ପାଟନା, ୨୧।୧୧: ବିହାର ମଧେପୁରା ଡିଷ୍ଟ୍ରିକ୍ଟ ମାଜିଷ୍ଟ୍ରେଟ୍ (ଡିଏମ୍‌)ଙ୍କ ଗାଡି ଧକ୍କାରେ ଗଲା ୩ ଜଣଙ୍କ ଜୀବନ। ସେଭଳି ଦୁଇଜଣ ଲୋକ ଗୁରୁତର ଭାବରେ ଆହତ ହୋଇଛନ୍ତି। ଘଟଣା ଫୁଲ ପରାସ ଥାନା ଅନ୍ତର୍ଗତରେ ଘଟିଛି। ଦୁର୍ଘଟଣା ସେତେବେଳେ ଘଟିଥିଲା ଯେତେବେଳେ ଜିଲ୍ଲାଧିକାରୀଙ୍କ ଗାଡି ମଧେପୁରା ଆଡକୁ ଯାଉଥିଲା। ଏହି ସମୟରେ ଗାଡି ନିୟନ୍ତ୍ରଣ ହରାଇ ବସିଥିଲା। ସଡକ କଡରେ କାମ କରୁଥିବା ଶ୍ରମିକଙ୍କ ଉପରେ ଗାଡି ଚଢିଯାଇଥିଲା। ଏହି ଦୁର୍ଘଟଣାରେ ଜଣେ ଶ୍ରମିକ, ମହିଳା ଓ ଶିଶୁର ମୃତ୍ୟୁ ହୋଇଛି।ସେଭଳି ଘଟଣା ପରେ ଡିଏମ୍ ବିଜୟ ପ୍ରକାଶ ମିଣା ଓ ଡ୍ରାଇଭର କାର ଛାଡି ପଳାଇ ଯାଇଥିଲେ। ଏହାପରେ ଉତ୍ୟକ୍ତ ଲୋକ ଜିଲ୍ଲାପାଳଙ୍କ ଗାଡିକୁ ଭାଙ୍ଗି ଦେଇଥିଲେ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଦୁର୍ଘଟଣା ସକାଳ ପ୍ରାୟ ୮ଟା ବେଳେ ଘଟିଥିଲା ଓ ଦୁର୍ଘଟଣା ପରେ ତୁରନ୍ତ ଡିଏମ୍ ଓ ତାଙ୍କର ଷ୍ଟାଫ୍‌ ବାଇକ୍‌ରେ ବସି ପଳାଇ ଯାଇଥିଲେ। ଗାଡି ପ୍ରଥମେ ମହିଳା ଓ ତାଙ୍କ ଶିଶୁକୁ ଧକ୍କା ଦେଇଥିଲା। ଏହାପରେ ଏନ୍‌ଏଚ୍-୫୭ ରେ କାମ କରୁଥିବା  ଶ୍ରମିକଙ୍କୁ ଧକ୍କା ଦେଇଥିଲା। ଶ୍ରମିକ ଜଣକ ରାଜସ୍ଥାନର। ଦୁଇ ଆହତଙ୍କୁ ଚିକିତ୍ସା ପାଇଁ ଦରଭଙ୍ଗା ମେଡିକାଲ କଲେଜ୍ ଏବଂ ହସ୍ପିଟାଲ ନିଆଯାଇଛି, ଫଳରେ ଜଣଙ୍କର ମୃତ୍ୟୁ ହୋଇଛି। ଏହି ଦୁର୍ଘଟଣାରେ ତିନିଜଣଙ୍କର ମୃତ୍ୟୁ ହୋଇଛି। ଯେଉଁଥିରେ ୨୭ ବର୍ଷୀୟ ଗୁରିୟା ଦେବୀ ଓ ତାଙ୍କର ୭ ବର୍ଷୀୟ ଝିଅ  ଅଛନ୍ତି। ମୃତ ଶ୍ରମିକ ହେଉଛନ୍ତି ରାଜସ୍ଥାନର ଅଶୋକ ସିଂହ। 

ଦୁର୍ଘଟଣାର ତୁରନ୍ତ ପରେ ଶତାଧିକ ଲୋକ ଡିଏମ୍‌ଙ୍କ କାରକୁ ଭାଙ୍ଗି ଦେଇଥିଲେ ଓ ଏନ୍‌ଏଚ୍‌ ୫୭କୁ ଜାମ୍ କରିଦେଇଥିଲେ। ପ୍ରଦର୍ଶନକାରୀମାନେ ବାହନରେ ଥିବା ଲୋକଙ୍କୁ ଗିରଫ ଦାବି କରିଛନ୍ତି ଓ ପୀଡିତଙ୍କୁ କ୍ଷତପୂରଣ ଦେବାର ଦାବି କରିଛନ୍ତି। ସେଭଳି ଏହି ମାମଲାରେ ଜିଲ୍ଲା ଲୋକ ସମ୍ପର୍କ ଅଧିକାରୀ କହିଛନ୍ତି, ଘଟଣା ସମୟରେ ଗାଡିରେ ଜିଲ୍ଲାପାଳ ନଥିଲେ। ଗାଡିରେ ଯାନ୍ତ୍ରିକ ସମସ୍ୟା ଥିଲା, ତିଆରି ହେବାକୁ ଯାଉଥିଲା। କିନ୍ତୁ ଯିବା ବେଳେ ଦୁର୍ଘଟଣାଗ୍ରସ୍ତ ହୋଇଛି। ତେବେ ଏନେଇ ଡିଏମ୍ ବିଜୟ ପ୍ରକାଶ ମିଣାଙ୍କ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ।