ନରସିଂହପୁର/ବଡମ୍ବା,୦୧/୦୪: ବଡମ୍ବା-ନରସିଂହପୁର ନିର୍ବାଚନ ମଣ୍ଡଳୀ ପାଇଁ ବିଜେଡି ଏଥର ବିଧାୟକ ଦେବୀ ମିଶ୍ରଙ୍କୁ ବିଜେଡି ପୁଣି ପ୍ରାର୍ଥୀ ଘୋଷଣା କରିଛି । ମାତ୍ର ଏ ପର୍ଯ୍ୟନ୍ତ ବିଜେପି ଓ କଂଗ୍ରେସ ପ୍ରାର୍ଥୀ ଘୋଷଣା କରିନାହାନ୍ତି । ଯାହାକୁ ନେଇ ସମର୍ଥକଙ୍କ ମଧ୍ୟରେ ଦ୍ୱନ୍ଦ୍ୱ ବଢୁଛି । ବିଶେଷକରି ମୁଖ୍ୟ ବିରୋଧୀ ଦଳ ବିଜେପିର ପ୍ରାର୍ଥୀ ଚୟନକୁ ନେଇ ସସ୍ପେନ୍ସ ଲାଗିରହିଛି । ମଇଦାନରେ ଏବେ ଦୁଇ ଜଣ ପ୍ରାର୍ଥୀ ରହିଛନ୍ତି । ପୂର୍ବତନ ବିଧାୟକ ପ୍ରାର୍ଥୀ ବିଜୟ ଦଳବେହେରା ଓ ନୂଆ ମୁହଁ ସମ୍ବିତ ତ୍ରିପାଠୀଙ୍କ ଶିବିର ଟିକଟ ଦାବିଦାର ଅଛନ୍ତି ।
୨୦୧୯ ନିର୍ବାଚନରେ ବିଜେପି ପକ୍ଷରୁ ଦେବୀଙ୍କୁ କଡ଼ା ଟକ୍କର ଦେଇଥିଲେ ବିଜୟ ଦଳ ବେହେରା । ୨୦୧୭ ପଞ୍ଚାୟତ ନିର୍ବାଚନରେ ବିଜେଡିକୁ ଚେକ୍ ଦେବା ପରେ ୨୦୧୯ ସାଧାରଣ ନିର୍ବାଚନରେ ବିଜୟଙ୍କୁ ଆଶାତୀତ ସଫଳତା ମିଳିଥିଲା । ଯେଉଁଠି ବିଜେଡି ପ୍ରାର୍ଥୀ ଦେବୀ ମିଶ୍ରଙ୍କୁ ୯୦ ହଜାର ୫୬୪ ଖଣ୍ଡ ଭୋଟ୍ ମିଳିଥିଲା, ସେଠି ବିଜୟ ୭୨ ହଜାରରୁ ଅଧିକ ଭୋଟ୍ ପାଇଥିଲେ । କିନ୍ତୁ ଏଥର ଚିତ୍ର ସମ୍ପୂର୍ଣ୍ଣ ବଦଳିଯାଇଛି । ଦଳରେ ଏବେ ସମାନ୍ତରାଳ ଦୁଇ ସଂଗଠନ ରହିଥିବା ବେଳେ ଉଭୟ ବିଜୟ ଓ ସମ୍ବିତ ଏହାର ନେତୃତ୍ୱ ନେଉଛନ୍ତି । କିନ୍ତୁ ଉଭୟ ଏକାଠି ହୋଇ ପାରୁନଥିବାରୁ ଏହାର ଫାଇଦା ବିଜେଡି ଓ କଂଗ୍ରେସକୁ ମିଳିବ ବୋଲି କୁହାଗଲାଣି । ୨୫ ବର୍ଷର ଶାସନରେ ଲୋକଙ୍କର ଶାସକ ଦଳ ବିରୋଧରେ ଅସନ୍ତୋଷ ରହିଛି । ଏଣୁ ଦେବୀଙ୍କ ପାଇଁ ନିର୍ବାଚନ ବୈତରଣୀ ପାର୍ କରିବା ଏତେ ସହଜ ହେବ ନାହିଁ । କିନ୍ତୁ ବିଜେପିର ଅନ୍ତଦ୍ୱର୍ନ୍ଦ୍ୱରୁ ବିଜେଡି କିଛି ମାତ୍ରାରେ ଫାଇଦା ଉଠାଇବ ବୋଲି କୁହାଯାଉଛି ।
ଅନ୍ୟପକ୍ଷରେ ଦୁଇ ନେତା ସମ୍ବିତ ଓ ବିଜୟଙ୍କ ମଧ୍ୟରୁ ଦଳ କାହାକୁ ବିଶ୍ୱାସ କରିବ ତାହା ମଧ୍ୟ ସ୍ପଷ୍ଟ ହୋଇନି । କଂଗ୍ରେସ ବି ଏଯାଏ ପ୍ରାର୍ଥୀ ଘୋଷଣା କରିନାହିଁ । ବିଜେଡି ଛାଡ଼ି ପୁନର୍ବାର କଂଗ୍ରେସରେ ସାମିଲ ହୋଇଥିବା ସଞ୍ଜୟ କୁମାର ସାହୁ ଏବଂ କଂଗ୍ରେସ ନେତା ମନୋଜ ସାହୁଙ୍କ ସମେତ ଆଉ କିଛି ନେତାଙ୍କ ନାଁ ଚର୍ଚ୍ଚା ହେଉଥିବା ବେଳେ କିଏ ପ୍ରାର୍ଥୀ ହେବେ ତାକୁ ଅପେକ୍ଷା ରହିଛି ।
