ଭୁବନେଶ୍ୱର ୧୫/୦୪: ସୋମବାର ପବିତ୍ର ନେତ ଉତ୍ସବ ଅବସରରେ ମହାପ୍ରଭୁ ଶ୍ରୀଲିଙ୍ଗରାଜଙ୍କ ପ୍ରସିଦ୍ଧ ରୁକୁଣା ରଥ ଯାତ୍ରାର ଆଦ୍ୟ ଉତ୍ସବ ଅର୍ଥାତ ରଥ ପ୍ରତିଷ୍ଠା ନୀତି ରାତି ଠିକ ୯ଟାରେ ଆରମ୍ଭ ହେବ ।
କ୍ଷେତ୍ରବାସୀ ବ୍ରାହ୍ମଣ ନିଯୋଗ ସଭାପତି ସରୋଜ ମିଶ୍ର ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ ଏହି ନୀତି ନିମନ୍ତେ ପୁରୀରୁ ଗଜପତିଙ୍କ ପ୍ରତିନିଧି ଭାବେ ସୁଧାଶୁଂ ଶେଖର ରାଜଗୁରୁ ଏବଂ ଦେବୀ ପ୍ରସାଦ ରାଜଗୁରୁ ଯୋଗ ଦେବେ । ସେମାନଙ୍କୁ ରଥ ପ୍ରତିଷ୍ଠାରେ ସବୁ ପ୍ରକାର ସହଯୋଗ କରାଯିବ ବୋଲି ରବିବାର ନିଯୋଗର ଏକ ସ୍ୱତନ୍ତ୍ର ବୈଠକରେ ଆଲୋଚନା ହୋଇଥିଲା । ଏହି ପୂଜା ନୀତି ପ୍ରାୟ ୫ ଘଣ୍ଟାରୁ ଊଦ୍ଧ୍ୱର୍ ସମୟ ଧରି ଅନୁଷ୍ଠିତ ହେବ । ଏହି ନୀତି ସରିଲେ ଶ୍ରୀଜିଉଙ୍କ ମଙ୍ଗଳବାର ରଥଯାତ୍ରା ନିମନ୍ତେ ପୂଜାର୍ଚ୍ଚନା ଆରମ୍ଭ ହେବ । ଅଶୋକାଷ୍ଟମୀରେ ଠିକ ସାଢେ୩ଟାରେ ରଥଟଣା ଆରମ୍ଭ ହେବ । ଏଥର ୨ଟି ଯାକ ସମନ୍ୱୟ ବୈଠକରେ(ଜିଲ୍ଲା ପ୍ରଶାସନ ଓ ପୋଲିସ ବିଭାଗ)ଗୋଟିଏ ଦିନରେ ରଥ ରାମେଶ୍ୱର ମନ୍ଦିର ପହଞ୍ଚିବା ଲାଗି ଆପାତତଃ ଚୁଡାନ୍ତ କରାଯାଇଛି । ତେଣୁ ଏ ଦିଗରେ ମଧ୍ୟ ସବୁ ପ୍ରକାର ଚେଷ୍ଟା କରାଯିବ ବୋଲି ମନ୍ଦିର ପ୍ରଶାସନ ତରଫରୁ କୁହାଯାଇଛି ।
ପ୍ରକାଶ ଥାଉକି ପୂର୍ବରୁ ସମସ୍ତ ପ୍ରସ୍ତୁତି ବୈଠକରେ ମହାରଣା ସେବାୟତ ମାନେ ନିର୍ଦ୍ଧାରିତ ସମୟ ମଧ୍ୟରେ ରଥ ନିର୍ମାଣ ସାରି ପ୍ରଶାସନକୁ ହସ୍ତାନ୍ତର କରିବେ ବୋଲି ପ୍ରତିଶ୍ରୁତି ଦେଇଥିଲେ ା ସେହି କ୍ରମରେ ସୋମବାର ଦ୍ୱିପହର ସୁଦ୍ଧା ରଥ ମଧ୍ୟ ହସ୍ତାନ୍ତର ହୋଇଯିବ ବୋଲି