ନୂଆଦିଲ୍ଲୀ: ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ଚନ୍ଦ୍ରବାବୁ ନାଇଡୁ ଜୁନ୍ ୧୨ ରେ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିପାରନ୍ତି । ଏକ ଜାତୀୟ ଗଣମାଧ୍ୟମ ସୂତ୍ରରୁ ପ୍ରକାଶ ଯେ ଏହା ପୂର୍ବରୁ ନାଇଡୁ ଜୁନ୍ ୯ ରେ ଶପଥ ଗ୍ରହଣ କରିବାର ଥିଲା, କିନ୍ତୁ ମୋଦୀଙ୍କ ଶପଥ ଗ୍ରହଣ ହେତୁ ସେ ତାଙ୍କ ଶପଥ ଗ୍ରହଣ କାର୍ଯ୍ୟକ୍ରମକୁ ଜୁନ୍ ୧୨ ପର୍ଯ୍ୟନ୍ତ ସ୍ଥଗିତ ରଖିପାରନ୍ତି ।
ଆନ୍ଧ୍ରପ୍ରଦେଶରେ ଅନୁଷ୍ଠିତ ବିଧାନସଭା ନିର୍ବାଚନରେ ଟିଡିପି ୧୩୫ ଟି ଆସନ ଜିତିଛି। ରାଜ୍ୟରେ ୧୭୫ ଟି ବିଧାନସଭା ଆସନ ଅଛି, ସେଥିମଧ୍ୟରୁ ୮୮ ଟି ଆସନ ଜିତିଥିବା ଦଳକୁ ସଂଖ୍ୟାଗରିଷ୍ଠତା ମିଳିଥାଏ । ତେବେ ଏଥର ଟିଡିପି ଚମତ୍କାର ପ୍ରଦର୍ଶନ କରିଛି ଏବଂ ସଂଖ୍ୟାଗରିଷ୍ଠତା ଅପେକ୍ଷା ଅଧିକ ସିଟ୍ ହାତେଇଛି । ରାଜ୍ୟରେ ବିଧାନସଭା ନିର୍ବାଚନର ଫଳାଫଳ ମଧ୍ୟ ଲୋକସଭା ନିର୍ବାଚନ ସହିତ ଆସିଛି । ଟିଡିପି ୧୬ ଟି ଲୋକସଭା ଆସନ ମଧ୍ୟ ଜିତିଛି । ତେବେ ଟିଡିପି ରାଜ୍ୟ ତଥା ଜାତୀୟ ସ୍ତରରେ ମଧ୍ୟ ଏନଡିଏ ମିଳିତ ମଞ୍ଚର ଏକ ଅଂଶ ।
ଗଣମାଧ୍ୟମ ରିପୋର୍ଟ ଅନୁଯାୟୀ, ଚନ୍ଦ୍ରବାବୁ ନାଇଡୁଙ୍କ ଶପଥ ଗ୍ରହଣ ସମାରୋହ ଅମରାବତୀରେ ହୋଇପାରେ, ଯାହା ଆନ୍ଧ୍ରପ୍ରଦେଶର ନାମିତ ରାଜଧାନୀ । ନାଇଡୁ ଚତୁର୍ଥ ଥର ପାଇଁ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି । ସେ ପ୍ରଥମେ ୧୯୯୫ ରେ ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ସେ ୧୯୯୫ ରୁ ୨୦୦୪ ପର୍ଯ୍ୟନ୍ତ ଦୁଇ ଥର ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ଏହା ପରେ, ଯେତେବେଳେ ୨୦୧୪ ରେ ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାକୁ ଦୁଇ ଭାଗରେ ବିଭକ୍ତ କରାଯାଇଥିଲା, ସେତେବେଳେ ସେ ତୃତୀୟ ଥର ପାଇଁ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ । ସେ ୨୦୧୪ ରୁ ୨୦୧୯ ପର୍ଯ୍ୟନ୍ତ ମଧ୍ୟ ମୁଖ୍ୟମନ୍ତ୍ରୀ ରହିଥିଲେ ।
