ନୀଳଗିରି,୨୫/୯ : ଦୀର୍ଘ ବର୍ଷ ଧରି ଅଧା ପନ୍ତରିଆ ହୋଇ ପଡି ରହିଛି ପୋଲ କାମ। ଅଭିଯୋଗ କଲେ ଫଳ ଶୁନ। ପରିଣାମ ସ୍ୱରୂପ ବର୍ଷା ଦିନରେ ଜୀବନକୁ ବାଜି ଲଗାଇ ପାଣି ସୁଅରେ ପାର ହେଉଛନ୍ତି ଗ୍ରାମବାସୀ । ଏଭଳି ଘଟଣା ବାଲେଶ୍ଵର ଜିଲ୍ଲା ନୀଳଗିରି ଆଦିବାସୀ ବ୍ଲକ କେସିପୁର ପଞ୍ଚାୟତରେ ଦେଖିବାକୁ ମିଳିଛି । 

ସୂଚନାଯୋଗ୍ୟ ଯେ, ନୀଳଗିରି ଆଦିବାସୀ ବହୁଳ କେସିପୁର ପଂଚାୟତରେ ଅନେକ ସମସ୍ୟା ଲାଗି ରହିଛି । ବାରାଖେଦାରୁ ଭେଜିଗୋଠକୁ ସଂଯୋଗ କରୁଥିବା ତରତରୀ ନଦୀ ଉପରେ ଯାତାୟତ ପାଇଁ ବର୍ଷା ଦିନେ ଅନେକ ସମସ୍ୟା ଦେଖା ଦେଉଥିଲା । ପାହାଡ଼ ପାଣି ଆସୁଥିବାରୁ ପ୍ରବଳ ସୁଅରେ ଗାଁ ଯୋଗାଯାଗ ବିଛିନ୍ନ ହେଉଥିଲା । ଗ୍ରାମବାସୀ ବହୁ ଅଭିଯୋଗ ପରେ ଗ୍ରାମ୍ୟ ଉନ୍ନୟନ ବିଭାଗ ତରଫରୁ ୩/୪ ବର୍ଷ ପୂର୍ବେ ଏକ ପୋଲ ନିର୍ମାଣ କରିଥିଲା । କେତେ ଅନୁଦାନରେ କାମ ହେଉଛି ଏ ନେଇ ମଧ୍ୟ ଫଳକ ହୋଇନଥିଲା । ପୋଲର ଛାତ ପଡି ଅଧା ପନ୍ତରିଆ ଅବସ୍ଥାରେ ଛାଡି ଦେଇଥିବା ଦେଖାଯାଇଛି । ଉଇଙ୍ଗ ଓୟାଲ ନ କରି ଦୁଇ ପାର୍ଶ୍ଵରେ ମାଟି ନ ପଡିବାରୁ ପୋଲ ଉପରେ ଯାତାୟାତ ହୋଇ ପାରିନାହିଁ । 

ପୋଲ ତଳ ଦେଇ ଗ୍ରାମବାସୀ ଯାତାୟାତ କରୁଥିବାବେଳେ ବର୍ଷା ଦିନ ଆସିଲେ ସମସ୍ତଙ୍କ ପାଇଁ ମୁଣ୍ଡ ବିନ୍ଧାର କାରଣ ପାଲଟେ । ଗତକାଲି ରାତିଠାରୁ ପ୍ରବଳ ବର୍ଷା ଲାଗି ରହିଥିବାବେଳେ ପାହାଡ଼ ପାଣି ଆସିବାରୁ ପୋଲ ତଳ ଦେଇ ପାଣି ସୁଅ ଚାଲିଛି । ସ୍କୁଲ ଛାତ୍ରଛାତ୍ରୀଙ୍କଠାରୁ ଆରମ୍ଭ କରି ଗ୍ରାମବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ସୁଅ ପାଣିରେ ଭାସିଯିବାର ଭୟ ଥିବାବେଳେ ମିଳିତ ଭାବେ ହାତକୁ ହାତ ଧରି ପାଣିସୁଅରେ ଚାଲି ଚାଲି ପାର ହେଉଛନ୍ତି । କେତେବେଳେ ଯେ କେଉଁ ଅଘଟଣ ଘଟିବ ଏ ନେଇ ଗ୍ରାମବାସୀ ଭୟଭୀତ ହୋଇ ପଡିଛନ୍ତି । ଏଭଳି ସମସ୍ୟା ନେଇ ଗ୍ରାମବାସୀ ବିଧାୟକ ସନ୍ତୋଷ ଖଟୁଆଙ୍କ ଦୃଷ୍ଟିଆକର୍ଷଣ କରିବା ପରେ ସେ ଏଭଳି ସମସ୍ୟାର ସମାଧାନ ଖୁବଶୀଘ୍ର କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶକ ଦେଇଛନ୍ତି ।