ଲକ୍ଷ୍ନୌ, ୦୧/୦୪: ମାଫିଆ ମୁଖତାର ଅଂସାରୀର ମୃତ୍ୟୁକୁ ନେଇ ପ୍ରଶ୍ନ ଉଠୁଛି । ପରିବାର ଲୋକଙ୍କ ଅଭିଯୋଗ ଅନୁସାରେ, ଜେଲରେ କୁଆଡ଼େ ମୁଖତାର ଅଂସାରୀକୁ ସ୍ଲୋ ପଏଜନ୍ ଦିଆ ଯାଉଥିଲା । ତେବେ ଶବ ବ୍ୟବଛେଦ ରିପୋର୍ଟ ଅନୁସାରେ, ମୁଖତାରଙ୍କ ମୃତ୍ୟୁର କାରଣ ହୃଦଘାତ । ଏବେ ମୁଖତାର ଅଂସାରୀଙ୍କ ଭିସେରା ରିପୋର୍ଟ ଯାଞ୍ଚ ପାଇଁ ପଠା ଯାଇଛି । ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହୋଇଯିବ ।

ମୁଖତାର ଅଂସାରୀଙ୍କ ପରିବାର ଲୋକ ଧିର ଜହର ଦିଆ ଯାଉଥିବା ଅଭିଯୋଗ ଆଣିଥିଲେ । ଶବ ବ୍ୟବଛେଦ ବେଳେ ଡାକ୍ତର ମୁଖତାର ଅଂସାରୀଙ୍କ ୫ଟି ଅଙ୍ଗର ଭିସେରା ସଂରକ୍ଷିତ ରଖିଥିଲେ । ଯାହାକୁ ପରେ ପୋଲିସକୁ ହସ୍ତାନ୍ତର କରାଯାଇଥିଲା । ଏବେ ପୋଲିସ ଉକ୍ତ ଭିସେରାକୁ ଯାଞ୍ଚ ଲାଗି ଲକ୍ଷ୍ନୌ ଲ୍ୟାବକୁ ପଠାଇଛି ।

ସୂଚନାଯୋଗ୍ୟ, ମାର୍ଚ୍ଚ ୨୮ରେ ମାଫିଆ ମୁଖତାର ଅଂସାରୀର ସ୍ୱାସ୍ଥ୍ୟାବସ୍ଥା ବିଗିଡ଼ି ଥିଲା । ଫଳରେ ତାକୁ ବାନ୍ଦା ମେଡିକାଲ୍ କଲେଜରେ ଭର୍ତ୍ତି କରା ଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଥିଲା ମୁଖତାର । ସେତେବେଳେ ମୁଖତାର ମୃତ୍ୟୁର କାରଣ ହୃଦଘାତ କୁହା ଯାଇଥିଲା । କିନ୍ତୁ ବିଷ ଦିଆ ଯାଇଥିବା ଅଭିଯୋଗ କରିଥିଲେ ପରିବାର ଲୋକ ।

ଏହା ପରେ ମାର୍ଚ୍ଚ ୨୯ ବିଳମ୍ବିତ ରାତିରେ ମୃତଦେହକୁ ଗାଜିପୁର ସ୍ଥିତ ପୈତୃକ ଘରକୁ ନିଆ ଯାଇଥିଲା । ମାର୍ଚ୍ଚ ୩୦ ସକାଳେ କାଳୀବାଗ କବ୍ରିସ୍ତାନରେ ମୃତଦେହକୁ କବର ଦିଆ ଯାଇଥିଲା । ମୁଖତାର ଅଂସାରୀ ବିରୋଧରେ ପ୍ରାୟ ୬୦ରୁ ଅଧିକ ମାମଲା ରହିଥିଲା । ହତ୍ୟା ଉଦ୍ୟମ, ଅପହରଣ ସହ ଅନ୍ୟ ମାମଲା ରହିଥିଲା । ଯେଉଁଥିଲାଗି ମୁଖତାରକୁ ହୋଇଥିଲା ୮ ବର୍ଷ ଜେଲ୍ ଦଣ୍ଡାଦେଶ ।