ନୂଆଦିଲ୍ଲୀ,୦୯/୧୧: ଶ୍ରୀଲଙ୍କାରେ ଚୀନ୍ର ବର୍ଦ୍ଧିତ ପ୍ରଭାବ କମ୍ କରିବାକୁ ଆମେରିକା ଓ ଭାରତ ରଣନୀତିରେ ସାମିଲ ହୋଇଛନ୍ତି । ଏହି କ୍ରମରେ ଆମେରିକା ଶ୍ରୀଲଙ୍କାର ରାଜଧାନୀ କଲମ୍ବୋରେ ଭାରତୀୟ ଉଦ୍ୟୋଗୀ ଗୌତମ ଆଦାନିଙ୍କ ନେତୃତ୍ୱାଧୀନ ଆଦାନି ଗ୍ରୁପ୍ ଦ୍ୱାରା ନିର୍ମାଣ ହେଉଥିବା ବନ୍ଦରରେ ୫୫.୩ କୋଟି ଡଲାର ନିବେଶ କରିବାକୁ ନିଷ୍ପତ୍ତି ନେଇଛି । ଉଭୟ ରାଷ୍ଟ୍ର ଦୀପ ଦେଶ ଶ୍ରୀଲଙ୍କାରେ ଚୀନ୍ର ଆଧିପତ୍ୟକୁ କମ୍ କରିବାକୁ ଚାହୁଁଛନ୍ତି । ଉକ୍ତ କ୍ରମରେ ଏ ନିଷ୍ପତ୍ତି ଗୁରୁତ୍ୱ ବହନ କରୁଛି ।
ଚୀନ୍ ଶ୍ରୀଲଙ୍କାକୁ ପ୍ରଚୁର ମାତ୍ରାରେ ଋଣ ପ୍ରଦାନ କରିଛି । ଚାଇନା ଋଣରେ ହିଁ ଏଠାରେ ଅନେକ ବନ୍ଦର ଏବଂ ରାଜପଥ ପ୍ରକଳ୍ପ ପ୍ରସ୍ତୁତ ହୋଇଛି । ଏଭଳି ସ୍ଥିତିରେ ଭାରତ ଏବଂ ଆମେରିକା ଉଭୟ ଶ୍ରୀଲଙ୍କାରେ ନିବେଶ ବଢ଼ାଇ ସେଠାରେ ଡ୍ରାଗନ୍ର ପ୍ରଭାବ କମାଇବାକୁ ଚାହାନ୍ତି।
ରିପୋର୍ଟ ଅନୁସାରେ, ୟୁଏସ୍ ଇଣ୍ଟର୍ନ୍ୟାସ୍ନାଲ ଡେଭଲପ୍ମେଣ୍ଟ ଫାଇନାନ୍ସ କର୍ପୋରେଶନ ଶ୍ରୀଲଙ୍କାରେ ଆଦାନିର ଯୌଥ ଉଦ୍ୟୋଗ କଲମ୍ବୋ ୱେଷ୍ଟ ଇଣ୍ଟର୍ନ୍ୟାସ୍ନାଲ ଟର୍ମିନାଲ(ସିଡବ୍ଲ୍ୟୁଆଇଟି)ରେ ୫୫.୩ କୋଟି ଡଲାର ବା ୪,୬୦୦ କୋଟି ଟଙ୍କା ନିବେଶ କରିବାକୁ ଘୋଷଣା କରିଛି । ସୂଚନାଯୋଗ୍ୟ, ସିଡବ୍ଲ୍ୟୁଆଇଟି ଭାରତର ସର୍ବବୃହତ୍ ପୋର୍ଟ ଅପରେଟର ଆଦାନି ପୋର୍ଟସ ଆଣ୍ଡ୍ ଏସ୍ଇଜେଡ୍, ଶ୍ରୀଲଙ୍କାର ପ୍ରମୁଖ ସଂସ୍ଥା ଜନ୍ କିଲ୍ସ ହୋଲ୍ଡିଙ୍ଗ୍ସ ଏବଂ ଶ୍ରୀଲଙ୍କା ବନ୍ଦର କର୍ତ୍ତୃପକ୍ଷଙ୍କ ମଧ୍ୟରେ ଗଠିତ ଏକ କନ୍ସୋର୍ଟିୟମ୍ ।
