ଭୁବନେଶ୍ୱର,୦୩/୦୧: ହ୍ୟାଲୋ... ଗୋଟିଏ ରୋଷେୟା ଦରକାର ଥିଲା । ଆପଣଙ୍କ ପିଲା କେହି ଅଛନ୍ତି କି? ଆମର ଘରେ ନିର୍ବନ୍ଧ  ଅଛି...ସବୁ ଠିକ୍‌ ହୋଇଛି । କିନ୍ତୁ କେବଳ ରୋଷେୟା ଅସୁବିଧା ଅଛି । ସମସ୍ତେ ମନା କରୁଛନ୍ତି । ୪ ତାରିଖ ଅର୍ଥାତ୍‌ ରବିବାର ଦିନ  ପ୍ରବଳ ବାହାଘର ଅଛି । ବିବାହ ଋତୁ ଆସିଛି ।  ଭୁବନେଶ୍ୱରରେ ଜୋର୍‌ଦାର ବାହାଘର ବି  ହେଉଛି । କିଏ ମଣ୍ଡପ ବୁକିଂ କରିଛନ୍ତି ତ ଆଉ  କିଏ ମନ୍ଦିରରେ ବାହାଘର କରିବା ଲାଗି ସବୁ  ପ୍ରକାରର ପ୍ରସ୍ତୁତି ସାରିଲେଣି । ବହୁ ଲୋକ ନିଜ  ଘରେ ବାହାଘର ପ୍ରସ୍ତୁତି କରୁଥିବା ଜଣାପଡ଼ୁଛି ।  

ନିର୍ବନ୍ଧ ବି ଏହି ଦିନମାନଙ୍କରେ ଜୋର୍‌ଦାର୍‌  ହେବ । ଏତେ ସଂଖ୍ୟାରେ ବାହାଘର ଓ ନିର୍ବନ୍ଧ  ହେଉଛି ଯେ ଅନ୍ୟ କଛି ଭୋଜି କାର୍ଯ୍ୟକ୍ରମ  ଓ ନିର୍ବନ୍ଧ ଲାଗି ରୋଷେୟା ମିଳୁନାହାନ୍ତି ।  ଭୁବନେଶ୍ୱରରେ ପାଖାପାଖି ୩୫୦ରୁ ଅଧିକ  ସ୍ଥାନରେ ବାହାଘର ହେଉଥିବା କିମଶନରେଟ୍‌ ପୁଲିସର ଲାଇସେନ୍ସ ସେଲ୍‌ ପକ୍ଷରୁ ସୂଚନା  ମିଳିଛି । ଘରେ ହେଉଥିବା ବାହାଘର ସଂଖ୍ୟା ବି  ଅଲଗା । ଏମିତି ହିସାବ କଲେ ୫୦୦ରୁ ଅଧିକ  ବାହାଘର କେବଳ ଭୁବନେଶ୍ୱରରେ ହେଉଛି ।