ବିଶ୍ୱନାଥପୁର, ୫।୦୨: ଭବାନୀପାଟଣାରୁ ବିଶାଖାପାଟଣାକୁ ସଂଯୋଗ କରୁଥିବା ୬ ନମ୍ବର ଜାତୀୟ ରାଜପଥରେ ଏକ ମର୍ମନ୍ତଦ ଦୁର୍ଘଟଣା । ସୂଚନା ଅନୁଯାୟୀ, ଲାଞ୍ଜିଗଡ଼ ବ୍ଲକ୍ ପୋଖରୀବନ୍ଧ ଗ୍ରାମର ୩୭ ବର୍ଷୀୟ ଅରୁଣ ଧଙ୍ଗଡ଼ାମାଝୀ ଏବଂ ୩୫ ବର୍ଷୀୟ ପଦ୍ମଲୋଚନ ପାତ୍ର ଦୁଇଜଣ ନର୍ଲା ଥାନା ଅଧିନସ୍ଥ ଗୋରକୋଲ ଗାଁକୁ ବାଇକ ଯୋଗେ ମିସ୍ତ୍ରୀ କାମ କରିବାକୁ ଯାଉଥିଲେ । ଯିବା ସମୟରେ ଲାଞ୍ଜିଗଡ଼ ବ୍ଲକ୍ ପୋଖରୀବନ୍ଦ ଗ୍ରାମପଞ୍ଚାୟତ ଅଧିନସ୍ଥ ଢେପଗୁଡ଼ା ଜଙ୍ଗଲ ନିକଟରେ ରାୟଗଡ଼ା ପଟୁ ଆସୁଥିବା ଏକ କଣ୍ଟେନର ଦ୍ରୁତଗତିରେ ଆସି ପଛପଟେ ମାଡ଼ିଯିବା ଫଳରେ ଘଟଣାସ୍ଥଳରେ ହିଁ ଦୁଇଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । 

ଦୁଇଜଣକ ଉପରେ ଟ୍ରକ୍ ମାଡ଼ିଯାଇଥିବା ବେଳେ ଟ୍ରକ୍‌ଟି ମଧ୍ୟ ଓଲଟି ପଡ଼ିଛି । ଘଟଣାସ୍ଥଳରୁ ଡ୍ରାଇଭର ଫେରାର ଥିବା ସୂଚନା । ତେବେ ଘଟଣାସ୍ଥଳରେ ବିଶ୍ୱନାଥପୁର ଓ ଲାଞ୍ଜିଗଡ଼ ପୁଲିସ ପହଞ୍ଚି ତଦନ୍ତ କରୁଥିବାବେଳେ ଭବାନୀପାଟଣା ବିଶାଖାପାଟଣାକୁ ସଂଯୋଗ କରୁଥିବା ରାସ୍ତାକୁ ଲୋକେ ଅବରୋଧ କରିଥିବାରୁ ଶହଶହ ଗାଡ଼ି ଅଟକି ରହିଛି ।