ନୂଆଦିଲ୍ଲୀ: ଜମ୍ମୁକାଶ୍ମୀରରେ ଜାରି ରହିଥିବା ବିଧାନସଭା ନିର୍ବାଚନ ଉପରେ ପାକିସ୍ତାନ ନଜର ରଖିଛି । ଜମ୍ମୁକାଶ୍ମୀରକୁ ଆର୍ଟିକିଲ୍ ୩୭୦ ଏବଂ ୩୫ଏ ଫେରିବ ବୋଲି ଆଶା ରଖିଛି ପାକିସ୍ତାନ । କାଶ୍ମୀରକୁ ନେଇ ବଡ଼ ମନ୍ତବ୍ୟ ଦେଇଛନ୍ତି ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ୍ । ଜମ୍ମୁକାଶ୍ମୀରରେ ଅନୁଚ୍ଛେଦ ୩୭୦ ଏବଂ ୩୫ ଏ ପୁନଃ କାର୍ଯ୍ୟକାରୀ କରିବାକୁ ନେଇ ପାକିସ୍ତାନ ଏବଂ ନ୍ୟାସନାଲ କନଫରେନ୍ସ-କଂଗ୍ରେସ ମେଣ୍ଟର ଷ୍ଟାଣ୍ଡ ଗୋଟିଏ ବୋଲି କହିଛନ୍ତି ଖ୍ବାଜା ଆସିଫ । ସେପଟେ ଜମ୍ମୁକାଶ୍ମୀରରେ ୩୭୦ ଏବଂ ୩୫ ଏ ପ୍ରତ୍ୟାବର୍ତ୍ତନକୁ ନେଇ ନିରବ ରହିଛି କଂଗ୍ରେସ । ଏପରିକି ନିଜର ନିର୍ବାଚନୀ ଇସ୍ତାହାରରେ ଏନେଇ କିଛି ଉଲ୍ଲେଖ କରିନାହିଁ ଦଳ । କିନ୍ତୁ ବିଗତ ଦିନରେ ଜମ୍ମୁକାଶ୍ମୀରକୁ ପୂର୍ଣ୍ଣ ରାଜ୍ୟର ମାନ୍ୟତା ଦେବାକୁ ଦାବି କରିଥିଲେ ରାହୁଲ ଗାନ୍ଧୀ ।
ଶେଖ ଅବଦୁଲ୍ଲା ଏବଂ ନେହରୁ ଜମ୍ମୁକାଶ୍ମୀରରେ ଅନୁଚ୍ଛେଦ ୩୭୦ ଏବଂ ୩୫ଏ ଲାଗୁ କରିଥିଲେ । ଏବେ ଦୁଇ ଜଣଙ୍କ ଦଳ ଏକାଠି ହୋଇ ନିର୍ବାଚନ ଲଢ଼ୁଥିବା ବେଳେ ଜିତିଲେ ଆର୍ଟିକିଲ ୩୭୦ ଏବଂ ୩୫ଏକୁ ପୁନଃ ଲାଗୁ କରିବେ ବୋଲି କହିଛନ୍ତି । କଣ ଆପଣଙ୍କୁ ଲାଗୁଛି ଏହା ସମ୍ଭବ ହୋଇପାରିବ ବୋଲି ଖ୍ବାଜାକୁ ପ୍ରଶ୍ନ କରିଥିଲେ ଜିଓ ନ୍ୟୁଜର ସାମ୍ବାଦିକ । ଏହା ପରେ ଖ୍ବାଜା ଆସିଫ କହିଥିଲେ ଯେ, ‘ଜମ୍ମୁକାଶ୍ମୀରରେ ନ୍ୟାସନାଲ କନଫରେନ୍ସ ଏବଂ କଂଗ୍ରେସର ସ୍ଥିତି ଭଲ ଅଛି । ସେମାନଙ୍କ ସରକାରକୁ ଆସିବାର ସମ୍ଭାବନା ରହିଛି । ତେଣୁ ସେମାନେ ଏହାକୁ ନିର୍ବାଚନୀ ପ୍ରସଙ୍ଗ କରିବା ଦରକାର ।’
ସେ ଆହୁରି କହିଥିଲେ, ପାକିସ୍ତାନ ଏବଂ ନ୍ୟାସନାଲ କନଫରେନ୍ସ-କଂଗ୍ରେସ ମେଣ୍ଟ ଜମ୍ମୁକାଶ୍ମୀରରେ ଅନୁଚ୍ଛେଦ ୩୭୦ ଏବଂ ୩୫ଏ ପ୍ରତ୍ୟାବର୍ତ୍ତନ ଲାଗି ଗୋଟିଏ ମତ ପୋଷଣ କରୁଛନ୍ତି । ଖ୍ବାଜା କହିଛନ୍ତି, ପାକିସ୍ତାଦ ସବୁ ବେଳେ ଦାବି କରିଆସିଛି କାଶ୍ମୀରର ଷ୍ଟାଟସ ପୁଣି ଥରେ ରିଷ୍ଟୋର କରାଯାଉ । ସୂଚନାଯୋଗ୍ୟ, ବର୍ତ୍ତମାନ ଜମ୍ମୁକାଶ୍ମୀର ନିର୍ବାଚନ ଲାଗି କଂଗ୍ରେସର ଇସ୍ତାହାରରେ ୩୭୦ ଏବଂ ୩୫ଏ ପୁଣି ଥରେ ଲାଗୁ କରିବା ନେଇ କିଛି ବି ଉଲ୍ଲେଖ ନାହିଁ । କଂଗ୍ରେସ ଏବେ କେବଳ ଜମ୍ମୁକାଶ୍ମୀରକୁ ପୂର୍ଣ୍ଣ ରାଜ୍ୟର ମାନ୍ୟତା ମିଳୁ ବୋଲି ଦାବି କରୁଛନ୍ତି । ଅନ୍ୟପଟେ କଂଗ୍ରେସର ସହଯୋଗୀ ନ୍ୟାସନାଲ କନଫରେନ୍ସ ଅନୁଚ୍ଛେଦ ୩୭୦ ଏବଂ ୩୫ଏ ପୁନଃ ଲାଗୁ କରିବାକୁ ସ୍ବର ଉଠାଉଛି । ଏହାକୁ ନେଇ ବିଜେପି କଂଗ୍ରେସକୁ ଟାର୍ଗେଟ କରିଆସିଛି ।
