କୋରାପୁଟ, ୬।୦୨: କୋରାପୁଟ ଜିଲ୍ଲା ଲକ୍ଷ୍ମୀପୁର ଥାନା ଉପର ମିଟିଙ୍ଗ ଗାଁ ନିକଟ ଘାଟିରୁ ଏକ ସାର ବୋଝେଇ ପିକଅପ୍ ଭ୍ୟାନ୍ ଦୁର୍ଘଟଣାଗ୍ରସ୍ତ । ଦୁର୍ଘଟଣାରେ ଭ୍ୟାନ୍ରୁ ଖସି ପଡ଼ି ୮ ଜଣ ଗୁରୁତର ଆହତ ହୋଇଛନ୍ତି । ଆହତମାନଙ୍କୁ ପ୍ରଥମେ ଲକ୍ଷ୍ମୀପୁର ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ କୋରାପୁଟ ଏସଏଲଏନକୁ ସ୍ଥାନାନ୍ତର କରାଯାଇଥିଲା ।
କାକିରିଗୁମା ସାପ୍ତାହିକ ହାଟରୁ ନିତ୍ୟବ୍ୟବହାର ଜିନିଷ ପତ୍ର କିଣି ସନ୍ଧ୍ୟାରେ ଏକ ପିକ୍ଅପ୍ ଭ୍ୟାନର ପଛପଟେ ବସି ଉପର ମିଟିଙ୍ଗ ଗ୍ରାମର ପ୍ରାୟ ୨୦ରୁ ଉର୍ଦ୍ଧ୍ୱ ପୁରୁଷ ଓ ମହିଳାମାନେ ନିଜ ଗାଁ ଉପରମିଟିଙ୍ଗକୁ ଫେରୁଥିଲେ । ଘାଟି ରାସ୍ତା ଯୋଗୁଁ ଅଧା ବାଟରେ ଭ୍ୟାନ ଚାଳକ ମହିଳାମାନଙ୍କୁ ଓହ୍ଲାଇ ଦେଇ ସାର ନେଉଥିବା ଲୋକଙ୍କୁ ଗାଡ଼ିରେ ଚଢ଼ାଇଥିଲେ । ହେଲେ ଉପରମିଟିଙ୍ଗ ଗ୍ରାମଠାରୁ ୨ କିଲୋମିଟର ଦୂର ଘାଟି ଉପରୁ ଭ୍ୟାନ୍ଟି ଭାରସାମ୍ୟ ହରାଇ ପ୍ରାୟ ୫୦ ଫୁଟ ତଳକୁ ଖସି ପଡ଼ିଥିଲା ।