ନୂଆଦିଲ୍ଲୀ ୨୨/୦୮: ବିଶ୍ୱର ସବୁଠୁ ବୟସ୍କ ବ୍ୟକ୍ତିଙ୍କ ମୃତ୍ୟୁ । ଗତ ମଙ୍ଗଳବାର ୧୧୭ ବର୍ଷ ବୟସରେ ସ୍ପେନ୍‌ର ମାରିଆ ବ୍ରାନ୍‌ୟାସ ମୋରେରାଙ୍କର ଦେହାନ୍ତ ହୋଇଛି । ତାଙ୍କ ପରିବାର ଏହି ସୂଚନା ଦେଇଛି । ଆମେରିକାରେ ଜନ୍ମିତ ମୋରେରା ଜୀବନକାଳ ମଧ୍ୟରେ ୨ଟି ବିଶ୍ୱଯୁଦ୍ଧ ଦେଖିଛନ୍ତି । ଫ୍ରାନ୍ସର ନନ୍‌ ଲୁସିଲ ରାନ୍‌ଡନଙ୍କର ୧୧୮ ବର୍ଷ ବୟସରେ ମୃତ୍ୟୁ ହେବା ପରେ ଗିନିଜ୍‌ ବିଶ୍ୱ ରେକର୍ଡସ୍‌ ୨୦୨୩, ଜାନୁଆରୀରେ ମୋରେରାଙ୍କୁ ଔପଚାରିକ ରୂପେ ବିଶ୍ୱର ସବୁଠୁ ବୟସ୍କ ବ୍ୟକ୍ତିର ମାନ୍ୟତା ପ୍ରଦାନ କରିଥିଲା । 

ମୋରେରାଙ୍କ ପରିବାର ଏକ୍ସ ପ୍ଲାଟ୍‌ଫର୍ମରେ ଉଲ୍ଲେଖ କରିଛି ‘ତାଙ୍କ ଇଚ୍ଛା ଅନୁସାରେ ଶୋଇଥିବା ଅବସ୍ଥାରେ ଶାନ୍ତିରେ ଏବଂ ବିନା ଯନ୍ତ୍ରଣାରେ ତାଙ୍କର ଦେହାନ୍ତ ହୋଇଛି । ତାଙ୍କ ଉପଦେଶ ଓ କରୁଣା ପାଇଁ ଆମେ ସର୍ବଦା ତାଙ୍କୁ ମନେରଖିବୁ ।’ ମୋରେରା ଗତ ଦୁଇ ଦଶନ୍ଧି ଧରି ନର୍ଥଇଷ୍ଟର୍ନ ଅଞ୍ଚଳରେ ସ୍ଥିତ ଓଲୋଟ୍‌ ନଗରୀର ସାଣ୍ଟା ମାରିଆ ଡେଲ ତୁରା ନର୍ସିଂ ହୋମ୍‌ରେ ରହୁଥିଲେ । ଗତ ସୋମବାର ସୋସିଆଲ ମିଡିଆ ପୋଷ୍ଟ୍‌ ମାଧ୍ୟମରେ ସେ ଦୁର୍ବଳ ଅନୁଭବ କରୁଥିବା କଥା ଜଣାଇଥିଲେ । ସେ ଲେଖିଥିଲେ ‘ସମୟ ପାଖେଇ ଆସିଲାଣି । କାନ୍ଦନାହିଁ । ମୁଁ ଲୁହ ପସନ୍ଦ କରେନାହିଁ । ସର୍ବୋପରି ମୋ ପାଇଁ କଷ୍ଟ ସହ୍ୟ କରନାହିଁ । ମୁଁ ଯୁଆଡ଼େ ଯାଏ, ଖୁସି ହେବି ।’

ପରିବାର ପକ୍ଷରୁ ତାଙ୍କର ସୋସିଆଲ ମିଡିଆ ଆକାଉଣ୍ଟ୍‌ ପରିଚାଳିତ ହେଉଥିଲା । ମୋରେରାଙ୍କ ଦେହାନ୍ତ ପରେ ଜାପାନର ଟୋମିକୋ ଇଟୁକା ବିଶ୍ୱର ସବୁଠୁ ବୟସ୍କ ବ୍ୟକ୍ତି ହୋଇଛନ୍ତି । ୧୯୦୮ ମସିହା, ମେ ୨୩ରେ ସେ ଜନ୍ମଗ୍ରହଣ କରିଥିଲେ । ତାଙ୍କ ବୟସ ୧୧୬ ବର୍ଷ ।