ମୁମ୍ବାଇ, ୨୮/୦୩: ଚଳଚ୍ଚିତ୍ର ଅଭିନେତା ଗୋବିନ୍ଦା ପୁଣି ଥରେ ରାଜନୀତିରେ ପାଦ ଥାପିଛନ୍ତି । ମାର୍ଚ୍ଚ ୨୮ ଗୁରୁବାର ଗୋବିନ୍ଦା ଶିବସେନାରେ ଯୋଗ ଦେଇଛନ୍ତି । ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଉପସ୍ଥିତିରେ ସେ ଶିବସେନାରେ ସାମିଲ୍ ହୋଇଛନ୍ତି ।
ମୁମ୍ବାଇର ନର୍ଥ-ଇଷ୍ଟ ଆସନରୁ ନିର୍ବାଚନ ଲଢ଼ି ପାରନ୍ତି ଗୋବିନ୍ଦା । ଏବେ ଉକ୍ତ ଆସନରୁ ଶିବସେନା ଉଦ୍ଧବ ଗୋଷ୍ଠୀ ଅମୋଲ କୀର୍ତ୍ତିକରଙ୍କୁ ପ୍ରାର୍ଥୀ କରିଛି । ବୁଧବାର ଗୋବିନ୍ଦା ପୂର୍ବତନ ବିଧାୟକ କୃଷ୍ଣା ହେଗଡ଼େଙ୍କୁ ଭେଟିବା ପରେ ସେ ନିର୍ବାଚନ ଲଢ଼ିବା ନେଇ ଚର୍ଚ୍ଚା ତେଜିଥିଲା ।
ତେବେ ପ୍ରଥମଥର ଲାଗି ଗୋବିନ୍ଦା ଲୋକସଭା ନିର୍ବାଚନ ଲଢ଼ିବାକୁ ଯାଉ ନାହାନ୍ତି । ଏହା ପୂର୍ବରୁ ଗୋବିନ୍ଦା ୨୦୦୪ ମସିହାରେ କଂଗ୍ରେସ ଟିକେଟରୁ ମୁମ୍ବାଇର ଉତ୍ତର ଆସନରୁ ଲଢ଼ିଥିଲେ ଲୋକସଭା ନିର୍ବାଚନ । ସେତେବେଳେ ବିଜେପିର ରାମ ନାଇକଙ୍କୁ ୪୮ ହଜାର ୨୭୧ ଭୋଟରେ ହରାଇଥିଲେ ଗୋବିନ୍ଦା । ୨୦୦୪ରୁ ୨୦୦୯ ପର୍ଯ୍ୟନ୍ତ ଲୋକସଭା ସାଂସଦ ରହିଥିଲେ ସେ ।
ମହାରାଷ୍ଟ୍ରରେ ବିଜେପି, ଶିବସେନା ଓ ଏନସିପି ମେଣ୍ଟରେ ଲୋକସଭା ଆସନ ସିଟ୍ ସେୟାରିଂ ଫର୍ମୁଲା ଅନ୍ତିମ ପର୍ଯ୍ୟାୟରେ ପହଞ୍ଚିଛି । ସୂତ୍ର ଅନୁସାରେ, ୪୮ ଆସନରୁ ବିଜେପି ୨୭, ଶିବସେନା ୧୪ ଓ ୫ଟିରେ ଅନସିପି ପ୍ରାର୍ଥୀ ଦେବ । ତେବେ ଏନେଇ ଅଧିକାରୀକ ଘୋଷଣା ହୋଇ ନାହିଁ ।