ତେହରାନ, ୨୪/୦୯: ଲେବାନନ୍‌ରେ  ପେଜର, ୱାକିଟକି ବିସ୍ଫୋରଣ ଯୋଗୁ ୩୯  ହିଜ୍‌ବୁଲ୍ଲା ସଦସ୍ୟଙ୍କ ମୃତ୍ୟୁ ପରେ ଇରାନ ରିଭୋଲ୍ୟୁସନାରୀ ଗାର୍ଡସ୍‌ କର୍ପସ୍‌ (ଆଇଆର୍‌ଜିସି)  ସବୁ ପ୍ରକାର ଯୋଗାଯୋଗ ଉପକରଣ ବ୍ୟାନ୍‌  କରିଛି । ଏଥିସହ ଇରାନ ସେନା ବ୍ୟବହାର  କରୁଥିବା ସମସ୍ତ ଉପକରଣର ଯାଞ୍ଚ ନିର୍ଦ୍ଦେଶ  ଦିଆଯାଇଥିବା ଇରାନର ଦୁଇ ବରିଷ୍ଠ ସୁରକ୍ଷା  ଅଧିକାରୀ ସୂଚନା ଦେଇଛନ୍ତି । ସେହି ଉପକରଣଗୁଡ଼ିକ ମୁଖ୍ୟତଃ ଇରାନରେ ତିଆରି  ହୋଇଥିବାବେଳେ ଅନେକ ଡିଭାଇସ୍‌ ଚୀନ୍‌ ଏବଂ ରୁଷ୍‌ରୁ ଆମଦାନୀ କରାଯାଇଛି । ଇରାନ ସେନାରେ ଇସ୍ରାଏଲ ଗୁଇନ୍ଦା ସଦସ୍ୟ ଗୁଇନ୍ଦାଗିରି କରିପାରେ । 

ଇରାନ ନ୍ୟୁକ୍ଲିୟର  ପ୍ରୋଗ୍ରାମରେ ଇସ୍ରାଏଲ ବାଧା ଉପୁଜାଇପାରେ  ବୋଲି ତେହରାନ ଆଶଙ୍କା କରିଛି । ଇରାନର ବରିଷ୍ଠ  ଅଧିକାରୀଙ୍କୁ ଇସ୍ରାଏଲ ଟାର୍ଗେଟ କରିବା ଭୟ ରହିଛି ।  ଏପରିକି ଇରାନ ସୁରକ୍ଷା ଅଧିକାରୀଙ୍କ ଦେଶ ଏବଂ  ଦେଶ ବାହାରେ ଥିବା ବ୍ୟାଙ୍କ ଆକାଉଣ୍ଟ ଯାଞ୍ଚ ପାଇଁ  ମଧ୍ୟ ନିର୍ଦ୍ଦେଶ ରହିଛି । ଗତ ସପ୍ତାହରେ ଲେବାନନ୍‌ରେ  ଇରାନ ସମର୍ôଥତ ହିଜ୍‌ବୁଲ୍ଲା ଆତଙ୍କବାଦୀ ସଙ୍ଗଠନର  ସଦସ୍ୟମାନେ ଯୋଗାଯୋଗ ପାଇଁ ବ୍ୟବହାର କରୁଥିବା  ପ୍ରାୟ ୫ ହଜାର ପେଜର ବିସ୍ଫୋରଣ ହୋଇଥିଲା ।  ଏହାର ଦିନକ ପରେ ବହୁସଂଖ୍ୟାରେ ୱାକିଟକି  ବିସ୍ଫୋରଣ ହୋଇଥିଲା । ସେହି ଉପକରଣଗୁଡ଼ିକରେ  ବିସ୍ଫୋରକ୍‌ ଫିଟ୍‌ କରାଯାଇଥିବା ଜଣାଯାଇଥିଲା ।  

ଏଥିରେ ଇସ୍ରାଏଲ ଗୁଇନ୍ଦା ସଂସ୍ଥା ମୋସାଦର  ହାତ ଥିବା ହିଜ୍‌ବୁଲ୍ଲା ଓ ଇରାନ କହିଥିଲା । ସୂଚନା  ଅନୁସାରେ, ଇରାନ ବହୁସଂଖ୍ୟାରେ ଏନ୍‌କ୍ରିପ୍‌ଟେଡ୍‌  କମ୍ୟୁନିକେସନ ଡିଭାଇସ୍‌ ବ୍ୟବହାର କରେ । ଇରାନ  ମିଲିଟାରୀ ଯୋଗାଯୋଗ ଉପକରଣ ବିଶେଷ କରି  ଘରୋଇ ଭାବେ ନିର୍ମାଣ କରାଯାଏ । ପୂର୍ବରୁ ଇରାନ  ମଧ୍ୟ ପେଜର ବ୍ୟବହାର କରୁଥିଲା । ତେବେ  ଦୁଇ ଦଶନ୍ଧି ହେଲା ଇରାନ ସେନା ପେଜର  ବ୍ୟବହାର ବନ୍ଦ କରିଦେଇଛି । ତେହରାନ ବିଦେଶୀ  ଅନୁପ୍ରବେଶ ରୋକିବା ଲାଗି ନିଜର ମିଲିଟାରୀଗ୍ରେଡ୍‌ ରେଡିଓ ଟ୍ରାନ୍ସମିଶନ ବିକଶିତ କରିଛି