ପ୍ୟାରିସ୍,୧୭/୦୫: ଫ୍ରାନ୍ସରୁ ପ୍ରାୟ ୧୬ ହଜାର କିମି ଦୂର ଦକ୍ଷିଣ ପ୍ରଶାନ୍ତ ମହାସାଗରୀୟ ଦ୍ୱୀପ ନ୍ୟୁ କାଲେଡୋନିଆରେ ସୋମବାରଠାରୁ ଲାଗି ରହିଥିବା ବିକ୍ଷୋଭ ଦଙ୍ଗାରେ ପରିଣତ ହୋଇଛି । ୧୭୧ ବର୍ଷ ହେଲା ଫ୍ରାନ୍ସ କବ୍ଜାରେ ଥିବା ନ୍ୟୁ କାଲେଡୋନିଆରେ ମତଦାନ ସମ୍ବନ୍ଧୀୟ ଆଇନକୁ ନେଇ ବିରୋଧ ପ୍ରଦର୍ଶନ ଚାଲିଛି । ହିଂସାକାଣ୍ଡରେ ଏଠାରେ ଅଦ୍ୟାବଧି ଅନ୍ୟୁନ ୫ ଜଣଙ୍କ ମୃତ୍ୟୁ ଘଟିଥିବାବେଳେ ୬୪ ଆହତ ହୋଇଛନ୍ତି । ପୁଲିସ ୨ ଶହରୁ ଊର୍ଦ୍ଧ୍ୱ ବିକ୍ଷୋଭକାରୀଙ୍କୁ ଗିରଫ କରିଛି । ଫ୍ରାନ୍ସ ସରକାର ସେଠାରେ ୧୨ ଦିନ ପାଇଁ ଏମର୍ଜେନ୍ସି ଲାଗୁ କରିଛନ୍ତି । ସଡ଼କରେ ସେନା ଟ୍ୟାଙ୍କ ଧରି ପ୍ରସ୍ତୁତ ରହିଛି ।
ରିପୋର୍ଟ ଅନୁସାରେ, ଫ୍ରାନ୍ସ ନିକଟରେ ନ୍ୟୁ କାଲେଡୋନିଆରେ ମତଦାନ ନିୟମରେ ପରିବର୍ତ୍ତନ ପାଇଁ ଏକ ବିଲ୍ ପାସ୍ କରିଥିଲା । ଏହି ବିଲ୍ରେ, ନ୍ୟୁ କାଲେଡୋନିଆରେ ସେଠାକାର ମୂଳବାସିନ୍ଦାଙ୍କ ସମେତ ଫ୍ରାନ୍ସରୁ ଯାଇ ସେଠାରେ ରହୁଥିବା ନାଗରିକଙ୍କୁ ମଧ୍ୟ ଭୋଟିଂ ଅଧିକାର ଦିଆଯାଇଛି । ଫ୍ରାନ୍ସ ନାଗରିକଙ୍କୁ ସେଠାରେ ମତଦାନ ଅଧିକାରକୁ ବିରୋଧ କରି ଏହି ଦ୍ୱୀପରେ ବିକ୍ଷୋଭ ଆରମ୍ଭ ହୋଇଛି । ବିକ୍ଷୋଭକାରୀ ବହୁ ଦୋକାନ, ଘର, ବ୍ୟବସାୟିକ କେନ୍ଦ୍ର, ଶୋ’ରୁମ୍ ଆଦିରେ ନିଆଁ ଲଗାଇଦେଇଛନ୍ତି । ଦୋକାନଗୁଡ଼ିକରୁ ଲୁଟ୍ପାଟ କରିଛନ୍ତି । ନ୍ୟୁ କାଲେଡୋନିଆ ଦ୍ୱୀପକୁ ଫ୍ରାନ୍ସ କବଳରୁ ମୁକ୍ତ କରାଯାଉ ବୋଲି ସେମାନେ ଦାବି କରିଛନ୍ତି । କିଛି ବର୍ଷ ହେଲା ଏହି ଦ୍ୱୀପର ବାସିନ୍ଦା ନିଜକୁ ଅଲଗା ଦେଶ କରିବାକୁ ଦାବି କରିଆସୁଛନ୍ତି ।
