ରାୟପୁର: ଛତିଶଗଡ଼ରେ ନୂଆ ମୁଖ୍ୟମନ୍ତ୍ରୀଙ୍କ ନାମ ଘୋଷଣା ହେବା ସହ ଉପମୁଖ୍ୟମନ୍ତ୍ରୀ କିଏ ହେବେ ସେନେଇ ଦଳ ପକ୍ଷରୁ ଘୋଷଣା କରାଯାଇଛି । ରାଜ୍ୟରେ ଦୁଇ ଜଣ ଉପମୁଖ୍ୟମନ୍ତ୍ରୀ ରହିବେ । ରାଜ୍ୟ ବିଜେପି ଅଧ୍ୟକ୍ଷ ଅରୁଣ ସାଓ ଏବଂ ବିଜୟ ଶର୍ମା  ଉପମୁଖ୍ୟମନ୍ତ୍ରୀ ହୋଇଥିବା ବେଳେ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂହ ବିଧାନସଭା ବାଚସ୍ପତି ହେବେ ବୋଲି ଜଣାପଡ଼ିଛି । 

ମୁଖ୍ୟମନ୍ତ୍ରୀ ଲାଗି ବିଜେପି ଆଦିବାସୀ ନେତାଙ୍କୁ ଚୟନ କରିଥିବା ବେଳେ ଉମୁଖ୍ୟମନ୍ତ୍ରୀ ପାଇଁ ଓବିସି ବର୍ଗ ଉପରେ ଧ୍ୟାନ ଦେଇଛି । ଅରୁଣ ସାଓ ଓବିସି ବର୍ଗରୁ ଆସିଛନ୍ତି । ସେପଟେ ବିଜୟ ଶର୍ମା କର୍ବଧାରୁ ବିଧାୟକ ନିର୍ବାଚିତ ହୋଇଛନ୍ତି । ସେ ମନ୍ତ୍ରୀ ମହମ୍ମଦ ମହମ୍ମଦ ଆକବରଙ୍କୁ ୩୯, ୫୯୨ ଖଣ୍ଡ ଭୋଟରେ ପରାସ୍ତ କରିଛନ୍ତି । ବିଜୟ ଶର୍ମା ରାଜ୍ୟ ବିଜେପିର ସାଧାରଣ ସଂପାଦକ ଅଛନ୍ତି ।

ଏହା ବ୍ୟତୀତ ସେ ବିଜେପି ଯୁବ ମୋର୍ଚ୍ଚା ଅଧ୍ୟକ୍ଷ ମଧ୍ୟ ରହିଥିଲେ । ତେବେ ୫୦ ବର୍ଷୀୟ ବିଜୟ ଶର୍ମା ପ୍ରଥମ ଥର ପାଇଁ ବିଧାୟକ ହୋଇଛନ୍ତି । ସେହିଭଳି ରାଜ୍ୟ ବିଜେପି ଅଧ୍ୟକ୍ଷ ଅରୁଣ ସାଓ ମଧ୍ୟ ପ୍ରଥମ ଥର ବିଧାନସଭା ନିର୍ବାଚନ ଜିତି ବିଧାୟକ ହୋଇଛନ୍ତି । 

ଅନ୍ୟପଟେ ୩ ଥର ମୁଖ୍ୟମନ୍ତ୍ରୀ ଥିବା ରମଣ ସିଂହଙ୍କୁ ବିଧାନସଭାର ବାଚସ୍ପତି ଭାବେ ଚୟନ କରାଯାଇଛି । ଏଥର ମଧ୍ୟ ସେ ମୁଖ୍ୟମନ୍ତ୍ରୀ ଦୌଡ଼ରେ ଥିଲେ । ହେଲେ ଦଳ ତାଙ୍କ ପରିବର୍ତ୍ତେ ବିଷ୍ଣୁଦେବ ସାଏଙ୍କ ଉପରେ ଭରସା କରିଛି । ଆଉ ଛତିଶଗଡ଼ର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବ ଦାୟିତ୍ବ ନେବାକୁ ଯାଉଛନ୍ତି ଆଦିବାସୀ ନେତା ବିଷ୍ଣୁଦେବ ସାଏ ।