କିଏଭ୍,୧୨/୦୪: ୟୁକ୍ରେନ ରାଜଧାନୀ କିଏଭରେ ଥିବା ଏକ ପ୍ରମୁଖ ପାୱାର ପ୍ଲାଣ୍ଟ ଉପରେ ରୁଷ୍ ମିସାଇଲ ଆକ୍ରମଣ କରିଛି । ଏଥିରେ ଟ୍ରିପିଲ୍ସ୍କା ଥର୍ମାଲ ପାୱାର ପ୍ଲାଣ୍ଟଟି ନଷ୍ଟ ହୋଇଯାଇଛି । ଏହି ପାୱାର ପ୍ଲାଣ୍ଟ କିଏଭ୍ ସମେତ ଚେରକାସି ଏବଂ ଜିଟୋମିର କ୍ଷେତ୍ର ପାଇଁ ସବୁଠୁ ବଡ଼ ବିଦ୍ୟୁତ୍ ଉତ୍ପାଦକ ଥିଲା । ୨ ବର୍ଷରୁ ଅଧିକ ସମୟ ଧରି ଲାଗି ରହିଥିବା ରୁଷ୍-ୟୁକ୍ରେନ୍ ଯୁଦ୍ଧରେ ରୁଷ୍ ଏବେ ଲଗାତର ୟୁକ୍ରେନ୍ର ଶକ୍ତି ବ୍ୟବସ୍ଥାକୁ ଟାର୍ଗେଟ କରି ଆକ୍ରମଣ କରୁଛି । ଗୁରୁବାର ସକାଳେ ରୁଷ୍ ୟୁକ୍ରେନ୍ର ବିଭିନ୍ନ ସ୍ଥାନକୁ ଟାର୍ଗେଟ କରି ୮୨ ମିସାଇଲ ଓ ଡ୍ରୋନ୍ ଛାଡ଼ିଥିଲା । ଏଥିରୁ ଅଧିକାଂଶ ମିସାଇଲ ଶକ୍ତି ବା ଏନର୍ଜୀ ସିଷ୍ଟମକୁ ଟାର୍ଗେଟ କରିଥିଲା । ରୁଷ୍ର ଏହି ଆକ୍ରମଣ ପରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ପାଶ୍ଚାତ୍ୟ ଦେଶଗୁଡ଼ିକ ଉପରେ ଅସନ୍ତୋଷ ପ୍ରକାଶ କରିଛନ୍ତି । ଏବେ ଆଖି ବନ୍ଦ କରି ନ ବସି ଅଧିକରୁ ଅଧିକ ଏୟାର ଡିଫେନ୍ସ ସିଷ୍ଟମ ଏବଂ ଅନ୍ୟ ସୁରକ୍ଷା ପ୍ରଣାଳୀ ଦେଶ ଆବଶ୍ୟକ କରୁଥିବା ଜେଲେନ୍ସ୍କି କହିଛନ୍ତି ।
ୟୁକ୍ରେନ୍ ବାୟୁସେନା କହିବା ଅନୁସାରେ, ୟୁକ୍ରେନ୍ ରୁଷ୍ର ୧୮ ମିସାଇଲ ଏବଂ ୩୯ ଡ୍ରୋନ୍କୁ ଖସାଇଦେଇଥିଲା । ତେବେ ୬ଟି ହାଇପରସୋନିକ କିନ୍ଜଲ ମିସାଇଲକୁ ୟୁକ୍ରେନ୍ ଖସାଇପାରି ନ ଥିଲା । ଏନର୍ଜୀ କମ୍ପାନୀ ସେଣ୍ଟ୍ରେନେରଗୋ ଅନୁସାରେ, ଆକ୍ରମଣ ଯୋଗୁ କମ୍ପାନୀ ୟୁକ୍ରେନ୍ରେ ଥିବା ଏହାର ୩ ପ୍ଲାଣ୍ଟରୁ ଶତପ୍ରତିଶତ ଶକ୍ତି ଉତ୍ପାଦନ ବନ୍ଦ ହୋଇଯାଇଛି । ୟୁକ୍ରେନ୍ର ଜାପୋରିଜିଝିଆରେ ଥିବା ୟୁରୋପର ସବୁଠୁ ବଡ଼ ନ୍ୟୁକ୍ଲିୟର ପାୱାରପ୍ଲାଣ୍ଟକୁ ରୁଷ୍ ନିୟନ୍ତ୍ରଣକୁ ନେବା ପରେ ଏହି ପୂର୍ବ ୟୁରୋପୀୟ ଦେଶ ଶକ୍ତି ସମସ୍ୟାର ସମ୍ମୁଖୀନ ହେଉଛି । ଏବେ ରୁଷ୍ ଲଗାତର ୟୁକ୍ରେନର ଏନର୍ଜୀ ସିଷ୍ଟମକୁ ଟାର୍ଗେଟ କରୁଥିବାରୁ ୟୁକ୍ରେନ୍ ସ୍ଥିତି ଗମ୍ଭୀର ହୋଇଛି ।
