ରାଞ୍ଚି,୦୫/୦୨: ଝାଡ଼ଖଣ୍ଡର ଚମ୍ପଇ ସରକାର ସୋମବାର ବିଧାନସଭାରେ ନିଜ ବହୁମତ ପ୍ରମାଣ ଦେବ । ଏହା ପୂର୍ବରୁ ରବିବାର ସନ୍ଧ୍ୟାରେ ଜେଏମ୍ଏମ୍ ଓ କଂଗ୍ରେସ ମହାମେଣ୍ଟର ବିଧାୟକମାନେ ହାଇଦ୍ରାବାଦରୁ ରାଞ୍ଚି ଫେରିଛନ୍ତି । ବିଧାୟକଙ୍କୁ ନେଇ ଏକ ଚାର୍ଟର୍ଡ ବିମାନ ଅପରାହ୍ନ ୪ଟାରେ ହାଇଦ୍ରାବାଦରୁ ଉଡ଼ାଣ ଭରି ରାଞ୍ଚିରେ ପହଞ୍ଚିଥିଲା ।
ଫ୍ଲୋର୍ ଟେଷ୍ଟକୁ ନେଇ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍)ର କେନ୍ଦ୍ରୀୟ ମହାସଚିବ ସୁପ୍ରିୟୋ ଭଟ୍ଟାଚାର୍ଯ୍ୟ କହିଛନ୍ତି, ମହାମେଣ୍ଟ ସରକାରଙ୍କ ପାଖରେ ୪୩ ବିଧାୟକଙ୍କ ଲିଖିତ ପ୍ରମାଣ ରହିଛି । ବହୁମତ ପ୍ରମାଣିତ ହେବା ପରେ ଫେବ୍ରୁଆରୀ ୭ରେ ମନ୍ତ୍ରିମଣ୍ଡଳ ସମ୍ପ୍ରସାରଣ କରାଯିବ । ରାଜ୍ୟପାଳଙ୍କ ଅନୁମତିକ୍ରମେ ବିଧାନସଭାରେ ଦୁଇଦିନିଆ ଅଧିବେଶନ ଡକାଯାଇଛି । ଫେବ୍ରୁଆରୀ ୫ ଓ ୬ରେ ଏହି ଅଧିବେଶନ ବସିବ । ଅଧିବେଶନରେ ଫ୍ଲୋର୍ ଟେଷ୍ଟ କରାଯିବ ।
ମୁଖ୍ୟମନ୍ତ୍ରୀ ଚମ୍ପଇ ସୋରେନ୍ ନିଜ ମନ୍ତ୍ରିମଣ୍ଡଳରେ ନୂଆ ଚେହେରାଙ୍କୁ ନେଇପାରନ୍ତି । ନୂଆ ଚେହେରା ତାଲିକାରେ କଂଗ୍ରେସର ଦୀପିକା ପାଣ୍ଡେଙ୍କ ନାମ ରହିଛି । ଏହାଛଡ଼ା ବସନ୍ତ ସୋରେନ ଏବଂ ସୀତା ସୋରେନ ବି ମନ୍ତ୍ରୀ ହୋଇପାରନ୍ତି । ଦୁଇ ଉପ ମୁଖ୍ୟମନ୍ତ୍ରୀ ରହିବେ । ଏଥିରେ କଂଗ୍ରେସ ପଟୁ ଆଲମଗିର ଆଲମ ଏବଂ ଜେଏମ୍ଏମ୍ରୁ ସୀତା ସୋରେନଙ୍କ ନାମ ସାମିଲ । କୃଷିମନ୍ତ୍ରୀ ରହିଥିବା ବାଦଲ ପତ୍ରଲେଖ ଓ ସ୍ୱାସ୍ଥ୍ୟମନ୍ତ୍ରୀ ବନ୍ନା ଗୁପ୍ତାଙ୍କୁ ହଟାଯାଇପାରେ ।
ଉଲ୍ଲେଖଯୋଗ୍ୟ, ୬୦୦ କୋଟି ଟଙ୍କାର ଜମି ଦୁର୍ନୀତି ମାମଲାରେ ହେମନ୍ତ ସୋରେନ୍ ଜାନୁଆରୀ ୩୧ରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଇଡି ଦ୍ୱାରା ତାଙ୍କୁ ଗିରଫ କରାଯିବା ପରେ ତାଙ୍କ ସ୍ଥାନରେ ୬୮ ବର୍ଷୀୟ ଚମ୍ପଇ ସୋରେନଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା । ସେ ଫେବ୍ରୁଆରୀ ୨ରେ ଝାଡ଼ଖଣ୍ଡର ୧୨ତମ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏହାପରେ ବହୁମତ ପ୍ରମାଣ ପାଇଁ ରାଜ୍ୟପାଳ ସି ପି ରାଧାକ୍ରଷ୍ଣନ ଚମ୍ପଇ ସରକାରକୁ ୧୦ ଦିନ ସମୟ ଦେଇଥିଲେ । ଏଭଳି ସ୍ଥିତିରେ ଘୋଡ଼ା ବେପାର ଭୟରେ ଜେଏମ୍ଏମ୍-କଂଗ୍ରେସର ୩୭ ବିଧାୟକଙ୍କୁ ହାଇଦ୍ରାବାଦ ସ୍ଥାନାନ୍ତର କରାଯାଇଥିଲା ।