ନୂଆଦିଲ୍ଲୀ,୧୦/୦୨: ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପରବର୍ତ୍ତୀ ୩ଟି ମ୍ୟାଚ୍ ପାଇଁ ଦଳ ଚୟନ ସ୍ଥଗିତ ରଖାଯାଇଛି । ଶୁକ୍ରବାର ଚୟନକମିଟି ଦଳ ଘୋଷଣା କରିବାର ଥିଲା । ମାତ୍ର ଚୟନ କମିଟି ଆହତ ସମସ୍ୟା ଦେଇ ଗତି କରୁଥିବା କେଏଲ ରାହୁଲ ଓ ରବିନ୍ଦ୍ର ଜାଡେଜାଙ୍କ ଫିଟ୍ନେସ ପ୍ରମାଣପତ୍ର ପାଇ ନଥିବାରୁ ଦଳ ଘୋଷଣାକୁ ସ୍ଥଗିତ ରଖିଛି । ଉଭୟ ପ୍ରଥମ ଟେଷ୍ଟରେ ଆହତ ହୋଇଥିଲେ ।
ସମ୍ପ୍ରତି ଉଭୟ ଜାତୀୟ କ୍ରିକେଟ୍ ଏକାଡେମୀରେ ଚିକିତ୍ସିତ ହେଉଛନ୍ତି । ତୃତୀୟ ଟେଷ୍ଟ ପୂର୍ବରୁ ଉଭୟ ସମ୍ପୂର୍ଣ୍ଣ ମ୍ୟାଚ୍ ଫିଟ୍ନେସ ଫେରିପାଇବେ ବୋଲି ଆଶା କରାଯାଉଥିଲା । ନିୟମ ଅନୁଯାୟୀ ଏନ୍ସିଏ ଚିକିତ୍ସିତ ହେଉଥିବା ଖେଳାଳିମାନଙ୍କ ଫିଟ୍ନେସ ପ୍ରମାଣପତ୍ର ନପାଇବା ପର୍ଯ୍ୟନ୍ତ ଚାୟନକମିଟି ସେମାନଙ୍କୁ ଦଳରେ ସ୍ଥାନ ଦେଇପାରିବେ ନାହିଁ ।
ବ୍ୟକ୍ତିଗତ କାରଣରୁ ପ୍ରଥମ ୨ଟି ଟେଷ୍ଟ ଖେଳିନଥିବା ବିରାଟ କୋହଲିଙ୍କ ପ୍ରତ୍ୟାବର୍ତ୍ତନ ନେଇ କୌଣସି ସୂଚନା ମିଳିନାହିଁ । ସେ ସମ୍ପୂର୍ଣ୍ଣ ସିରିଜରୁ ବାଦ ପଡ଼ିବା ଆଶଙ୍କା ରହିଛି । ମହମ୍ମଦ ସିରାଜ ତୃତୀୟ ଟେଷ୍ଟକୁ ଖେଳିବେ ଓ ଯଶପ୍ରୀତ ବୁମରାଙ୍କ ସହ ପେସ୍ ବିଭାଗ ସମ୍ଭାଳିବେ। ମାତ୍ର ଶେଷ ୨ଟି ଟେଷ୍ଟ ମଧ୍ୟରୁ ଯେକୌଣସି ଗୋଟିଏରୁ ବୁମରାଙ୍କୁ ବିଶ୍ରାମ ଦିଆଯିବ ।
