ନୂଆଦିଲ୍ଲୀ,୦୩/୦୯: ବେଆଇନ ଅର୍ଥ କାରବାର ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଶନିବାର ଜେଟ୍ ଏୟାର୍ୱେଜ୍ ପ୍ରତିଷ୍ଠାତା ନରେଶ ଗୋୟଲଙ୍କୁ ମୁମ୍ବାଇର ପିଏମ୍ଏଲ୍ଏ କୋର୍ଟରେ ହାଜର କରିଛି । କୋର୍ଟ ଗୋୟଲଙ୍କୁ ସେପ୍ଟେମ୍ବର ୧୧ ଯାଏ ଇଡି ହେପାଜତକୁ ପଠାଇଦେଇଛନ୍ତି । ଏବେ ଇଡି ଗୋୟଲଙ୍କୁ ପଚରାଉଚରା କରିବ । ସୂଚନାଯୋଗ୍ୟ, ଗୋୟଲଙ୍କ ଉପରେ ୫୩୮ କୋଟି ଟଙ୍କାର ବ୍ୟାଙ୍କ ଘୋଟାଲା ଅଭିଯୋଗ ରହିଛି ।
ଶୁକ୍ରବାର ଇଡି ୭୪ ବର୍ଷୀୟ ନରେଶ ଗୋୟଲଙ୍କୁ ପଚରାଉଚରା ପାଇଁ ଏହାର କାର୍ଯ୍ୟାଳୟ ଡକାଇଥିଲା । ଏହା ପରେ ବିଳମ୍ବିତ ରାତ୍ରିରେ ତାଙ୍କୁ ଗିରଫ କରାଯାଇଥିଲା । ପୂର୍ବରୁ ଇଡି ତାଙ୍କୁ ଦୁଇଥର ପଚରାଉଚରା ପାଇଁ ଡକାଇଥିଲା । କିନ୍ତୁ ସେ ହାଜର ହୋଇ ନ ଥିଲେ । ଗତବର୍ଷ ନଭେମ୍ବରରେ କାନାରା ବ୍ୟାଙ୍କ ନରେଶ ଗୋୟଲ, ତାଙ୍କ ପତ୍ନୀ ଅନିତାଙ୍କ ସହ ଅନ୍ୟମାନଙ୍କ ବିରୋଧରେ ଠକେଇ ଅଭିଯୋଗ ଆଣିଥିଲା । ଏହି ଅଭିଯୋଗ ପରେ ୨୦୨୩ ମେ’ରେ ସିବିଆଇ ସେମାନଙ୍କ ବିରୋଧରେ ଠକେଇ ମାମଲା ଦାଏର କରିଥିଲା । ପରେ ଇଡି ପକ୍ଷରୁ ମନିଲଣ୍ଡରିଂ ମାମଲା ଦାଏର ହୋଇଥିଲା ।
ସୂଚନାଯୋଗ୍ୟ, ଜେଟ୍କୁ ୮୪୮.୮୬ କୋଟି ଟଙ୍କାର କ୍ରେଡିଟ୍ ଲିମିଟ୍ ଏବଂ ଲୋନ୍ ଦିଆଯାଇଥିଲା, ଯେଉଁଥିରୁ ୫୩୮.୬୨ କୋଟି ଟଙ୍କା ବକେୟା ଅଛି । ଏହି ଆକାଉଣ୍ଟକୁ ୨୦୨୧ ଜୁଲାଇ ୨୯ରେ ‘ଫ୍ରଡ୍’ ଘୋଷିତ କରାଯାଇଛି । କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମେ’ ୫ରେ ଗୋୟଲଙ୍କ ମୁମ୍ବାଇସ୍ଥିତ ଅଫିସ୍ ସହ ୭ଟି ଠିକରାରେ ଛାନ୍ଭିନ୍ କରିଥିଲା । ନରେଶ ଗୋୟଲ, ଅନିତା ଗୋୟଲ ଏବଂ ଜେଟ୍ର ବରିଷ୍ଠ କାର୍ଯ୍ୟନିର୍ବାହୀ ଗୌରାଙ୍ଗ ସେଟ୍ଟିଙ୍କ ଘରେ ଚଢ଼ଉ ହୋଇଥିଲା । ସିବିଆଇ ଏଫ୍ଆଇଆର୍ ଆଧାରରେ ଇଡି ଜୁଲାଇ ୧୯ରେ ବେଆଇନ ଅର୍ଥ କାରବାର ମାମଲା ଦାଏର୍ କରିଥିଲା । ସେତେବେଳେ ଇଡି ବି ଗୋୟଲ ଏବଂ ତାଙ୍କ ସହାଯୋଗୀମାନଙ୍କ ଠିକଣାରେ ଚଢ଼ଉ କରିଥିଲା । କାନାରା ବ୍ୟାଙ୍କ ଅଭିଯୋଗ କରିଥିଲା ଯେ, ଜେଟ୍ ଏୟାର୍ୱେଜ୍ର ଫରେନ୍ସିକ୍ ଅଡିଟ୍ରୁ ଜଣାପଡ଼ିଛି ଯେ, ଜେଟ୍ ଏହା ସହ ଜଡ଼ିତ କମ୍ପାନିଗୁଡ଼ିକୁ ୧,୪୧୦.୪୧ କୋଟି ଟଙ୍କା ଟ୍ରାନ୍ସଫର କରିଛି । ଗୋୟଲ ପରିବାରର ବ୍ୟକ୍ତିଗତ ଖର୍ଚ୍ଚ ଯେପରି ଷ୍ଟାଫ ଦରମା, ଫୋନ୍ ବିଲ୍ ଏବଂ ଗାଡ଼ି ଖର୍ଚ୍ଚ ସବୁକିଛି ଜେଟ୍ ଅର୍ଥରେ ହେଉଥିଲା ।
ସୂଚନାଯୋଗ୍ୟ, ୧୯୯୩ରେ ଜେଟ୍ ଏୟାର୍ୱେଜ୍ର ସ୍ଥାପନା ହୋଇଥିଲା । ୨୦୧୯ରେ ଗୋୟଲ ଏୟାର୍ଲାଇନ୍ସର ଅଧ୍ୟକ୍ଷ ପଦ ଛାଡ଼ିଥିଲେ । ଆର୍ଥିକ ସଂକଟ ମଧ୍ୟରେ ୨୦୧୯ ଏପ୍ରିଲରୁ ଜେଟ୍ର ଉଡ଼ାଣ ବନ୍ଦ ପଡ଼ିଛି ।
