ଚନ୍ଦ୍ରଶେଖରପୁର, ୦୯/୦୯ : ରାଜଧାନୀରେ ରହିବାକୁ ଭଡା ଘର ଖୋଜୁଛନ୍ତି କି ? ରହିବା ପୂର୍ବରୁ ଠିକ୍‌ରେ ଯାଞ୍ଚ କରି ଟଙ୍କା ଦିଅନ୍ତୁ । କାରଣ ଓଏଲ୍‌ଏକ୍ସରେ ଘର ଭଡ଼ା ବିଜ୍ଞାପନ ଦେଇ ଗ୍ରାହକଙ୍କୁ ଚୂନ ଲଗାଉଛନ୍ତି ଦଲାଲ । ଅଫଲାଇନ୍‌ ହେଉ କି ଅନଲାଇନ୍‌ ସବୁ ଫୋରମରେ ଦଲାଲ ଏବେ ସକ୍ରିୟ । କେବଳ ଭଡ଼ାଟିଆ ନୁହଁନ୍ତି ଘର ମାଲିକଙ୍କୁ ବି ପଟି ମାରି ଦେଉଛନ୍ତି । ଏଭଳି ଅଭିଯୋଗ ଚନ୍ଦ୍ରଶେଖରପୁର ମୈତ୍ରୀ ବିହାର ଅଞ୍ଚଳରୁ ଆସିଛି । ନିଜକୁ ଘର ମାଲିକର ପରିଚୟ ଦେଇ ଜଣେ ଦଲାଲ ୯ ଜଣଙ୍କଠୁ ଠକି ନେଇଛି ଲକ୍ଷାଧିକ ଟଙ୍କା । ଫୋନ୍‌ ବନ୍ଦ କରି ଫେରାର ହୋଇଯାଇଛି । କିଛି ଉପାୟ ନପାଇ ଥାନାର ଦ୍ୱାରସ୍ଥ ହୋଇଛନ୍ତି ଠକାମୀର ଶିକାର ହୋଇଥିବା ବ୍ୟକ୍ତି। 

ଝାଡ଼ଖଣ୍ଡର ଶିଖା ଗୁପ୍ତାଶର୍ମା । ଭୁବନେଶ୍ୱରରେ ଏକ ସଫ୍ଟୱେର କମ୍ପାନୀରେ କାମ କରନ୍ତି । ରହିବା ପାଇଁ ସେ ଭଲ ଘରଟିଏ ଖୋଜୁଥିଲେ । କିଛି ଦିନ ପୂର୍ବରୁ ଓଏଲଏକ୍ସରେ ବିଜ୍ଞାପନ ଦେଖି ଜାଣିବାକୁ ପାଇଥିଲେ ମୈତ୍ରୀବିହାରରେ ଥିବା ଓଁ ଗାର୍ଡେନରେ ଘର ଖାଲିଅଛି । ସେଥିରେ ଦିଆଯାଇଥିବା ଫୋନ ନମ୍ବରରେ ଯୋଗାଯାଗ କରି ଉକ୍ତ ଠିକଣାରେ ଯାଇ ପହଞ୍ଚିଥିଲେ । ଜଣେ ଯୁବକ ନିଜକୁ ଘର ମାଲିକଙ୍କ ପୁଅର ପରିଚୟ ଦେଇ ୩ ବିଏଚ୍‌କେ ଘର ବୁଲାଇ ଦେଖାଇଥିଲେ । ଘର ପସନ୍ଦ ହେବା ପରେ ୧୧ ହଜାର ଟଙ୍କା ଅଗ୍ରୀମ ଦେଇଥିଲେ ଶିଖା । ତେବେ ପରଦିନ ଜିନିଷପତ୍ର ସିଫ୍ଟ କରିବାକୁ ଉକ୍ତ ଯୁବକଙ୍କୁ ଫୋନ୍‌ କରିଥିଲେ । ହେଲେ ମୋବାଇଲ ସୁଇଚ୍‌ ଅଫ୍‌ ଆସିଥିଲା । ଫୋନ୍‌ ଲଗାଇ ବିଫଳ ହେବା ପରେ ଉକ୍ତ ଠିକଣାରେ ପୁଣି ପହଞ୍ଚିଥିଲେ ଶିଖା । ତେବେ ଜାଣିବାକୁ ପାଇଥିଲେ ଯେ ସେ ଘର ମାଲିକ ନୁହଁନ୍ତି । କେବଳ ଶିଖା ନୁହଁନ୍ତି । ଯାଜପୁର ଗୋଡିପାଟଣାର ଶୁଭମ୍‌ ଶାଶ୍ୱତ । ପେଶାରେ ସେ ମଧ୍ୟ ସଫ୍ଟୱୟର ଇଞ୍ଜିନିୟର । ତାଙ୍କୁ ୧୦ ହଜାର ଟଙ୍କା ଚୂନ ଲଗାଇଛି ଦଲାଲ । 

କେବଳ ଏହି ୨ ଜଣ ନୁହଁନ୍ତି ଘର ଖୋଜିବାକୁ ଯାଇ ଆଉ ୭ ଜଣ ସମାନ ତରିକାରେ ଠକାମୀର ଶିକାର ହୋଇଛନ୍ତି । କାହାଠୁ ୩୦ ହଜାର ତ କାହାଠୁ ୨୦ ହଜାର ଠକି ନେଇ ଚମ୍ପଟ ମାରିଛି ଦଲାଲ । ତେବେ ବଡ କଥା ହେଉଛି ଯେ ଟୁ ଲେଟ୍‌ ଲେଖିଥିବା ଘର ମାଲିକ ଏହି ଠକାମୀ ବିଷୟରେ ଜାଣିନାହାନ୍ତି । ଘରର ସୁପରଭାଇଜରକୁ ହାତ କରି କିଛି ଦିନ ପୂର୍ବରୁ ଉକ୍ତ ଦଲାଲ ଜଣଙ୍କ ଘର ଦେଖିବାକୁ ଆସିଥିଲା । ଘର ଭିତର ବୁଲି ଦେଖିବା ସହ ଫଟୋ ଓ ଭିଡିଓ ଉଠାଇ ନେଇଥିଲା । ପରେ ପରିବାର ଲୋକଙ୍କୁ ଘର ଦେଖାଇବାକୁ ଆଣିଆସିବ କହି ପଳାଇ ଯାଇଥିଲା । ସେ ମୋବାଇଲରେ ନେଇଥିବା ଫଟୋ ଓ ଭିଡିଓ ଓଏଲଏକ୍ସରେ ପୋଷ୍ଟ କରିଥିଲା । ଉକ୍ତ ପୋଷ୍ଟରେ ନିଜକୁ ଘର ମାଲିକ ପରିଚୟ ଦେଇଥିଲା । ଥାନା ଓ ସାଇବର ସେଲରେ ଅଭିଯୋଗ ପରେ ପୁଲିସ ତଦନ୍ତ ଆରମ୍ଭ କରିଛି । ଭୁବନେଶ୍ୱର କଳେବର ବୁଦ୍ଧି ପାଉଛି । ଭଲ ଘରେ ରହିବାକୁ ଲୋକ ଘରଭଡ଼ା ଖୋଜୁଛନ୍ତି । ଏହାର ସୁଯୋଗ ନେଇ ଦଲାଲମାନେ ମାତିଛନ୍ତି । ଘର ମାଲିକଙ୍କୁ ହାତ କରି ଘରକୁ ନିଜ କବଜାକୁ ନେଇ ଯାଉଛନ୍ତି । ଲୋକଙ୍କୁ ଘର ଦେଖାଇ ଅଗ୍ରୀମ ୨ ମାସର ଟଙ୍କା ନେଇ ଯାଉଛନ୍ତି । ଟଙ୍କା ପାଇବା ପରେ ଆଉ ଧରାଛୁଆଁ ଦେଉନାହାଁନ୍ତି ।