ନୂଆଦିଲ୍ଲୀ, ୩୦/୫: କେନ୍ଦ୍ର ଗୃହ ମନ୍ତ୍ରଣାଳୟ ସିଏଏ  ଅଧୀନରେ ପଶ୍ଚିମବଙ୍ଗରେ ଆରମ୍ଭ କରିଛି ନାଗରିକତା ପ୍ରମାଣପତ୍ର ପ୍ରଦାନ ପ୍ରକ୍ରିୟା । ହରିୟାଣା ଏବଂ ଉତ୍ତରାଖଣ୍ଡର ସଂପୃକ୍ତ କମିଟି  ନିଜ ନିଜ ରାଜ୍ୟରେ ଆବେଦନକାରୀଙ୍କ ପ୍ରଥମ ଗୋଷ୍ଠୀକୁ ନାଗରିକତା ପ୍ରଦାନ କରିଛନ୍ତି। ଏନେଇ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏକ ବିବୃତିରୁ ଜଣାପଡିଛି । 

ପଶ୍ଚିମବଙ୍ଗରେ ଏବେ ନାଗରିକତା ସଂଶୋଧନ ନିୟମ ୨୦୨୪ ଅଧୀନରେ ନାଗରିକତା ପ୍ରମାଣପତ୍ର ପ୍ରଦାନ ପ୍ରକ୍ରିୟା ଆରମ୍ଭ ହୋଇଛି। ଏହି ଯୋଜନା ଅଧୀନରେ ରାଜ୍ୟରୁ ଆସିଥିବା ପ୍ରଥମ ବ୍ୟାଚ୍ ଆବେଦନକୁ ଆଜି ପଶ୍ଚିମବଙ୍ଗ ରାଜ୍ୟର କ୍ଷମତାପ୍ରାପ୍ତ କମିଟି ନାଗରିକତା ପ୍ରଦାନ କରିଛି। ସେହିପରି ହରିୟାଣା ଓ ଉତ୍ତରାଖଣ୍ଡ ରାଜ୍ୟର କ୍ଷମତା ସମ୍ପନ୍ନ କମିଟି ମଧ୍ୟ ନାଗରିକତା ସଂଶୋଧନ ନିୟମ, ୨୦୨୪ ଅଧୀନରେ  ଗତକାଲି ନିଜ ନିଜ ରାଜ୍ୟରେ ପ୍ରଥମ ଗୋଷ୍ଠୀର ଆବେଦନକାରୀଙ୍କୁ ନାଗରିକତା ପ୍ରଦାନ କରିଛନ୍ତି। ସେହିପରି ଏହା ପୂର୍ବରୁ ପାକିସ୍ତାନର ୧୪ ଜଣ ହିନ୍ଦୁଙ୍କୁ ଭାରତ ସରକାର ମେ ୧୫ ରେ ନାଗରିକତା ପ୍ରମାଣପତ୍ର ପ୍ରଦାନ କରିଥିଲେ। ଭାରତ ସରକାର ୧୧ ମାର୍ଚ୍ଚ ୨୦୨୪ରେ ନାଗରିକତା ସଂଶୋଧନ ଆଇନ କାର୍ଯ୍ୟକାରୀ କରିଥିଲେ ।