ଶ୍ରୀନଗର ୧୯/୩: ଇତିହାସରେ ପ୍ରଥମ । କାଶ୍ମୀରରେ ହୋଇଛି ପ୍ରଥମ ଫର୍ମୁଲା-୪ ରେସ୍‌ । ଗତ ରବିବାର ଶ୍ରୀନଗର ସ୍ଥିତ ଡାଲ୍‌ ହ୍ରଦ କୂଳରେ ଅବସ୍ଥିତ ବୋଲଭାର୍ଡ ରୋଡ୍‌ରେ ଏହି ରୋମାଞ୍ଚକର  ରେସ୍‌ ଅନୁଷ୍ଠିତ ହୋଇଥିଲା । କାଶ୍ମୀରରେ ମୋଟର କ୍ରୀଡ଼ାର ପ୍ରୋତ୍ସାହନ ଲାଗି ଏହି  କାର୍ଯ୍ୟକ୍ରମ ଆୟୋଜିତ ହୋଇଥିଲା । ସହରରେ ଆୟୋଜିତ ପ୍ରଥମ ଫର୍ମୁଲା-୪ କାର୍‌  ରେସ୍‌ ଲଲିତ ଘାଟରୁ ନେହରୁ ପାର୍କ ୧.୭ କିମି ପର୍ଯ୍ୟନ୍ତ ହୋଇଥିଲା ।

ପର୍ଯ୍ୟଟନର ପ୍ରୋତ୍ସାହନ ସହିତ ସ୍ଥାନୀୟ ଯୁବବର୍ଗଙ୍କ ପାଇଁ ବହୁମୁଖୀ କ୍ୟାରିଅର୍‌ର ସୁବିଧା ପ୍ରଦାନ କରିବା ଏହି କାର୍ଯ୍ୟକ୍ରମର ଲକ୍ଷ୍ୟ । ଏ ଅବସରରେ ପେସାଦାର ଫର୍ମୁଲା-୪ ଚାଳକମାନେ  ଚମତ୍କାର ଷ୍ଟଣ୍ଟ୍‌ ପ୍ରଦର୍ଶନ ସହିତ ଆକ୍ସନ୍‌-ପ୍ୟାକ୍‌ଡ ରେସ୍‌ରେ ଦର୍ଶକଙ୍କୁ ଆକୃଷ୍ଟ କରିଥିଲେ। ରେସ୍‌ରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା । ଡ୍ରୋନ୍‌ ଜରିଆରେ ଉକ୍ତ ଅଞ୍ଚଳ ଉପରେ  ନଜର ରଖାଯାଇଥିଲା । ପର୍ଯ୍ୟଟନ ବିଭାଗ ଅଧୀନରେ ଫର୍ମୁଲା-୪ ଓ ଇଣ୍ଡିଆନ ରେସିଂ  ଲିଗ୍‌ର ସହଭାଗିତାରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା ।