ବ୍ରହ୍ମପୁର,୧୧/୦୫: ଯୁକ୍ତଦୁଇ ଛାତ୍ରୀ ଗଣଦୁଷ୍କର୍ମ ମାମଲାରେ ଆଉ ଜଣେ ଅଭିଯୁକ୍ତ ପୁରୁଷୋତ୍ତମପୁର ଥାନା ଭୁତସର୍ସିଂ ଗ୍ରାମର ଓମ୍କାର ଜେନା(୨୧)ଙ୍କୁ ଗିରଫ କରିଛି ବ୍ରହ୍ମପୁର ବୈଦ୍ୟନାଥପୁର ଥାନା ପୁଲିସ । ଓମ୍କାର ଡି-ଫାର୍ମା ପଢ଼ୁଛନ୍ତି । ବରଗଡ଼ ଜିଲ୍ଲା ସୋହଳା ଥାନା ଲୁହୁରାଛାଟି ଅଞ୍ଚଳରୁ ତାଙ୍କୁ ଗିରଫ କରାଯାଇଥିବା ଆଇଆଇସି ସୂଚିତ୍ରା ପରିଡ଼ା ସୂଚନା ଦେଇଛନ୍ତି । ପୂର୍ବରୁ ଏହି ମାମଲାରେ ରୁତୁନ ଦାଶ(୨୨), ଆକାଶ ନାୟକ (୨୬), ଜୁମନ ଗୌଡ଼ (୧୯), ଫାର୍ମାସୀ ଛାତ୍ର ରୁଦ୍ର ଜେନା (୨୧) ଓ ବିସିଏ ଛାତ୍ର ଅଭିଳାଶ ପୋଲାଇ(୨୧) ଗିରଫ ହୋଇ ଜେଲ୍ରେ ଅଛନ୍ତି । ଓମ୍କାରଙ୍କୁ କୋର୍ଟ ଚାଲାଣ ପରେ ଜେଲ୍ ପଠାଯାଇଛି ।
ପୁଲିସ ସୂଚନା ପ୍ରକାରେ, ଗତ ୩ ତାରିଖ ସନ୍ଧ୍ୟାରେ ଜନୈକା ଯୁକ୍ତ ଦୁଇ ଛାତ୍ରୀ ଗଣଦୁଷ୍କର୍ମ ଶିକାର ହୋଇଥିଲେ । ସେଦିନ ସନ୍ଧ୍ୟାରେ ସେ ଜଣେ ଝିଅ ସାଙ୍ଗକୁ ଭେଟିବା ପରେ ହିଲପାଟଣାରେ ବାପାଙ୍କୁ ଅପେକ୍ଷା କରିଥିଲେ । ସେହି ସମୟରେ ଅଭିଯୁକ୍ତ ରୁତୁନ ସହ ଦେଖା ହୋଇଥିଲା । ନାବାଳିକା ଛାତ୍ରୀଙ୍କୁ ରୁତୁନ୍ ନୂଆବସ୍ଷ୍ଟାଣ୍ଡ ନିକଟରେ ଥିବା ବ୍ୟାଚେଲର ରୁମ୍କୁ ନେଇଥିଲେ । ସେଠାରେ ନାବାଳିକାଙ୍କୁ ମୃଦୁପାନୀୟରେ ନିଶା ଦେଇ ଅଭିଯୁକ୍ତମାନେ ବଳାତ୍କାର କରିଥିଲେ । ରାତି ୧୦ଟାରେ ଅଭିଯୁକ୍ତମାନେ ଛାତ୍ରୀଙ୍କୁ ବିଜିପୁର ଛକରେ ଛାଡ଼ି ଦେଇଥିଲେ । ନାବାଳିକା ଛାତ୍ରୀ ଘଟଣା ସମ୍ପର୍କରେ ଘରେ କହିଥିଲେ । ପରିବାର ଲୋକଙ୍କ ସହ ଥାନାକୁ ଆସି ପୀଡ଼ିତା ୫ତାରିଖରେ ଥାନାରେ ଏତଲା ଦେଇଥିଲେ ।