ମୁମ୍ୱାଇ, ୨୪।୨: ଭାରତରେ ଏଭଳି ଅନେକ ବିଜନେସ୍ମ୍ୟାନ୍ ଅଛନ୍ତି ଯେଉଁମାନେ ସାରା ବିଶ୍ୱ ପ୍ରସିଦ୍ଧ । ଖାସ୍ କଥା ହେଉଛି, ଏମାନଙ୍କ ମଧ୍ୟରୁ ଅନେକ ନିଜ ପରିଶ୍ରମ ବଳରେ କୋଟିପତି ହୋଇଛନ୍ତି । କେବଳ ଭାରତରେ ନୁହେଁ, ବିଦେଶରେ ମଧ୍ୟ ନିଜ ସାମ୍ରାଜ୍ୟ ବିସ୍ତାର କରିଛନ୍ତି । ଆଜି ଆମେ ଜଣେ ଏଭଳି ବିଜନେସ୍ ମ୍ୟାନ୍ଙ୍କ ବିଷୟରେ କହିବୁ, ଯିଏ ଦିନେ ମୁମ୍ୱାଇର ବସ୍ତିରେ ରହୁଥିଲେ । ପିଲାଦିନ କଟିଥିଲା ବସ୍ତିରେ । ଆଉ ଆଜି ବିଦେଶରେ ସେ କୋଟି କୋଟି ସମ୍ପତ୍ତିର ମାଲିକ ।
ଏହି ବ୍ୟକ୍ତି ଜଣକ ହେଉଛନ୍ତି, ରିଜୱାନ୍ ସାଜନ୍ । ଯିଏ ସଂଯୁକ୍ତ ଅରବ ଏମିରେଟ୍ସର ଜଣେ ଅପ୍ରବାସୀ ଭାରତୀୟ ବିଜନେସମ୍ୟାନ୍ । ଏକ ସେଲ୍ସମ୍ୟାନ୍ ଭାବେ ନିଜ କ୍ୟାରିୟର ଆରମ୍ଭ କରିଥିଲେ ରିଜୱାନ୍ । ଆଉ ଆଜି ଦୁବାଇର ସବୁଠୁ ଧନୀ ଭାରତୀୟ ଭାବେ ସେ ପରିଚିତ । ତାଙ୍କର ଡେନ୍ୟୁବ୍ ନାମକ ଅରବ ଡଲାରର ଗ୍ରୁପ୍ ରହିଛି । ଯାହା ସଂଯୁକ୍ତ ଅରବ ଏମିରେଟ୍ସ, ଓମାଗ, ବହରୀନ୍, ସାଉଦି ଆରବ, କତାର ଓ ଭାରତ ସମେତ ବିଶ୍ୱର ସବୁଠୁ ବଡ଼ କନଷ୍ଟ୍ରକ୍ସନ୍ ମ୍ୟାଟେରିଆଲ୍ କମ୍ପାନୀ ।
ମୁମ୍ୱାଇର ଏକ ମଧ୍ୟବିତ୍ତ ପରିବାରରେ ରିଜୱାନ୍ ସାଜନଙ୍କ ଜନ୍ମ । ପରିବାର ପ୍ରତିପୋଷଣ ପାଇଁ ସେ ଅନେକ ଛୋଟମୋଟ କାମ କରିଛନ୍ତି । ପ୍ରଥମେ ସେ ରାସ୍ତାକଡ଼ରେ ଏକ ଦୋକାନ ପକାଇଥିଲେ । ଏହି ଦୋକାନରେ ବହି ଓ ବାଣ ବିକ୍ରି କରୁଥିଲେ । କେବଳ ସେତିକି ନୁହେଁ, ପରିବାରର ଭରଣପୋଷଣ ପାଇଁ ଘର ଘର ବୁଲି କ୍ଷୀର ବି ବିକ୍ରି କରୁଥିଲେ । ମାତ୍ର, ୧୬ ବର୍ଷ ବୟସରେ ନିଜ ବାପାଙ୍କୁ ହରାଇଥିଲେ । ବାପାଙ୍କ ନିଧନ ପରେ ୧୯୮୧ ମସିହାରେ କୁଏତ୍ ରେ ତାଙ୍କ ଦାଦାଙ୍କ ଦୋକାନରେ କାମ କରିବା ଆରମ୍ଭ କଲେ । ପ୍ରଥମେ ସେଠାରେ ସେ ଏକ ଟ୍ରେନି ସେଲ୍ସ ମ୍ୟାନ୍ ଭାବେ କାମ କରୁଥିଲେ । ପରେ ଏହି କାମରେ ପାରଙ୍ଗମ ହୋଇଯାଇଥିଲେ । କିନ୍ତୁ, ଦୁର୍ଭାଗ୍ୟବଶତଃ ୧୯୯୧ରେ ଯୁଦ୍ଧ କାରଣରୁ ସେ ମୁମ୍ୱାଇ ଫେରିବାକୁ ବାଧ୍ୟ ହୋଇଥିଲେ ।
ପରେ ୧୯୯୩ ମସିହାରେ ସେ ଲଞ୍ଚ କରିଥିଲେ ଜେନ୍ୟୁବ୍ ଗ୍ରୁପ୍ । ଯାହା କନଷ୍ଟ୍ରକସନ୍ ମ୍ୟାଟେରିଆଲ୍, ହୋମ୍ ଡେକୋର ଓ ରିୟଲ୍ ଇଷ୍ଟେଟ୍ ଡେଭଲପ୍ମେଣ୍ଟ କାରବାର ସହ ଜଡ଼ିତ । ୨୦୧୯ରେ ୧.୩ ବିଲିୟନ୍ ଆମେରିକା ଡଲାର ହାସଲ କରିଥିଲା ଏହି ଗ୍ରୁପ୍ । କ୍ରମଶଃ ଅଭିବୃଦ୍ଧି ହେବାରେ ଲାଗିଲା । ରିଜୱାନ୍ଙ୍କ ସମ୍ପତ୍ତି ୨.୫ ବିଲିୟନ୍ ଡଲାର ବୋଲି ୟୁଏଇର ବିତ୍ତ ମନ୍ତ୍ରାଣାଳୟ ୱେବ୍ସାଇଟ୍ରେ ଉଲ୍ଲେଖ ଅଛି । ଯାହା ଭାରତୀୟ ମୁଦ୍ରାରେ ପାଖାପାଖି ୨୦ ହଜାର ୮୩୦ କୋଟି ଟଙ୍କା ।
