ନୂଆଦିଲ୍ଲୀ,୦୮/୦୨: ଏଥର ଲୋକସଭା ନିର୍ବାଚନରେ ବିଜେପି ଅଧିକାଂଶ ରାଜ୍ୟରେ ଭଲ ପ୍ରଦର୍ଶନ କରିବ । ଗୁଜରାଟରେ ଦଳ ସମସ୍ତ ୨୬ ଆସନରେ ବିଜୟ ଲାଭ କରିବ । ବିହାରରେ ବିଜେପି ନେତୃତ୍ୱାଧୀନ ଏନ୍ଡିଏ ମୋଟ ୪୦ ଲୋକସଭା ଆସନରୁ ୩୫ଟି ହାତେଇନେବ । ଅନ୍ୟପକ୍ଷରେ ବିହାରରେ ଇଣ୍ଡିଆ ମେଣ୍ଟ ଭାଗରେ ମାତ୍ର ୫ଟି ଆସନ ପଡ଼ିବ । ଟାଇମ୍ସନାଓ-ମେଟ୍ରିଜ୍ ଏନ୍ସି ସର୍ଭେ ରିପୋର୍ଟରୁ ଏହା ଜଣାପଡ଼ିଛି ।
ସର୍ଭେ ରିପୋର୍ଟ ମୁତାବକ ପଶ୍ଚିମବଙ୍ଗରେ ଶାସକ ଦଳ ଟିଏମ୍ସି (ତୃଣମୂଳ କଂଗ୍ରେସ) ସର୍ବାଧିକ ୨୬ ଆସନ ପାଇବାକୁ ଥିବା ବେଳେ ବିଜେପି ୧୫ ପାଇବ । କଂଗ୍ରେସ ଓ ବାମ ମେଣ୍ଟ ଭାଗରେ ମାତ୍ର ଗୋଟିଏ ଆସନ ପଡ଼ିବ । ଓଡ଼ିଶାରେ ବି ବିଜେପିର ପ୍ରଦର୍ଶନ ଉତ୍ତମ ରହିବ । ଦଳ ଏଠାରେ ମୋଟ ୨୧ ଆସନ ମଧ୍ୟରୁ ୧୧ଟି ଜିତିବ । ଶାସକ ଦଳ ବିଜେଡି ୯ଟି ପାଇବାକୁ ଥିବା ବେଳେ ଗତ ଥର ଭଳି କଂଗ୍ରେସ ସେଇ ଗୋଟିଏ ଆସନରେ ସୀମିତ ରହିଯିବ । ୨୦୧୯ ଲୋକସଭା ନିର୍ବାଚନରେ ଓଡ଼ିଶାରେ ବିଜେଡି ୧୨ ଆସନରେ ଜିତିଥିଲା ବେଳେ ବିଜେପି ୮ ଏବଂ କଂଗ୍ରେସ ଗୋଟିଏ ଆସନରେ ବିଜୟୀ ହୋଇଥିଲା ।
ମହାରାଷ୍ଟ୍ରର ୪୮ ଲୋକସଭା ଆସନରୁ ଏନ୍ଡିଏ ୩୯ ପାଇବାକୁ ଥିବା ବେଳେ ‘ଇଣ୍ଡିଆ’ ମେଣ୍ଟ ୯ଟି ଆସନ ପାଇବ । ଆନ୍ଧ୍ର ପ୍ରଦେଶଷରେ କିନ୍ତୁ ବିଜେପି ହାତ ପୁଣି ଖାଲି ରହିବ । ରାଜ୍ୟର ମୋଟ ୨୫ ଲୋକସଭା ଆସନରୁ ଶାସକ ଦଳ ୱାଇଏସ୍ଆର୍ସିପି ୧୯ଟିରେ ଜିତିବାକୁ ଥିବା ବେଳେ ଟିଡିପି-ଜନସେନା ମେଣ୍ଟ ୬ଟି ଆସନ ହାତେଇ ପାରନ୍ତି । ୨୦୧୯ ନିର୍ବାଚନରେ ୱାଇଏସ୍ଆର୍ସିପି ୨୨ଟି ଆସନ ଜିତିଥିଲା ବେଳେ ଟିଡିପି ମାତ୍ର ୩ଟି ପାଇଥିଲା । ବିଜେପି କିଛି ପାଇ ନ ଥିଲା ।
