ପାଟଣା, ୧୧/୦୨: ବିହାରରେ ପଲଟିବ କି ବାଜି ? ଆସନ୍ତାକାଲି ସୋମବାର ଠାରୁ ବିହାର ବିଧାନସଭାର ବଜେଟ୍ ଅଧିବେଶନ ଆରମ୍ଭ ହେବ । ଏଥିସହ ଗୃହରେ ସଂଖ୍ୟା ଗରିଷ୍ଠତାର ପ୍ରମାଣ ଦେବେ ମୁଖ୍ୟମନ୍ତ୍ରୀ ନୀତୀଶ କୁମାର । ଯାହାକୁ ନେଇ ପୁଣି ଥରେ ବିହାର ରାଜନୀତିରେ ହଲଚଲ୍ ଦେଖିବାକୁ ମିଳିଛି ।

ବହୁମତ ପରୀକ୍ଷା ପୂର୍ବରୁ ଆରଜେଡି-ଜେଡିୟୁ ଉଭୟ ଉଭୟଙ୍କ ବିଧାୟକଙ୍କୁ ଏକାଠି କରୁଛନ୍ତି । ଜେଡିୟୁ ବିଧାୟକ ଦଳ ବୈଠକ ଡାକିଥିବା ବେଳେ ତେଜସ୍ୱୀଙ୍କ ବାସଭବନରେ ଏକଜୁଟ୍ ହୋଇଛନ୍ତି ଆରଜେଡିର ୭୯ ବିଧାୟକ । ଏଥିସହ ହାଇଦ୍ରାବାଦରୁ ଫେରିଥିବା କଂଗ୍ରେସର ୧୯ ବିଧାୟକ ତେଜସ୍ୱୀଙ୍କ ବାସଭବନକୁ ଯାଉଛନ୍ତି ।

ଆରଜେଡିର ଦାବି ଅନୁସାରେ, ବହମୁତ ପରୀକ୍ଷା ପୂର୍ବରୁ ଖେଳ ହେବ । ଏହାରି ଭିତରେ ଜେଡିୟୁର ବିଧାନମଣ୍ଡଳ ବୈଠକରେ ସମସ୍ତ ୪୫ ବିଧାୟକ ସାମିଲ୍ ହୋଇ ନାହାନ୍ତି । କୁହା ଯାଉଛି, ଜେଡିୟୁର ୪ ବିଧାୟକ ବୀମା ଭାରତୀ, ସୁଦର୍ଶନ, ଦିଲୀପ ରାୟ ଓ ରିଙ୍କୁ ସିଂ ବୈଠକରେ ଯୋଗ ଦେଇ ନାହାନ୍ତି । ସେମାନଙ୍କ ମୋବାଇଲ୍ ବନ୍ଦ ଥିବା ଜଣାପଡ଼ିଛି ।

ବୈଠକରେ ବିଧାୟକଙ୍କୁ ନୀତୀଶ ସିଧା ସିଧା କହିଛନ୍ତି, ଗୃହରେ ଆମ ସମସ୍ତଙ୍କୁ ଏକଜୁଟ୍ ହେବାକୁ ପଡ଼ିବ । ସମସ୍ତେ ସମୟରେ ବିଧାନସଭାରେ ଉପସ୍ଥିତ ରହିବେ । କେହି ଉତ୍ତେଜନା ସୃଷ୍ଟି କରିବେ ନାହିଁ । ନିୟମ ଅନୁସାରେ ଗୃହ ପରିଚାଳନା ଲାଗି ସହଯୋଗୀ କରିବେ । ଭରସା ଅଛି, ଆମେ ବହୁମତ ହାସଲ କରିବା ।

ସୂଚନା ଅନୁସାରେ, ବିହାର ସରକାରରେ ମନ୍ତ୍ରୀ ହୋଇଥିବା ନିର୍ଦ୍ଦଳୀୟ ବିଧାୟକ ସୁମିତ୍ ସିଂ ବୈଠକ ଅଧାରୁ ପଳାଇଛନ୍ତି । ତେବେ ସେ କହିଛନ୍ତି, ଆମେ ସମସ୍ତେ ଏକାଠି ଅଛୁ । ଆସିନଥିବା ୪ ବିଧାୟକଙ୍କ ସହ ଆଲୋଚନା ଚାଲିଛି । ସେମାନେ ପହଞ୍ଚିବେ । ସେପଟେ ଜିତନରାମ ମାଞ୍ଝୀ ମଧ୍ୟ ବିଧାୟକଙ୍କ ସହ ବୈଠକ କରିଛନ୍ତି । ସମସ୍ତେ କହିଛନ୍ତି ଆମେ ଏନଡିଏ ସହ ଅଛୁ ।

ବିହାର ବିଧାନସଭାର ମୋଟ ଆସନ ସଂଖ୍ୟା ୨୪୩ । ବହୁମତ ହେଉଛି ୧୨୨ । ଯେତେବେଳେ କି ଏନଡିଏ ପାଖରେ ୧୨୮ ଆସନ ରହିଛି । ବିଜେପି ୭୮, ଜେଡିୟୁ ୪୫, ହିନ୍ଦୁସ୍ତାନୀ ଅୱାମ୍ ମୋର୍ଚ୍ଚା (HAM) ପାଖରେ ୪ ବିଧାୟକ ଓ ଜଣେ ନିର୍ଦ୍ଦଳୀୟ ସୁମିତ୍ ସିଂ ଅଛନ୍ତି । ଯେତେବେଳେ କି ବିରୋଧୀଙ୍କ ପାଖେ ୧୧୪ ସଦସ୍ୟ ଅଛନ୍ତି ।