ତେବେ ଆମେରିକୀୟ ନିବେଶ ଦ୍ୱାରା ଗୌତମ ଆଦାନିଙ୍କ କମ୍ପାନିଗୁଡ଼ିକୁ ଶକ୍ତି ମିଳିବ, ଯେଉଁମାନେ ହିଣ୍ଡେନ୍ବର୍ଗ ରିପୋର୍ଟ ଯୋଗୁ ପ୍ରଭାବିତ ହୋଇଥିଲେ । ସୂଚନାଯୋଗ୍ୟ, ଡିଏଫ୍ସି ଆମେରିକା ସରକାରଙ୍କ ଏକ ଡେଭଲପ୍ମେଣ୍ଟ ଫାଇନାନ୍ସ କର୍ପୋରେଶନ୍ । ଏହା ଘରୋଇ କମ୍ପାନିଗୁଡ଼ିକ ସହ ଏକତ୍ର ହୋଇ ବିକାଶମୁଖୀ ରାଷ୍ଟ୍ରଗୁଡ଼ିକ ସମ୍ମୁଖୀନ ହେଉଥିବା ବିଭିନ୍ନ ଆହ୍ୱାନଗୁଡ଼ିକୁ ଦୂର କରିବା ନିମନ୍ତେ ଋଣ ପ୍ରଦାନ କରିଥାଏ । ଏହା ଶକ୍ତି, ସ୍ୱାସ୍ଥ୍ୟସେବା, ଭିତ୍ତିଭୂମି, କୃଷି ଏବଂ କ୍ଷୁଦ୍ର ବ୍ୟବସାୟ ଓ ଆର୍ଥିକ ସେବା କ୍ଷେତ୍ରଗୁଡ଼ିକରେ ନିବେଶ କରିଥାଏ ।
ପ୍ରଥମ ଥର ପାଇଁ ଆମେରିକା ସରକାର ଏହାର ଏଜେନ୍ସି ଜରିଆରେ ଏକ ଆଦାନି ପ୍ରକଳ୍ପରେ ନିବେଶ କରୁଛନ୍ତି । ଆଦାନି ଗ୍ରୁପ୍ କଲମ୍ବୋ ବନ୍ଦରରେ ଏକ ବିଶ୍ୱସ୍ତରୀୟ କଣ୍ଟେନର ଫ୍ୟାସିଲିଟି ନିର୍ମାଣ କରୁଥିବାବେଳେ ଏହାର ସାମର୍ଥ ଉପରେ ଆମେରିକା ଭରସା ଦେଖାଇଛି ।
ଏ ପରିପ୍ରେକ୍ଷୀରେ ଆଦାନି ପୋର୍ଟସ ଆଣ୍ଡ୍ ସ୍ପେସିଆଲ ଇକୋନୋମିକ୍ ଜୋନ୍ର ପୂର୍ଣ୍ଣକାଳୀନ ନିର୍ଦ୍ଦେଶକ ତଥା ସିଇଓ କରନ ଆଦାନି କହିଛନ୍ତି ଯେ, ଆଦାନି ପ୍ରକଳ୍ପରେ ୟୁଏସ୍ ଇଣ୍ଟର୍ନ୍ୟାସ୍ନାଲ ଡେଭଲପ୍ମେଣ୍ଟ ଫାଇନାନ୍ସ କର୍ପୋରେଶନ୍ର ସହଯୋଗକୁ ଆମେ ସ୍ୱାଗତ କରୁଛି । ବିଶ୍ୱର ଅନ୍ୟତମ ବୃହତ୍ ବନ୍ଦର ଡେଭଲପର ଏବଂ ଅପରେଟର ଭାବେ ଏପିଏସ୍ଇଜେଡ୍ କଲମ୍ବୋ ପ୍ରକଳ୍ପରେ ଏହାର ବିଶ୍ୱସ୍ତରୀୟ ନିପୁଣତା ସହ ଭିତ୍ତିଭୂମି ନିର୍ମାଣରେ ଥିବା ଏହାର ବିଶାଳ ଅଭିଜ୍ଞତାକୁ ଲଗାଇଛି । କଲମ୍ବୋ ୱେଷ୍ଟ ଇଣ୍ଟର୍ନ୍ୟାସ୍ନାଲ ଟର୍ମିନାଲ ପ୍ରକଳ୍ପ ସମ୍ପୂର୍ଣ୍ଣ ହେବା ପରେ ଏହା କେବଳ କଲମ୍ବୋ ନୁହେଁ ସମଗ୍ର ଦୀପରେ ସାମାଜିକ ଅର୍ଥନୈତିକ ଦୃଶ୍ୟପଟରେ ବୈପ୍ଳବିକ ପରିବର୍ତ୍ତନ ଆଣିବ । ହଜାର ହଜାର ନିଯୁକ୍ତି ସହ ଶ୍ରୀଲଙ୍କାର ବାଣିଜ୍ୟିକ ଇକୋସିଷ୍ଟମ୍ ତ୍ୱରାନ୍ୱିତ ହେବ ।
