ତଥା ଛାତ୍ରଛାତ୍ରୀଙ୍କ ଦ୍ବାରା ପ୍ରଦାନ କରାଯାଇଥିବା ଦେୟରୁ ଏହା ମୋଟ ୨୨୪ କୋଟି ଟଙ୍କା ପାଇଛି। ବିଶ୍ୱବିଦ୍ୟାଳୟ ଏହାର କର୍ପସ ପାଣ୍ଠିରେ ହ୍ରାସ କରିବାକୁ ବାଧ୍ୟ ହୋଇଛି। ଏହାରି ଭିତରେ ଏସ୍ଏୟୁ ଦରମା ଏବଂ ଅନ୍ୟାନ୍ୟ ଖର୍ଚ୍ଚ ପାଇଁ ୨୮୮ କୋଟି ଟଙ୍କା ଖର୍ଚ୍ଚ କରିଥିଲା।
ଆର୍ଥିକ ସଙ୍କଟ ଦେଇ ଗତି କରୁଥିବା ବିଶ୍ୱବିଦ୍ୟାଳୟ ଫେବୃଆରୀରେ ବୈଦେଶିକ ବ୍ୟାପାର ମନ୍ତ୍ରଣାଳୟକୁ ଏସ୍ଓଏସ୍ ପଠାଇଥିଲା। ଇଣ୍ଡିଆନ୍ ଏକ୍ସପ୍ରେସରେ ଏହାର ଏକ କପି ମଧ୍ୟ ରହିଛି। ଜରୁରୀକାଳୀନ ପରିସ୍ଥିତି ବିଷୟରେ ସୂଚନା ଦେଇ ବିଶ୍ୱବିଦ୍ୟାଳୟ ଲେଖିଥିବା ଚିଠିରେ କୁହାଯାଇଛି ଯେ, ପରିଚାଳନା ବଜେଟରେ କୌଣସି ପାଣ୍ଠି ନ ଥିବାରୁ ବିଶ୍ୱବିଦ୍ୟାଳୟ ଏହାର ଦୈନନ୍ଦିନ ଆବଶ୍ୟକତା ପୂରଣ କରିବା ପାଇଁ କର୍ପସ ପାଣ୍ଠିରୁ ଟଙ୍କା ଉଠାଉଛି। ବିଶ୍ୱବିଦ୍ୟାଳୟ ଲେଖିଛି ଯେ ସାର୍କ ଦେଶଗୁଡିକର ଅବଦାନର ଅଭାବ ଆର୍ଥିକ ସଙ୍କଟକୁ ବଢ଼ାଇ ଦେଇଛି। ଏସ୍ଏୟୁ ବୈଦେଶିକ ବ୍ୟାପାର ମନ୍ତ୍ରଣାଳୟକୁ ଅନୁରୋଧ କରିଛି ଯେ, ସଦସ୍ୟ ଦେଶମାନଙ୍କ ଉପରେ ସେମାନଙ୍କର ବକେୟା ଟଙ୍କା ପୈଠ କରିବାକୁ ଚାପ ପ୍ରୟୋଗ କରନ୍ତୁ ଏବଂ ଭାରତ ସରକାର ମଧ୍ୟ ଏହାର ଅର୍ଥ ପ୍ରଦାନ କରନ୍ତୁ।
ପଢ଼ନ୍ତୁ ବାଣିଜ୍ୟ ସମ୍ପର୍କିତ ଖବର: ଏବେ ବି ଫେରିନି ୯,୭୬୦ କୋଟିର ୨୦୦୦ ଟଙ୍କିଆ, ଡେଡ୍ଲାଇନ୍ ଶେଷ ହେବା ପରେ ବି ଲୋକଙ୍କ ପାଖରେ ବଡ଼ ଟଙ୍କା
କ'ଣ କହୁଛନ୍ତି ସରକାର?
