ଭୁବନେଶ୍ୱର, ୦୨/୦୨: ପୁଣି କଳିଙ୍ଗ ଷ୍ଟାଡିୟମକୁ ଫେରିଛି ହକି । ଶୀତୁଆ ସନ୍ଧ୍ୟାରେ ଦର୍ଶକ ବିଭୋର ହେବେ ହକି ଖେଳରେ । ଆସନ୍ତା ୩ ତାରିଖରୁ ଆରମ୍ଭ ହେବାକୁ ଯାଉଛି ଏଫ୍ଆଇଏଚ୍ ପ୍ରୋ ଲିଗ୍ ମ୍ୟାଚ୍ । ଉଭୟ ପୁରୁଷ ଓ ମହିଳା ଦଳ ଘରୋଇ ମ୍ୟାଚ୍ ଭୁବନେଶ୍ୱର ଓ ରାଉରକେଲାରେ ଖେଳିବେ ।
ପ୍ରଥମେ ମହିଳା ଦଳ ଆସନ୍ତା ୩ ତାରିଖରୁ ଚୀନ ବିପକ୍ଷରେ ଅଭିଯାନ ଆରମ୍ଭ କରିଛି । ଭାରତ ସମେତ ଚୀନ, ଆମେରିକା, ନେଦରଲାଣ୍ଡସ ଓ ଅଷ୍ଟ୍ରେଲିଆ ପରସ୍ପରକୁ ଭେଟିବେ । ଭାରତୀୟ ମହିଳା ଦଳ ୩ ତାରିଖରେ ଚୀନ, ୪ରେ ନେଦରଲାଣ୍ଡସ, ୭ରେ ଅଷ୍ଟ୍ରେଲିଆ ଓ ୯ରେ ଆମେରିକାକୁ ଭେଟିବ । ପୁଣି ୫ ଦଳ ରାଉରକେଲା ଗସ୍ତ କରି ବିର୍ସା ମୁଣ୍ଡା ଷ୍ଟାଡିୟମରେ ପରସ୍ପରକୁ ଭେଟିବେ । ରାଉରକେଲାରେ ଭାରତ ୧୨ ତାରିଖରେ ଚୀନକୁ, ୧୪ରେ ନେଦରଲାଣ୍ଡସ, ୧୭ରେ ଅଷ୍ଟ୍ରେଲିଆ ଏବଂ ୧୮ରେ ଆମେରିକାକୁ ଭେଟିବ।
ଭୁବନେଶ୍ୱରରେ ମହିଳା ଲିଗ୍ ଶେଷରେ ହେବା ପରେ ୧୦ ତାରିଖରୁ ପୁରୁଷ ଲିଗ ଆରମ୍ଭ ହେବ । ଭାରତ ୧୦ ତାରିଖ ପ୍ରଥମ ମ୍ୟାଚ୍ରେ ସ୍ପେନ, ୧୧ରେ ନେଦରଲାଣ୍ଡସ, ୧୫ରେ ଅଷ୍ଟ୍ରେଲିଆ ଏବଂ ୧୬ରେ ଆୟର୍ଲାଣ୍ଡକୁ ଭେଟିବ । ଏହାପରେ ସମସ୍ତ ଦଳ ରାଉରକେଲା ଗସ୍ତ କରିବେ । ବିର୍ସା ମୁଣ୍ଡାରେ ଭାରତ ୧୯ ତାରିଖରେ ସ୍ପେନ, ୨୧ରେ ନେଦରଲାଣ୍ଡସ, ୨୪ରେ ଅଷ୍ଟ୍ରେଲିଆ ଏବଂ ୨୫ରେ ଆୟର୍ଲାଣ୍ଡକୁ ଭେଟିବ । ପ୍ୟାରିସ ଅଲିମ୍ପିକ୍ସ ପୂର୍ବରୁ ଭାରତୀୟ ପୁରୁଷ ଦଳ ପ୍ରୋ ଲିଗ୍ରୁ ହିଁ ପ୍ରସ୍ତୁତି ଆରମ୍ଭ କରିବ ।
ମହିଳା ଦଳର ଜୋରଦାର ପ୍ରସ୍ତୁତି
ଆୟୋଜକ ଭାରତୀୟ ଦଳ ସହ ଆମେରିକା, ଚୀନ, ନେଦରଲାଣ୍ଡସ ଏବଂ ଅଷ୍ଟ୍ରେଲିଆ ଭୁବନେଶ୍ୱରରେ ପହଞ୍ଚି ଅଭ୍ୟାସ ଜାରି ରଖିଛନ୍ତି । କିନ୍ତୁ ବହୁ ପୂର୍ବରୁ ଭାରତୀୟ ଦଳ ପହଞ୍ଚି ପ୍ରସ୍ତୁତି ଚଳାଇଛି । ଏଥର ୨ ଜଣ ଓଡ଼ିଆ ଭାରତୀୟ ଦଳରେ ରହିଛନ୍ତି । ସେମାନେ ହେଲେ ଜ୍ୟୋତି ଛତ୍ରୀ ଓ ସୁନେଲିତା ଟପ୍ପୋ ସାମିଲ ରହିଛି । ଦୀପଗ୍ରେସ ଏକ୍କା ହକିରୁ ସନ୍ନ୍ୟାସ ନେବା ପରେ ଦୁଇ ଯୁବ ଖେଳାଳିଙ୍କୁ ହକି ପ୍ରଶଂସକ ବେଶ ଉତ୍ସାହିତ ରହିଛନ୍ତି ।
ପୁରୁଷ ଦଳରେ ଅମିତ
ପ୍ରୋ ଲିଗ୍ ପାଇଁ ପୁରୁଷ ଦଳ ମଧ୍ୟ ଘୋଷଣା ସରିଛି । ଏକମାତ୍ର ଓଡ଼ିଆ ଭାବେ ଅମିତରୋହିଦାସଙ୍କୁ ଦଳରେ ସୁଯୋଗ ମିଳିଛି । ଖୁବ ଶୀଘ୍ର ଭାରତୀୟ ଦଳ ଭୁବନେଶ୍ୱରରେ ପହଞ୍ଚି ଅଭ୍ୟାସ ଆରମ୍ଭ କରିବାର କାର୍ଯ୍ୟକ୍ରମ ରହିଛି ।