ବଟକୃଷ୍ଣ,ବଳରାମ ଓ ସୋମନାଥ ମହାରଣା କହିଛନ୍ତି । ରଥରେ ସିଂହାସନ ଠାରୁ ନେଇ ଘଣ୍ଟି,ସୂଆ,ବ୍ରହ୍ମା,ଚାରିଦୁଆର ଆଦି ଚଢାଇବା କାମ ଚାଲିଛି । ସେହିପରି ଦରିଜୀଙ୍କ ତରଫରୁ ମଧ୍ୟ ରଥ କନା,ଦୁଆର ଅଡା,ଘାଣ୍ଟ ଚକଡା କନା,ସିଂହାସନ ଘେର,ବ୍ରହ୍ମାଙ୍କର ଘେର,ରଥ ପତକା,ପାଲିଙ୍କି କନା,ବିଭିନ୍ନ ଆକୃତିର ଫୁଲ ସହ ଦିଅଁଙ୍କ ପହଣ୍ଡି ପାଇଁ ଖଣ୍ଡୁଆ କନା (ଚାନ୍ଦୁଆ) ହସ୍ତାନ୍ତର ସରିଛି । ସୋମବାର ଅପରାହ୍ନରେ ପୋଲିସ ବିଭାଗ ତରଫରୁ ସୁରକ୍ଷା ଓ ଯାନବାହାନ ପାର୍କିଂ ନିମନ୍ତେ ମଧ୍ୟ ମାର୍ଗ ଦର୍ଶିକା ଜାରି କରାଯିବା।
ରୁକୁଣା ରଥଯାତ୍ରାର ମଙ୍ଗଳବାର ନୀତି ନିର୍ଘଣ୍ଟ
ମଙ୍ଗଳ ଆଳତି ଓ ଅବକାଶ ଭୋର- ୫ଟାରୁ ସାଢେ୫
ସାହାଣମେଲା ଦର୍ଶନ- ଭୋର ସାଢେ ୫ଟାରୁ ସକାଳ ସାଢେ୬ଟା
ରୋଷ ହୋମ- ସକାଳ ସାଢେ୫ଟା
ଛାମୁ ପରିଷ୍କାର- ସକାଳ ସାଢେ୬ରୁ ୭ଟା
ମହାସ୍ନାନ ଓ ବେଶ- ସକାଳ ୭ଟାରୁ ୮ଟା
ସୂର୍ଯ୍ୟ ପୂଜା, ଦ୍ୱାରପାଳ ପୂଜା ଶ୍ରୀଜିଉଙ୍କଓ ଠାକୁରାଣୀ
ବଲ୍ଲଭ ଓ ସକାଳ ଧୂପ- ସକାଳ ୮ଟାରୁ ୯ଟା ୧୫
ଭୁବନେଶ୍ୱରୀଙ୍କ ସକାଳ ଧୂପ- ସକାଳ ୯ଟା ୧୫ରୁ ୯ଟା ୪୫
ଭୋଗ ମଣ୍ଡପ- ସକାଳ ୯ଟା୪୫ରୁ ୧୦ଟା ୪୫
ମହାସ୍ନାନ ଓ ବେଶ
ସୂର୍ଯ୍ୟ ପୂଜା,ଦ୍ୱାରପାଳ ପୂଜା- ଦିନ ୧୦ଟା ୪୫ରୁ ୧୨ଟା ମଧ୍ୟରେ
ଯାତ୍ରା- ପୂଜା ମଧ୍ୟାହ୍ନ ୧୨ଟାରୁ ସାଢେ ୧୨
ଶ୍ରୀଜିଉଙ୍କ ପହଣ୍ଡି,ରଥାରୁଢ- ମଧ୍ୟାହ୍ନ ସାଢେ୧୨ରୁ ସାଢେ ୧ଟା
ରଥରେ ପୂଜା- ମଧ୍ୟାହ୍ନ ସାଢେ୧ଟାରୁ ସାଢେ୩ଟା
ରଥଟଣା ଆରମ୍ଭ- ଅପରାହ୍ନ ସାଢେ୩ଟା
ରାମେଶ୍ୱର ମନ୍ଦିରକୁ ବିଜେ- ସଂନ୍ଧ୍ୟା ସାଢେ ୭
ଶ୍ରୀଜିଉଙ୍କ ଅନ୍ୟାନ୍ୟ ନୀତି- ସଂନ୍ଧ୍ୟା ସାଢେ ୭ଟାରୁ ଆରମ୍ଭ