ଥିରୁଅନନ୍ତପୁରମ୍: କେରଳର କନ୍ନୁର ଏୟାରପୋର୍ଟରେ ବିଚିତ୍ର ଘଟଣା ଦେଖିବାକୁ ମିଳିଛି । ଜଣେ ଏୟାର ହୋଷ୍ଟେସ୍ ରେକ୍ଟମ (ମଳାଶୟ)ରେ ସୁନା ଚୋରା ଚାଲାଣ କରି ଧରାପଡ଼ିଛନ୍ତି । ମିଳିଥିବା ସୂଚନା ଅନୁସାରେ, ଶୁକ୍ରବାର ଦିନ ଏୟାର ହୋଷ୍ଟେସ୍ ଜଣଙ୍କ ପ୍ରାୟ ୧ କେଜି ଓଜନର ସୁନା ଆଣିଥିବା ବେଳେ ତାଙ୍କୁ ରେଭେନ୍ୟୁ ଇଣ୍ଟେଲିଜେନ୍ସ (ଡିଆରଆଇ) ଟିମ୍ କନ୍ନୁର ଏୟାର ପୋର୍ଟରେ କାବୁ କରିଛି । ଧରାପଡ଼ିଥିବା ଏୟାର ହୋଷ୍ଟେସ୍ ସୁରଭୀ ଖାତୁନ ବୋଲି ଜଣାପଡ଼ିଛି ।
ଡିଆରଆଇ କୋଚିନର ଗୁଇନ୍ଦା ସୂଚନା ଆଧାରରେ ଡିଆରଆଇ କନ୍ନୁରର ଅଧିକାରୀମାନେ ମଧ୍ୟ ଗୋଟିଏ ବିମାନ କମ୍ପାନୀର କ୍ରୁ ସଦସ୍ୟ ସୁରଭୀ ଖାତୁନଙ୍କୁ ଯାଞ୍ଚ କରିଥିଲେ। ତାଙ୍କ ଘର କୋଲକାତାରେ ହୋଇଥିବା ବେଳେ ସେ ମସ୍କାଟରୁ ସୁନା ଧରି କନ୍ନୁର ଏୟାରପୋର୍ଟରେ ମେ’ ୨୮ରେ ପହଞ୍ଚିଥିଲେ।
ପ୍ରଥମେ ତାଙ୍କୁ ଯାଞ୍ଚ କରାଯାଇଥିଲା। ହେଲେ ସେ ଏଥିରେ ସହଯୋଗ କରିବାକୁ ରାଜି ହୋଇନଥିଲେ । ପରେ ଡିଆରଆଇ ଟିମ୍ ତାଙ୍କୁ ଯାଞ୍ଚ କରିବା ପରେ ଶେଷରେ ତାଙ୍କ ମଳଦ୍ୱାରରୁ ୯୬୦ ଗ୍ରାମର ତରଳ ସୁନା ମିଳିଥିଲା। ସୁନା ଚୋରା ଚାଲାଣ କରୁଥିବା ଅଭିଯୋଗରେ ତାଙ୍କୁ ଗିରଫ କରାଯାଇଛି । ଏହାପରେ ସୁରଭୀଙ୍କୁ କୋର୍ଟରେ ହାଜର କରାଯାଇ ୧୪ ଦିନିଆ ରିମାଣ୍ଡରେ ଅଣାଯାଇଛି । ସେପଟେ ପୂର୍ବରୁ ସେ ସୁନା ଚୋରା ଚାଲାଣରେ ସଂପୃକ୍ତ ଥିଲେ କି ନାହିଁ ତାହା ଯାଞ୍ଚ କରାଯାଉଥିବା ଜଣାପଡ଼ିଛି ।
