ନୂଆଦିଲ୍ଲୀ,୧୦।୧୨: ଦକ୍ଷିଣ ଚୀନ୍ ସାଗରରେ ନିୟୋଜିତ ଜାହାଜ ଉପରେ ଚୀନ୍ ଆକ୍ରମଣ କରିଛି ବୋଲି ଫିଲିପାଇନ୍ସ ଅଭିଯୋଗ କରିଛି। ଫିଲିପାଇନ୍ସ କୋଷ୍ଟଗାର୍ଡର ଜଣେ ଅଧିକାରୀ ରବିବାର କହିଛନ୍ତି ଯେ ଚୀନ୍ କୋଷ୍ଟଗାର୍ଡ ଆମ ଜାହାଜରେ ଜଳ ତୋପ ଦ୍ବାରା ପାଣି ମାଡ କରିବା ପରେ ଏହାକୁ ଧକ୍କା ଦେଇଛି। ଫିଲିପାଇନ୍ସ କୋଷ୍ଟଗାର୍ଡ ମୁଖପାତ୍ର ଜୟ ତରିଏଲା କହିଛନ୍ତି ଯେ ‘ଉନୈଜା ମଇଁ’ ନାମକ ଜାହାଜର ଇଞ୍ଜିନ ଗୁରୁତର ଭାବେ କ୍ଷତିଗ୍ରସ୍ତ ହୋଇଥିବାବେଳେ ଏମ / ଏଲ କାଲାୟାନରେ ପାଣିମାଡ ହୋଇଛି।  

ଫିଲିପାଇନ୍ସର ସ୍ପେଶାଲ ଇକୋନୋମିକ୍ ଜୋନ୍‌ରେ ଅବସ୍ଥିତ ଦ୍ୱିତୀୟ ଥୋମାସ୍ ଶୋଲ୍ ଅକ୍ଟୋବରରୁ ଫିଲିପାଇନ୍ସ ଏବଂ ଚୀନ୍ ଜାହାଜ ମଧ୍ୟରେ ମୁହାଁମୁହିଁ ହେବାର ଏହା ହେଉଛି ଦ୍ୱିତୀୟ ଘଟଣା। ଏହି ଅଞ୍ଚଳର ଫିଲିପାଇନ୍ସ ସୈନିକମାନେ ଏକ ପୁରୁଣା ଯୁଦ୍ଧ ଜାହାଜରେ ବାସ କରୁଛନ୍ତି, ଯାହା ବିବାଦୀୟ ଜଳପଥରେ ମାନିଲାର ଦାବିକୁ ସୁରକ୍ଷା ଦେବା ପାଇଁ ୧୯୯୯ ରେ ଜାଣିଶୁଣି ନିୟୋଜିତ ହୋଇଥିଲା। ଏହି ଘଟଣା ସମ୍ପର୍କରେ ଚୀନ୍ ଅଧିକାରୀଙ୍କ ତରଫରୁ କୌଣସି ତତ୍ପରତା ପ୍ରକାଶ ପାଇନାହିଁ। ରବିବାର ଦିନ ପ୍ରାୟ ୪୦ ଟି ଫିଲିପାଇନ୍ ଜାହାଜର ଖ୍ରୀଷ୍ଟମାସ କନଭୟ ବିବାଦୀୟ ଉପକୂଳ ଆଡକୁ ମୁହାଁଇଥିବା ବେଳେ ଏହି ଧକ୍କା ହୋଇଥିଲା।

ଏହାପୂର୍ବରୁ ଶନିବାର ଦିନ ଚୀନ୍‌ର ତଟରକ୍ଷୀ ବାହିନୀ ଫିଲିପାଇନ୍ସର ଫିସରିଜ୍‌ ବ୍ୟୁରୋର ଏକ ସିଭିଲିଆନ୍ ଗର୍ଭମେଣ୍ଟ ଭେସେଲ୍‌ରେ ପାଣି ମାଡ କରିଥିଲା। ଚୀନ୍‌ର ଏହି ବେଆଇନ ତଥା ଆକ୍ରମଣାତ୍ମକ କାର୍ଯ୍ୟକୁ ଫିଲିପାଇନ୍ସ ନିନ୍ଦା କରିଥିଲା। ଆଟିନ୍ ଇଟୋ (ଏହା ଆମର) ଅଭିଯାନ ନେଟୱାର୍କ ଦ୍ୱାରା ଆୟୋଜିତ ଏହି ମିଶନରେ ୨୦୦ ରୁ ଅଧିକ ମତ୍ସ୍ୟଜୀବୀ, ସିଭିଲ ସୋସାଇଟି ଗ୍ରୁପ୍‌ , ଯୁବ ନେତାମାନେ ଅଂଶଗ୍ରହଣ କରିଛନ୍ତି।  ଦକ୍ଷିଣ ଚୀନ୍ ସାଗରରେ ଫିଲିପାଇନ୍ସର ଅଧିକାରର ସୁରକ୍ଷା ପାଇଁ ଏହି ଅଭିଯାନ କରାଯାଇଛି।