ନୂଆଦିଲ୍ଲୀ, ୨।୯: ଆଜିର ଡିଜିଟାଲ ଯୁଗରେ ଲୋକଙ୍କଠାରେ ବହି ପଢ଼ିବାର ଆଗ୍ରହ ହ୍ରାସ ପାଉଥିବାର ଦେଖାଯାଉଛି । ତେଣୁ ପିଲା ଲାଇବ୍ରେରୀ ଯିବାକୁ ବିଶେଷ ପସନ୍ଦ କରୁନାହାନ୍ତି । ପିଲାଙ୍କୁ ପଢ଼ାରେ ଆଗ୍ରହ ଆଣିବାକୁ ବର୍ତ୍ତମାନ ବିଭିନ୍ନ ସ୍ଥାନରେ ଭ୍ରାମ୍ୟମାଣ ପାଠାଗାର ନିର୍ମାଣ କରାଯାଉଛି । ଏହି କ୍ରମରେ ଦିଲ୍ଲୀରେ ଭ୍ରାମ୍ୟମାଣ ପାଠାଗାରର ସୁବିଧା ରହିଛି । ଯାହା ୧୯୫୩ ମସିହାରୁ ପରିଚାଳିତ ହୋଇଆସୁଛି । ଏହା ଦିଲ୍ଲୀ ପବ୍ଲିକ୍ ଲାଇବ୍ରେରୀ (ଡିପିଏଲ୍) ନାଁରେ ପରିଚିତ । ଦିଲ୍ଲୀର ୭୦ଟି ସ୍ଥାନରେ ୮ଟି ବସ୍କୁ ନେଇ ଏହି ଲାଇବ୍ରେରୀ ପରିଚାଳିତ । ଯେଉଁଥିରେ ୬ ହଜାର ସଦସ୍ୟ ଓ ହଜାରେ ପୁସ୍ତକ ରହିଛି । ଦୀର୍ଘ ୭୦ ବର୍ଷ ଧରି ଏହି ପାଠାଗାର ସହରରେ ବହି ପଢ଼ାର ଭିନ୍ନ ଏକ ସଂସ୍କୃତି ସୃଷ୍ଟି କରିବାରେ ସଫଳ ହୋଇଛି । ଯାହା ଏବେ ସୁଦ୍ଧା ଜାରି ରହିଛି ।
ପ୍ରତିଟି ବସ୍ରେ ବିଭିନ୍ନ ବିଷୟରେ ଭିନ୍ନ ଭିନ୍ନ ପ୍ରକାର ବହି ରହିଛି । ଏଥିରୁ ଅନ୍ୟତମ ବ୍ରେଲି ଲାଇବ୍ରେରୀ । ଏହି ବ୍ରେଲି ପାଠାଗାର ଦିଲ୍ଲୀର ୧୨ଟି ସ୍ଥାନରେ ବୁଲିଥାଏ । ଏହି ମୋବାଇଲ୍ ପାଠାଗାର ସହିତ ସଂଶ୍ଳିଷ୍ଟ ଥିବା ନବୀନ ଆହୁଜା କୁହନ୍ତି, ଯଦିଓ ବର୍ତ୍ତମାନ ଯୁଗରେ ଡିଜିଟାଇଜେସନ୍ ଗୁରୁତ୍ୱପୂର୍ଣ୍ଣ, ତଥାପି ହାତରେ ବହି ଧରି ପଢ଼ିବା ପାଠକଙ୍କୁ ଦିବ୍ୟ ଅନୁଭୂତି ପ୍ରଦାନ କରେ । ତେବେ ପ୍ରତ୍ୟେକ ଗଳିରେ ଥିବା ଏହି ମୋବାଇଲ୍ ଲାଇବ୍ରେରୀକୁ ନିୟମିତ ୨୦ରୁ ୩୦ ପିଲା ଆସିଥାନ୍ତି । ଏହି ପାଠାଗାରରୁ ୧୪ ଦିନ ବହି ନେବାର ଅବଧି ରହିଛି । ବିଶେଷ କରି ପ୍ରତିଯୋଗିତା ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଅଧିକାଂଶ କଲେଜ ଛାତ୍ରଛାତ୍ରୀ ଏଠାରୁ ବହି ନେଇଥାନ୍ତି ।
କେବଳ ଏତିକି ନୁହେଁ, ସହରର ବସ୍ତିଗୁଡ଼ିକରେ ରହୁଥିବା ଗରିବ ପିଲା ତଥା ଭଲ ବହିଟିଏ ପଢ଼ିବାରୁ ବଞ୍ଚିତ ହେଉଥିବା ପିଲାଙ୍କ ପାଇଁ ଏହି ଭ୍ରାମ୍ୟମାଣ ପାଠାଗାର ବେଶ୍ ଉପଯୋଗୀ ସାବସ୍ତ୍ୟ ହୋଇଛି । ସେହିପରି ପିଲାମାନେ ଏହାକୁ ‘ଲାଇବ୍ରେରୀ ୱାଲି ବସ୍’ ବୋଲି କହିଥାନ୍ତି । ଏହି ପାଠାଗାରର ସଦସ୍ୟ ଥିବା ଲୋକ ନିଜ ପିଲା ତଥା ନାତି ନାତୁଣୀଙ୍କୁ ଭ୍ରାମ୍ୟମାଣ ପାଠାଗାରର ସଦସ୍ୟ ହେବା ପାଇଁ ପ୍ରୋତ୍ସାହିତ କରିଥାନ୍ତି । କଲ୍କଜି, ରୋହିଣୀ ସେକ୍ଟର ୫, ୫, ୧୫ସ ଶକ୍ତିନଗର, କମଲାନଗରର ପାଠକମାନେ ପ୍ରତି ସପ୍ତାହରେ ମୋବାଇଲ୍ ଲାଇବ୍ରେରୀ ପରିଭ୍ରମଣରେ ଆସନ୍ତି ।
