ଲଣ୍ଡନ,୦୯/୦୯: ଇଂଲଣ୍ଡର ଭେଟେରାନ ଅଲରାଉଣ୍ଡର ମୋଇନ ଅଲି ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି । ଆଗାମୀ ଅଷ୍ଟ୍ରେଲିଆ ବିପକ୍ଷ ସୀମିତ ଓଭର କ୍ରିକେଟ୍ ସିରିଜରୁ ବାଦ୍ ପଡ଼ିବା ପରେ ସେ ଏହି ନିଷ୍ପତ୍ତି ନେଇଛନ୍ତି । ମୋଇନ ୬୮ଟି ଟେଷ୍ଟ ଖେଳି ୩୦୯୪ରନ୍ ଓ ୨୦୪ ୱିକେଟ୍ ନେଇଥିବାବେଳେ ଦିନିକିଆରେ ୧୩୮ଟି ମ୍ୟାଚ୍ରୁ ୨୩୫୫ରନ୍ ଓ ୧୧୧ୱିକେଟ୍ ଏବଂ ଟି-ଟ୍ୱେଣ୍ଟିରେ ୯୨ମ୍ୟାଚ୍ରୁ ୧୨୨୯ ରନ୍ ସମେତ ୫୧ଟି ୱିକେଟ୍ ଅକ୍ତିଆର କରିଛନ୍ତି । ଟି-ଟ୍ୱେଣ୍ଟି ବିଶ୍ୱକପ୍ରେ ଭାରତ ବିପକ୍ଷ ସେମି ଫାଇନାଲ୍ ତାଙ୍କ କ୍ୟାରିୟରର ଶେଷ ଅନ୍ତର୍ଜାତୀୟ ମ୍ୟାଚ୍ ରହିଥିଲା ।
ମୋଇନ୍ କହିଛନ୍ତି, ଏବେ ମୋତେ ୩୭ ବର୍ଷ ବୟସ । ଆଗାମୀ ଅଷ୍ଟ୍ରେଲିଆ ବିପକ୍ଷ ସିରିଜ ପାଇଁ ମୋତେ ଦଳରେ ନିଆଯାଇନାହିଁ । ଇଂଲଣ୍ଡ ପକ୍ଷରୁ ମୁଁ ବହୁତ କ୍ରିକେଟ୍ ଖେଳି ସାରିଛି । ଏବେ ଅବସର ପାଇଁ ଉପଯୁକ୍ତ ସମୟ । ଆଗାମୀ ପିଢ଼ିଙ୍କୁ ରାସ୍ତା ଛାଡ଼ିବାର ସମୟ ଆସିଯାଇଛି । କ୍ୟାରିୟର ମଧ୍ୟରେ ପାଖାପାଖି ୩୦୦ ଅନ୍ତର୍ଜାତୀୟ ମ୍ୟାଚ୍ ଖେଳିଛି । ଆସେସ୍ ଟ୍ରଫି ଜିତିଥିବାବେଳେ ଦୁଇ ଥର ବିଶ୍ୱକପ୍ ଚାମ୍ପିଅନ୍ ହୋଇଛି । ଦଳ ପାଇଁ ଶତପ୍ରତିଶତ ଯୋଗଦାନ ଦେଇଥିବାରୁ ବହୁତ ଖୁସି । ଆଗାମୀ ସମୟରେ ଫ୍ରାଞ୍ଚାଇଜ କ୍ରିକେଟ୍ ଖେଳିବା ଜାରି ରଖିବି । ପରେ କୋଚିଂରେ କ୍ୟାରିୟର କରିବାକୁ ଚାହୁଁଛି ।
