ନୂଆଦିଲ୍ଲୀ,୦୩/୦୯: 'ଗୋଟିଏ ଦେଶ, ଗୋଟିଏ ନିର୍ବାଚନ' କୁ ନେଇ ଏବେ ସାରା ଦେଶରେ ଚର୍ଚ୍ଚା ଶିର୍ଷରେ ପହଞ୍ଚିଛି। ଏହାରି ଭିତରେ ଆଇନ ମନ୍ତ୍ରାଳୟର ପ୍ରମୁଖ ଅଧିକାରୀମାନେ ରବିବାର (ସେପ୍ଟେମ୍ବର ୩ ତାରିଖ) ଦିନ ଭାରତର ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ସାକ୍ଷାତ କରିଥିଲେ। କୋବିନ୍ଦ ଲୋକସଭା, ରାଜ୍ୟ ବିଧାନସଭା ଏବଂ ସ୍ଥାନୀୟ ସଂସ୍ଥାଗୁଡ଼ିକରେ ଏକକାଳୀନ ନିର୍ବାଚନ ହେବାର ସମ୍ଭାବନାକୁ ଦୃଷ୍ଟିରେ ରଖି ଗଠିତ ଉଚ୍ଚ ସ୍ତରୀୟ କମିଟିର ସଭାପତି ଅଟନ୍ତି।
ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ ଆଇନ ସଚିବ ନିତେନ ଚନ୍ଦ୍ରା, ବିଧାନସଭା ସଚିବ ରୀତା ବଶିଷ୍ଠ ଏବଂ ଅନ୍ୟ ଅଧିକାରୀମାନେ କୋବିନ୍ଦଙ୍କୁ କହିଛନ୍ତି ଯେ, ସେମାନେ କମିଟି ଆଗରେ କିପରି କାର୍ଯ୍ୟ କରିବେ। ନିତେନ ଚନ୍ଦ୍ର ମଧ୍ୟ ଉଚ୍ଚ ସ୍ତରୀୟ କମିଟିର ସଚିବ ଏବଂ ରୀତା ବଶିଷ୍ଠଙ୍କ ବିଭାଗ ନିର୍ବାଚନ ପ୍ରସଙ୍ଗ, ଲୋକ ପ୍ରତିନିଧୀ ଆଇନ ଏବଂ ଆନୁଷଙ୍ଗିକ ନିୟମ ସହିତ କାର୍ଯ୍ୟ କରୁଛି।
'ଗୋଟିଏ ରାଷ୍ଟ୍ର, ଗୋଟିଏ ନିର୍ବାଚନ' କୁ ନେଇ ଗଠିତ କମିଟି:
ଲୋକସଭା, ରାଜ୍ୟସଭା, ପୌରସଂସ୍ଥା ଏବଂ ପଞ୍ଚାୟତ ପାଇଁ ଏକକାଳୀନ ନିର୍ବାଚନ କରିବା ପ୍ରସଙ୍ଗରେ କେନ୍ଦ୍ର ସରକାର ଏକ ୮ ଜଣିଆ କମିଟି ଗଠନ କରିଛନ୍ତି। ଏହି କମିଟିରେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ଅଧ୍ୟକ୍ଷତା କରିବେ ଏବଂ ଗୃହମନ୍ତ୍ରୀ ଅମିତ ଶାହା, ଲୋକସଭାରେ କଂଗ୍ରେସ ନେତା ଅଧିର ରଂଜନ ଚୌଧୁରୀ, ବିରୋଧୀ ଦଳର ପୂର୍ବତନ ରାଜ୍ୟ ନେତା ଗୁଲାମ ନବୀ ଆଜାଦ ଏବଂ ପୂର୍ବତନ ଅର୍ଥ ଆୟୋଗର ଅଧ୍ୟକ୍ଷ ଏନ.କେ ସିଂ ସଦସ୍ୟ ରହିବେ।
କଂଗ୍ରେସ ନେତା ଅଧିର ରଂଜନ ଚୌଧୁରୀ ଏହି କମିଟିରେ ଯୋଗଦେବାକୁ ମନା କରି ଦେଇଛନ୍ତି। ଏହି କମିଟିରେ ସାମିଲ ନହେବା କାରଣରୁ ସେ ରାଜ୍ୟସଭାରେ ବିରୋଧୀଦଳର ନେତା ମଲ୍ଲିକାର୍ଜୁନ ଖଡ୍ଗେଙ୍କୁ ମଧ୍ୟ ଟାର୍ଗେଟ କରିଥିଲେ। ଚଳିତ ବର୍ଷ ମଧ୍ୟପ୍ରଦେଶ, ଛତିଶଗଡ, ରାଜସ୍ଥାନ, ତେଲେଙ୍ଗାନା ଏବଂ ମିଜୋରାମରେ ନିର୍ବାଚନ ହେବାକୁ ଯାଉଥିବା ବେଳେ 'ଗୋଟିଏ ଦେଶ, ଗୋଟିଏ ନିର୍ବାଚନ' ଉପରେ କେନ୍ଦ୍ର ସରକାର ଏକ କମିଟି ଗଠନ କରିଛନ୍ତି। ଏଥି ସହିତ ଆସନ୍ତା ବର୍ଷ ଲୋକସଭା ନିର୍ବାଚନ ହେବାକୁ ଯାଉଛି।
କେଉଁ କାମ କରିବ କମିଟି:
ଏହି କମିଟି ଅନାସ୍ଥା ପ୍ରସ୍ତାବ, ଦଳ-ବଦଳ ଆଇନ ଏବଂ ଲୋକସଭାର ପରିସ୍ଥିତିକୁ ବିଶ୍ଳେଷଣ କରିବ ଏବଂ ସେହି ଅନୁଯାୟୀ ଏହା ପରାମର୍ଶ ଦେବ। ଏହା ବ୍ୟତୀତ କମିଟି ଲୋକସଭା, ବିଧାନସଭା, ପୌରସଂସ୍ଥା ଏବଂ ପଞ୍ଚାୟତକୁ ଏକକାଳୀନ ନିର୍ବାଚନ କରିବାର ସମ୍ଭାବନା ଉପରେ ବିଚାର କରିବ ଏବଂ ସୁପାରିଶ କରିବ। ବର୍ତ୍ତମାନ କମିଟିର କାର୍ଯ୍ୟକାଳ କେତେ ହେବ ସେ ସମ୍ପର୍କରେ କୌଣସି ସୂଚନା ନାହିଁ। ତେବେ କମିଟି ଶୀଘ୍ର ରିପୋର୍ଟ ଦାଖଲ କରିବାକୁ କୁହାଯାଇଛି।
You can also read:
