କଟକ, ୦୭/୦୨: ଆମ ଓଡ଼ିଶା, ନବୀନ ଓଡ଼ିଶା ଯୋଜନାକୁ ଚ୍ୟାଲେଞ୍ଜ କରି ଦାଏର ହୋଇଥିବା ମାମଲା ଗୁଡ଼ିକରେ ହସ୍ତକ୍ଷେପ କରିବାକୁ ମନା କରିଛନ୍ତି ହାଇକୋର୍ଟ । ତେବେ ରାଜ୍ୟ ସରକାର ଚାହିଁଲେ ସରପଞ୍ଚ ଏବଂ ନିର୍ବାଚିତ ପ୍ରତିନିଧି ମାନଙ୍କୁ ଏଥିରେ ସାମିଲ୍ କରି ପାରିବେ ବୋଲି କହିଛନ୍ତି ହାଇକୋର୍ଟ ।

ଆମ ଓଡ଼ିଶା, ନବୀନ ଓଡ଼ିଶା ଯୋଜନାରେ ପ୍ରତି ଗ୍ରାମ ପଞ୍ଚାୟତକୁ ୫୦ ଲକ୍ଷ ଟଙ୍କା ଦେବା ପାଇଁ ଘୋଷଣା କରିଥିଲେ ରାଜ୍ୟ ସରକାର । ୨୦୨୨ ମସିହା ଜୁଲାଇ ମାସରୁ ଏହି ଯୋଜନା ଲାଗୁ ହୋଇଛି । ବିଡିଓଙ୍କ ଜରିଆରେ ଏହି ଯୋଜନା କାର୍ଯ୍ୟକାରୀ କରିବା ପାଇଁ ପ୍ରାବଧାନ ରହିଛି ।

ଯୋଜନା ମୁତାବକ ଗ୍ରାମୀଣ ଓଡ଼ିଶାର ସାଂସ୍କୃତିକ ଭିତ୍ତିଭୂମିର ବିକାଶ, ଗାଁ ଗୁଡିକର ପାରିପାର୍ଶ୍ଵିକ ବିକାଶ କରିବା ପାଇଁ ସରକାରୀ ସ୍ତରରେ ନିଷ୍ପତ୍ତି ହୋଇଛି । କିନ୍ତୁ ଏହି ଯୋଜନାରେ ସରପଞ୍ଚ ଓ ନିର୍ବାଚିତ ଜନ ପ୍ରତିନିଧି ମାନଙ୍କୁ ଉପେକ୍ଷା କରାଯାଇଛି ବୋଲି ଅଭିଯୋଗ କରି ଏକାଧିକ ଲୋକ ପ୍ରତିନିଧି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।

ରାଜ୍ୟର ଭିନ୍ନ ଭିନ୍ନ ଅଞ୍ଚଳର ଲୋକ ପ୍ରତିନିଧି ମାନଙ୍କ ତରଫରୁ ହାଇକୋର୍ଟରେ ପ୍ରାୟ ୪୦ରୁ ଊର୍ଦ୍ଧ୍ୱ ପିଟିସନ୍ ଦାଏର ହୋଇଥିଲା । ଯୋଜନାର କାର୍ଯ୍ୟକାରୀତା ବେଳେ ଲୋକ ପ୍ରତିନିଧି ମାନଙ୍କୁ ସାମିଲ୍ କରିବା, ପ୍ରକଳ୍ପ ଚୟନ ଲାଗି ସେମାନଙ୍କର ସମ୍ପୃକ୍ତି ରହୁ ବୋଲି ଆବେଦନ ଜରିଆରେ କୋର୍ଟଙ୍କ ଦୃଷ୍ଟି ଆକର୍ଷଣ କରିଥିଲେ ଆବେଦନକାରୀ । ସମସ୍ତ ଆବେଦନର ଏକତ୍ର ଶୁଣାଣି କରିଥିଲେ ହାଇକୋର୍ଟ । ତେବେ ରାଜ୍ୟ ସରକାରଙ୍କ ନିଷ୍ପତ୍ତି ଉପରେ ହସ୍ତକ୍ଷେପ କରିବାକୁ ହାଇକୋର୍ଟ ମନା କରି ଦେଇଛନ୍ତି ।