ନୂଆଦିଲ୍ଲୀ, ୧୧।୮: ତାଜମହଲକୁ ପ୍ରେମର ପ୍ରତୀକ ବୋଲି କୁହାଯାଏ । କିଏ ମହିଳାଙ୍କ ହୃଦୟର ରାଣୀ କୁହେ ତ ଆଉ କିଏ କହେ ବିଶ୍ବର ସବୁଠାରୁ ସୁନ୍ଦର ମହଲ ତାଜମହଲ । ବିଶ୍ୱର ଆଶ୍ଚର୍ଯ୍ୟ କିର୍ତ୍ତିରାଜି ମଧ୍ୟରୁ ଅନ୍ୟତମ ଏହି ତାଜମହଲର ଗୋଟିଏ ଝଲକ ପାଇବାକୁ ଓ ସମ୍ମୁଖରେ ଛିଡ଼ା ହୋଇ ଫଟୋଟିଏ ଉଠାଇବାକୁ ଦେଶ ବିଦେଶରୁ ଧାଇଁ ଆସିଥାନ୍ତି ଲକ୍ଷ ଲକ୍ଷ ପର୍ଯ୍ୟଟକ । ଧଳା ପଥରରେ ନିର୍ମିତ ତାଜମହଲର ଅପରୂପ ସୌନ୍ଦର୍ଯ୍ୟ ବିଭୋର କରିଦିଏ ଦେଖଣାହାରୀଙ୍କ ମନ । ମୋଗଲ ବାଦଶାହା ଶାହାଜାହାନ ପତ୍ନୀ ମୁମତାଜଙ୍କ ସ୍ମୃତିରେ ବନାଇଛନ୍ତି ତାଜମହଲ । ୧୬୩୧ରେ ୧୪ତମ ପିଲାକୁ ଜନ୍ମ ଦେବା ବେଳେ ମୁମତାଜଙ୍କ ମୃତ୍ୟୁ ଘଟିଥିଲା । ମୁମତାଜଙ୍କ ସ୍ମୃତିରେ ୧୬୩୨ରେ ଶାହାଜାହାନ ଏହାର ନିର୍ମାଣ ଆରମ୍ଭ କରିଥିଲେ । କିନ୍ତୁ ଏତେ ସୁନ୍ଦର ତାଜମହଲର ନିର୍ମାତା କିଏ ଜାଣିଛନ୍ତି କି ? କିଏ ଏହାକୁ ନିର୍ମାଣ କରିଥିଲେ ?
ମୁଗଲ ବାଦଶାହ ଶାହାଜାହାନ ନିଜ ରାଜସ୍ୱ କିଲ୍ଲା ଓ ବଡ଼ ବଡ଼ ରାଜକୀୟ ପ୍ରସାଦ ପାଇଁ ପ୍ରସିଦ୍ଧ ଥିଲେ । ତାଙ୍କ ଶାସନକାଳରେ ଭାରତବର୍ଷରେ ଅନେକ କିଲ୍ଲା ନିର୍ମାଣ କରାଯାଇଛି । ଯେଉଁଥିରେ ବିଶ୍ୱ ପ୍ରସିଦ୍ଧ ଲାଲ କିଲ୍ଲା ଓ ତାଜ ମହଲ ସାମିଲ । ପୁରୁଣା ଦିଲ୍ଲୀଠାରେ ଲାଲ କିଲ୍ଲା ନିର୍ମାଣ କରିବାକୁ ଆଦେଶ ଦେଇଥିଲେ ଶାହଜାହାନ । ତେବେ ଏହି ଲାଲ କିଲ୍ଲା ଓ ତାଜମହଲ ନିର୍ମାଣ କରିବାକୁ ବାସ୍ତୁକାର ଉସତାଦ୍ ଅହମ୍ମଦ ଲାହୋରୀଙ୍କ ସାହାଯ୍ୟ ନେଇଥିଲେ ସେ । ଉସତାଦ୍ ଅହମ୍ମଦ ଲାହୋରୀ ସେ ସମୟର ସବୁଠୁ ଚମତ୍କାର ବାସ୍ତୁକାରଙ୍କ ମଧ୍ୟରୁ ଜଣେ । ୧୬୩୧ରେ ଶାହାଜାହାନ ଅହମ୍ମଦ ଲାହୋରୀଙ୍କୁ ତାଜମହଲ ନିର୍ମାଣ କରିବାକୁ ନିଯୁକ୍ତି କରିଥିଲେ । ଯାହାକୁ ପୂରା କରିବାକୁ ୨୦ ହଜାର କାରିଗର ନିୟୋଜିତ ଥିବାବେଳେ ଲାଗିଥିଲା ୧୨ବର୍ଷର ସମୟ । ଐତିହାସକାରଙ୍କ ଅନୁସାରେ, ଶାହାଜାହାନ୍ ଉସତାଦ୍ ଅହମ୍ମଦ ଲାହୋରୀଙ୍କୁ ତାଜମହଲ ତିଆରି କରିବାକୁ ମାସକୁ ହଜାରେ ଟଙ୍କା ଦରମା ଦେଉଥିଲେ । ଆପଣ ଭାବୁଥିବେ ସାରା ବିଶ୍ୱ ପ୍ରସିଦ୍ଧ ତାଜମହଲ ନିର୍ମାତାଙ୍କୁ ମାତ୍ର ହଜାର ଟଙ୍କା ଦରମା ? କହିରଖୁ କି, ସେ ସମୟରେ ହଜାରେ ଟଙ୍କାର ମୂଲ୍ୟ ବର୍ତ୍ତମାନ ସମୟରେ ଜଣେ କର୍ପୋରେଟ୍ ସେକ୍ଟରର ସିଇଓଙ୍କ ଦରମାଠୁ ବି ଅଧିକ ।
କିଏ ସେହି ଅହମ୍ମଦ ଲାହୋରୀ ?
ଶାହାଜାହାନ ଶାସନକାଳରେ ଉସତାଦ୍ ଅହମ୍ମଦ ଲାହୋରୀ ମୁଖ୍ୟ ବାସ୍ତୁକାର ଥିଲେ । ତାଜମହଲ ଓ ଲାଲ କିଲ୍ଲା ନିର୍ମାଣ କରିବା ବ୍ୟତୀତ ସେ ଦିଲ୍ଲୀର ଜାମା ମସଜିଦ୍ର ଡିଜାଇନ ମଧ୍ୟ ପ୍ରସ୍ତୁତ କରିଥିଲେ । ଉସତାଦ୍ ଅହମ୍ମଦ ଲାହୋରୀ ବାସ୍ତୁକାର ପରିବାରର । ତାଙ୍କୁ ବାଦଶାହ ଶାହାଜାହାନ ନଦିର-ଉଲ-ଅସରର ଉପାଧି ଦେଇଥିଲେ । ଐତିହାସକାରଙ୍କ କହିବାନୁସାରେ, ଜ୍ୟାମିତି, ଅଙ୍କ, ଗଣିତ ଓ ଜ୍ୟୋର୍ତିବିଜ୍ଞାନରେ ମଧ୍ୟ ଅହମ୍ମଦ ଲାହୋରୀଙ୍କ ଅଗାଧ ପାଣ୍ଡିତ୍ୟ ଥିଲା ।