ସରକାରୀ ସୂତ୍ର ଇଣ୍ଡିଆନ୍ ଏକ୍ସପ୍ରେସକୁ କହିଛି ଯେ, “ଏସ୍ଏୟୁ ଏକ ଆନ୍ତଃ-ସରକାରୀ ସଂଗଠନ। ଏହା ସମ୍ପୂର୍ଣ୍ଣ ରୂପେ ଭାରତ ସରକାରଙ୍କ ଅଧୀନରେ ନାହିଁ। ଆମେ (ଭାରତ) ନିୟମିତ ଭାବରେ ପରିଚାଳନା ଖର୍ଚ୍ଚରେ ଆମର ଅଂଶଧନ ପ୍ରଦାନ କରୁଛୁ। ବିଶ୍ୱବିଦ୍ୟାଳୟ ଚଳାଇବା ପାଇଁ ଆମେ ସବୁକିଛି କରୁଛୁ। କିନ୍ତୁ ଯଦି ବୋର୍ଡରେ ଥିବା ଅନ୍ୟ ଦେଶ ବିଶ୍ୱବିଦ୍ୟାଳୟର ଗୁରୁତ୍ୱକୁ ବୁଝୁ ନାହାନ୍ତି, ତେବେ ଆମେ ଆଗକୁ ସାହାଯ୍ୟ କରିପାରିବୁ ନାହିଁ। ”
ସରକାରୀ ସୂତ୍ର ନିଶ୍ଚିତ କରିଛି ଯେ ଏହାର ଏସ୍ଏୟୁର ପରିଚାଳନା ବୋର୍ଡରେ ପ୍ରତ୍ୟେକ ସାର୍କ ଦେଶର ଦୁଇଜଣ ପ୍ରତିନିଧୀ ରହିଛନ୍ତି। ଡିସେମ୍ବର ୨୦୧୭ ଠାରୁ କୌଣସି ବୋର୍ଡ ବୈଠକ ହୋଇନାହିଁ। ଏହିପରି ବିଶ୍ୱବିଦ୍ୟାଳୟର ଅଧ୍ୟକ୍ଷ ନିର୍ବାଚନ ଅଟକି ରହିଛି। ୨୦୧୯ ରେ ଅଧ୍ୟକ୍ଷ କବିତା ଏ ଶର୍ମା ଅବସର ନେବା ପରଠାରୁ ଏସ୍ଏୟୁର କୌଣସି ମୁଖ୍ୟ ନାହାନ୍ତି। ବିଶ୍ୱବିଦ୍ୟାଳୟରେ କୌଣସି ସ୍ଥାୟୀ ଉପାଧ୍ୟକ୍ଷ ଏବଂ ରେଜିଷ୍ଟ୍ରାର ମଧ୍ୟ ନାହାଁନ୍ତି।
ବିଶ୍ବବିଦ୍ୟାଳୟରେ କମୁଛି ସାର୍କ ଦେଶର ଛାତ୍ରଙ୍କ ସଂଖ୍ୟା:
ଚଳିତ ବର୍ଷ ଜୁନ୍ ୧୬ ରେ ଅନୁଷ୍ଠାନର ଅଧ୍ୟାପକମାନେ ପରସ୍ପରକୁ ପଠାଇଥିବା ଏକ ଇମେଲରେ ଦର୍ଶାଯାଇଛି ଯେ, ଦକ୍ଷିଣ ଏସୀୟ ଛାତ୍ରମାନଙ୍କ ମଧ୍ୟରେ ଏସ୍ଏୟୁକୁ ନେଇ ଲୋକପ୍ରିୟତା ହ୍ରାସ ପାଉଛି। ଇମେଲରେ ଲେଖାଅଛି, “ସାଧାରଣତଃ ସମଗ୍ର ବିଶ୍ୱବିଦ୍ୟାଳୟ ପାଇଁ ଏମ୍ଏ ନାମାଙ୍କନ ସଂଖ୍ୟା ଭଲ ନାହିଁ। ମୋଟ ୩୩୯ ଟି ସିଟ୍ ଥିଲା। ମାତ୍ର ୧୬୩ ଜଣ ଛାତ୍ରଛାତ୍ରୀ ନାମ ଲେଖାଇଥିଲେ। କୌଣସି ଦକ୍ଷିଣ ଏସୀୟ ଛାତ୍ରଙ୍କ ଅନୁପସ୍ଥିତିରେ ଅବଶିଷ୍ଟ ଭାରତୀୟ ସିଟ୍ ଛାତ୍ରଛାତ୍ରୀଙ୍କୁ ପ୍ରଦାନ କରିବାକୁ ବିଶ୍ୱବିଦ୍ୟାଳୟ ନିଷ୍ପତ୍ତି ନେଇଛି। ” ଇଣ୍ଡିଆନ୍ ଏକ୍ସପ୍ରେସ୍ ଟେଲିଫୋନ୍ ଏବଂ ମେସେଜ୍ ମାଧ୍ୟମରେ ପାକିସ୍ତାନ, ମାଲଦ୍ୱୀପ, ଭୁଟାନ ଏବଂ ବାଂଲାଦେଶର ରାଷ୍ଟ୍ରଦୂତଙ୍କ ସହ ଯୋଗାଯୋଗ କରିଥିଲା, କିନ୍ତୁ ଏ ସଂକ୍ରାନ୍ତରେ କୌଣସି ସରକାରୀ ପ୍ରତିକ୍ରିୟା ପାଇନଥିଲା। ତମାମ ସମସ୍ୟା ଭିତରେ ସାଉଥ୍ ଏସିଆ ୟୁନିଭର୍ସିଟି ବା ଦକ୍ଷିଣ ଏସିୟ ବିଶ୍ବବିଦ୍ୟାଳୟର ଭାଗ୍ୟ କ'ଣ ହେବ, ତାହା ଦେଖିବାକୁ ବାକି ରହିଲା।
You can also read: ଯୁଦ୍ଧ ପରେ କଣ ହେବ ? ବିଶ୍ବସ୍ତରରେ ହମାସ ନେତାଙ୍କୁ ଖୋଜି ଖୋଜି ମାରିବାକୁ ଯୋଜନା କରୁଛି ଇସ୍ରାଏଲ