ରାଜନଗର, ୨୫।୫: ଗହୀରମଥା ସାମୁଦ୍ରିକ ଅଭୟାରଣ୍ୟ ଅଲିଭ୍ରିଡ୍ଲେ କଇଁଛଙ୍କ ଅନ୍ତୁଡ଼ିଶାଳ ଭାବେ ପରିଚିତ । ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ଲକ୍ଷାଧିକ ଅଲିଭ୍ରିଡ୍ଲେ ଗହୀରମଥାର ନାସୀ-୨ରେ ଅଣ୍ଡାଦାନ କରିଥିଲେ । ଅଣ୍ଡାରୁ ଛୁଆ ଫୁଟିବା ପରେ ଏବେ ସେଗୁଡ଼ିକ ସମୁଦ୍ରମୁହାଁ ହୋଇଛନ୍ତି । ବନ ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁଯାୟୀ, ଗତ ୨୨ ତାରିଖ ପ୍ରାୟ ୨୫ ହଜାର ଅଲିଭ୍ରିଡ୍ଲେ କଇଁଛ ଛୁଆ ବସାରୁ ବାହାରି ସମୁଦ୍ରକୁ ଯାଇଥିବା ବେଳେ ୨୩ ତାରିଖ ପ୍ରାୟ ୭୫ହଜାର ଛୁଆ ସମୁଦ୍ର ଅଭିମୁଖେ ଯାଇଛନ୍ତି ।
ଇତିମଧ୍ୟରେ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇଛି । ଉଚ୍ଚ ଜୁଆର ମାଡ଼ି ଯାଉଥିବାରୁ ବହୁ ପରିମାଣରେ ଅଣ୍ଡା ନଷ୍ଟ ହେବାର ଆଶଙ୍କା ସୃଷ୍ଟି ହୋଇଛି । ଲଘୁଚାପଜନିତ ବର୍ଷା ହେଉଥିବାରୁ ବାଲି ଓଦା ହୋଇ କଠିନ ହୋଇଯାଉଛି । ତେଣୁ ବସାରୁ ବାହାରିବା ସେମାନଙ୍କ ପାଇଁ କଷ୍ଟକର ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି ।
