ବେତନଟୀ,୦୬/୦୫: ମୟୂରଭଞ୍ଜ ଜିଲ୍ଲା ବେତନଟୀ ବ୍ଲକ୍ ଅନ୍ତର୍ଗତ ଦହିକୋଟୀ ପଞ୍ଚାୟତ ଅଧୀନ ଆଗଡ଼ା ଗ୍ରାମର ଶିଳ୍ପୀ ସମରେନ୍ଦ୍ର ତୁଳସୀ କାଠରେ ୨ଇଞ୍ଚ ଦୈର୍ଘ୍ୟ, ୩ଇଞ୍ଚ ଲମ୍ବ ଏବଂ ୦.୮ଇଞ୍ଚ ପ୍ରସ୍ଥ ବିଶିଷ୍ଟ ଅତି ସୂକ୍ଷ୍ମ ରାମମନ୍ଦିର ନିର୍ମାଣ କରି ଚର୍ଚ୍ଚାକୁ ଆସିଛନ୍ତି । ଶିଳ୍ପୀ ସମରେନ୍ଦ୍ରଙ୍କ ଏହି କଳାକୃତି ପାଇଁ ସେ ଇଣ୍ଡିଆ ବୁକ୍ ଅଫ୍ ରେକର୍ଡ୍ସ୨୦୨୪ରେ ସ୍ଥାନୀତ ହୋଇଛନ୍ତି । ଏନେଇ ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।
ବେତନଟୀର ଶିଳ୍ପୀ ସମରେନ୍ଦ୍ର ଫୁଲବାଣୀ ବିଏଡ କଲେଜରେ ଚୁକ୍ତିଭିତ୍ତିକ କଳାଶିକ୍ଷକ ଭାବରେ କାର୍ଯ୍ୟରତ ଥିବାବେଳେ ଚଳିତବର୍ଷ ଫେବ୍ରୁଆରୀ ତୃତୀୟ ସପ୍ତାହରେ ବିଶ୍ୱପ୍ରସିଦ୍ଧ ଅଯୋଧ୍ୟାର ଭବ୍ୟ ରାମମନ୍ଦିରର ଅବିକଳ କଳାକୃତୀ ତୁଳସୀ କାଠରେ ନିର୍ମାଣ କରିଥିଲେ । ୩ଦିନ ଧରି ୭ଘଣ୍ଟା ଲେଖାଏଁ କଠିନ ପରିଶ୍ରମ କରି ଶିଳ୍ପୀ ସମରେନ୍ଦ୍ର ଏହି ସୂକ୍ଷ୍ମାତିସୂକ୍ଷ୍ମ କାରୁକାର୍ଯ୍ୟକୁ ଚୂଡ଼ାନ୍ତ ରୂପରେଖ ଦେଇଥିଲେ । ଏଥିରେ ୫୧ଟି ପିଲାର ରହିଥିବା ବେଳେ ପତାକା ମଧ୍ୟ ରହିଛି । ତେବେ ସମ୍ପୂର୍ଣ୍ଣ ତୁଳସୀ କାଠରେ ନିର୍ମିତ ଏହି ସୂକ୍ଷ୍ମମନ୍ଦିର ପାଇଁ ସେ ତୁଳସୀକାଠ ଏବଂ ଯୋଡ଼େଇ ପାଇଁ ଅଠାର ବ୍ୟବହାର କରିଛନ୍ତି ।
ସେତେବେଳେ ଏହି କଳାକୃତୀ ପାଇଁ ଶିଳ୍ପୀ ସମରେନ୍ଦ୍ର ବେଶ୍ ଚର୍ଚ୍ଚିତ ହୋଇଥିଲେ । ଏହାପରେ ଏପ୍ରିଲ ୧ତାରିଖରେ ଇଣ୍ଡିଆ ବୁକ୍ ଅଫ ରେକର୍ଡ୍ସ କାର୍ଯ୍ୟାଳୟକୁ ସମରେନ୍ଦ୍ର ନିଜର କଳାକୃତି ସମ୍ପର୍କୀତ ଦସ୍ତାବିଜ ପଠାଇଥିଲେ । ଇଣ୍ଡିଆ ବୁକ୍ ଅଫ୍ ରେକର୍ଡ୍ସର ବିଚାରକ ମଣ୍ଡଳୀଙ୍କ ଦ୍ୱାରା ସମରେନ୍ଦ୍ରଙ୍କ କଳାକୃତୀ ବେଶ୍ ପ୍ରଶଂସିତ ହେବା ସହିତ ଯୋଗ୍ୟ ବିବେଚିତ ମଧ୍ୟ ହୋଇଥିଲା । ଏନେଇ ଏପ୍ରିଲ ୩ତାରିଖରେ ତାଙ୍କର କଳାକୃତୀକୁ ମଞ୍ଜୁରୀ ମିଳିଥିବା ଏବଂ ଏହାକୁ ଇଣ୍ଡିଆ ବୁକ୍ ଅଫ୍ ରେକର୍ଡ୍ସ-୨୦୨୪ରେ ସ୍ଥାନୀତ କରାଯାଇଥିବା ନେଇ ସ୍ୱିକୃତିପତ୍ର ମିଳିଥିଲା । ଏଥିନେଇ ସମରେନ୍ଦ୍ରଙ୍କ ନିକଟକୁ ଇଣ୍ଡିଆ ବୁକ୍ ଅଫ୍ ରେକର୍ଡ୍ସ କାର୍ଯ୍ୟାଳୟ ପକ୍ଷରୁ ମାନପତ୍ର, ପୁସ୍ତକ, ମେଡାଲ, ମୂଲ୍ୟବାନ କଲମ, ବ୍ୟାଜ୍, ପରିଚୟପତ୍ର ପ୍ରଦାନ କରାଯାଇଛି ।
