ଭୁବନେଶ୍ବର, ୦୨/୦୯: ଦିଗପହଣ୍ଡି ବିଧାୟକ ସୂର୍ଯ୍ୟ ନାରାୟଣ ପାତ୍ରଙ୍କ ବିୟୋଗ । ରାଜ୍ୟ ବିଧାନସଭାର ପୂର୍ବତନ ବାଚସ୍ପତି ସୂର୍ଯ୍ୟ ପାତ୍ରଙ୍କ ପରଲୋକ ହୋଇଯାଇଛି । ୭ ଥର ବିଧାୟକ ଥିଲେ ସୂର୍ଯ୍ୟ ନାରାୟଣ ପାତ୍ର । ମୋହନାରୁ ୪ ଥର ଏବଂ ଦିଗପହଣ୍ଡିରୁ ସେ ୩ ଥର ବିଧାୟକ ରହିଛନ୍ତି ।  ଏକାଧିକ ଥର ମନ୍ତ୍ରୀ ଭାବେ ନିଜର କାର୍ଯ୍ୟ ସଂପାଦନ କରିଥିଲେ ସୂର୍ଯ୍ୟ ନାରାୟଣ ପାତ୍ର । ସେ ଶକ୍ତିି, ଜଙ୍ଗଲ ଓ ପରିବେଶ ଏବଂ ରାଜସ୍ବ ମନ୍ତ୍ରୀ ଭାବେ ବେଶ ଖ୍ୟାତି ଅର୍ଜନ କରିଥିଲେ । ବିଜୁ ପଟ୍ଟନାୟକଙ୍କ ମନ୍ତ୍ରୀମଣ୍ଡଳରେ ସ୍ଥାନ ପାଇଥିଲେ  ସୂର୍ଯ୍ୟ ପାତ୍ର । ପ୍ରଥମେ ମତ୍ସ୍ୟ ଓ ପଶୁ ସଂପଦ ବିଭାଗର ମନ୍ତ୍ରୀ ହୋଇଥିଲେ ।

୭୫ ବର୍ଷ ବୟସରେ ତାଙ୍କର ପରଲୋକ ଘଟିଛି । ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଶେଷ ନିଶ୍ବାସ ତ୍ୟାଗ କରିଛନ୍ତି ସୂର୍ଯ୍ୟ ନାରାୟଣ ପାତ୍ର । କିଛି ଦିନ ଧରି ସେ ଅସୁସ୍ଥ ଥିଲେ । ଓଡ଼ିଶାର ଜଣେ ଟାଣୁଆ ନେତା ଭାବେ ସୂର୍ଯ୍ୟ ପାତ୍ରଙ୍କୁ ଜଣାଯାଏ । ବିଜେଡି ସରକାରରେ ସେ ୫ ଥର ବିଧାନସଭାକୁ ନିର୍ବାଚିତ ହୋଇଛନ୍ତି । ୧୯୯୦ରେ ପ୍ରଥମ ଥର ସେ ଜନତା ଦଳରୁ ବିଧାୟକ ହୋଇଥିଲେ । ୨୦୧୯ରୁ ୨୦୨୨ ଯାଏ ବିଧାନସଭାର ବାଚସ୍ପତି ହୋଇଥିଲେ ସୂର୍ଯ୍ୟ ପାତ୍ର । 

ଛାତ୍ର ଜୀବନରୁ ରାଜନୀତି ଆରମ୍ଭ କରିଥିଲେ ସୂର୍ଯ୍ୟ ନାରାୟଣ ପାତ୍ର ।  ଗଞ୍ଜାମ ଜିଲ୍ଲା ବ୍ରହ୍ମପୁରର ସୂର୍ଯ୍ୟନାରାୟଣ ପାତ୍ର ୧୯୪୮ ମସିହା ଡିସେମ୍ବର ୨୪ ତାରିଖରେ ଜନ୍ମଗ୍ରହଣ କରିଥିଲେ । ସେ ବିଏସ୍‌ସି ଓ ଏଲଏଲବି ପରେ ଓକିଲାତି କରିଥିଲେ । ପରେ ସାମାଜସେବା ଓ କ୍ରମେ ରାଜନୀତିରେ ଯୋଗ ଦେଇଥିଲେ ସୂର୍ଯ୍ୟ ପାତ୍ର । କାଉନସିଲରରୁ ବାଚସ୍ପତି ଯାଏଁ ତାଙ୍କର ରାଜନୈତିକ କ୍ୟାରିୟର ଲମ୍ବିଥିଲା । ୧୯୭୭ ମସିହାରେ ବ୍ରହ୍ମପୁର ମ୍ୟୁନିସିପାଲିଟି କାଉନସିଲର ହୋଇଥିଲେ ସୂର୍ଯ୍ୟ ପାତ୍ର। କ୍ରମାଗତ ୭ ଥର ବିଧାୟକ ହୋଇଥିଲେ ସୂର୍ଯ୍ୟ।