ବ୍ରହ୍ମପୁର,୧୦/୧୧: ବ୍ରହ୍ମପୁର ମହାନଗର ନିଗମ(ବିଏମ୍ସି) ଓ ଜିଲ୍ଲା ସ୍ୱାସ୍ଥ୍ୟ ବିଭାଗ ମିଳିତ ଉଦ୍ୟମରେ ଆରମ୍ଭ ହୋଇଥିବା ବସ୍ତି ବାସିନ୍ଦାଙ୍କ ସ୍ୱାସ୍ଥ୍ୟ ପରୀକ୍ଷା ‘ଆରୋଗ୍ୟମ୍’ର ଚୂଡ଼ାନ୍ତ ରିପୋର୍ଟ ପ୍ରକାଶ ପାଇଛି । ଏଥିରେ ୫୪ ହଜାର ୭୮୨ ବସ୍ତିବାସିନ୍ଦାଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଥିବା ବେଳେ ୪୪ ପ୍ରତିଶତ ଅର୍ଥାତ ୧୯୩୧୨ ଜଣଙ୍କ ଠାରେ ଅତ୍ୟଧିକ ମୋଟାପଣ ସମସ୍ୟା ଦେଖାଦେଇଛି । ପ୍ରତି ଦୁଇ ଜଣଙ୍କ ମଧ୍ୟରୁ ଜଣଙ୍କ ଠାରେ ଏହି ସମସ୍ୟା ଦେଖିବାକୁ ମିଳିଛି । ଏହା ଏକ ଗମ୍ଭୀର ସମସ୍ୟା ହୋଇନଥିଲେ ମଧ୍ୟ ଆଗକୁ ଏହା ଅନ୍ୟ ଜଟିଳ ରୋଗସୃଷ୍ଟିର କାରଣ ହୋଇପାରେ ବୋଲି ଏଡିୟୁପିଏଚ୍ଓ ଡା ମନୋଜ କୁମାର ପଣ୍ଡା କହିଛନ୍ତି ।
୪୨ ୱାର୍ଡ ବିଶିଷ୍ଟ ବିଏମ୍ସିରେ ୧୭୨ ପଞ୍ଜିକୃତ ବସ୍ତି ରହିଛି । ବସ୍ତିବାସିନ୍ଦାଙ୍କ ସ୍ୱାସ୍ଥ୍ୟ ପରୀକ୍ଷା ପାଇଁ ନଭେମ୍ବର ୨୦୨୨ରେ ଆରୋଗ୍ୟମ ଆରମ୍ଭ କରାଯାଇଥିଲା । ୩୧ ଅଗଷ୍ଟରେ ସ୍ୱାସ୍ଥ୍ୟ ପରୀକ୍ଷା ଶେଷ ହୋଇଥିଲା । ବସ୍ତିରେ ରହୁଥିବା ଆର୍ଥିକ ପଛୁଆ ବର୍ଗଙ୍କ ଠାରେ ମୋଟାପଣ ଭଳି ସମସ୍ୟା ଅଧିକ ମାତ୍ରାରେ ଦେଖିବାକୁ ମିଳିଛି । ଅନିୟମିତ ଖାଦ୍ୟ ଓ ଜଙ୍କ ଫୁଡ୍ ମୋଟାପଣ ବୃଦ୍ଧିର କାରଣ ହୋଇପାରେ ବୋଲି ଡା ପଣ୍ଡା କହିଛନ୍ତି । ତେବେ ଏହି ସମସ୍ୟା ସାମ୍ନାକୁ ଆସିବା ପରେ ଅଣସଂକ୍ରାମକ ରୋଗ ଶିବିର କରାଯାଇପରୀକ୍ଷଣ, ଔଷଧ ବିତରଣ ଓ ଖାଦ୍ୟରେ ପରିବର୍ତ୍ତନ ପାଇଁ ପରାମର୍ଶ ଦିଆଯାଇଛି । ଆହୁରି ମଧ୍ୟ ଯୋଗ କ୍ଲାସ୍ କରାଯାଇ ମୋଟାପଣ ହ୍ରାସ ଦିଗରେ ପଦକ୍ଷେପ ଗ୍ରହଣ କରାଯାଇଛି ବୋଲି ସେ କହିଛନ୍ତି । ମୋଟାପଣ ଏକ ଗୁରୁତର ସମସ୍ୟା ହୋଇନଥିଲେ ମଧ୍ୟ ପରବର୍ତ୍ତୀ ସମୟରେ ଏହା ହୃଦରୋଗ ଓ ଯକୃତ ସମସ୍ୟା ସୃଷ୍ଟିର କାରଣ ହୋଇପାରେ ବୋଲି ଡା ପଣ୍ଡା କହିଛନ୍ତି ।
ଗତ ବର୍ଷ ନଭେମ୍ବରରୁ ଆରମ୍ଭ ହୋଇଥିବା ଏହି ସମୂହ ସ୍ୱାସ୍ଥ୍ୟ ଯାଞ୍ଚରେ ବସ୍ତି ଅଞ୍ଚଳର ୫୪୭୮୨ ଜଣଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଛି । ଯେଉଁଥିରେ ୩୨୫୫୭ ମହିଳା ଏବଂ ୨୨୨୨୫ ପୁରୁଷଙ୍କ ସ୍ୱାସ୍ଥ୍ୟ ପରୀକ୍ଷା ହୋଇଥିଲା । ସ୍ୱାସ୍ଥ୍ୟ ଯାଞ୍ଚରୁ ସଂଗୃହିତ ରିପୋର୍ଟ ଅନୁସାରେ, ସର୍ବାଧିକ ୧୯୩୧୨ ଜଣଙ୍କ ଠାରେ ଅତ୍ୟଧିକ ମୋଟାପଣ, ୧୪୫୯୪ ଜଣଙ୍କ ନିକଟରେ ରକ୍ତହୀନତା, ୬୦୪୦ ଲୋକଙ୍କ ଠାରେ ଉଚ୍ଚ ରକ୍ତଚାପ ଏବଂ ୨୦୬୩ ଜଣଙ୍କ ଶରୀରରେ ମଧୁମେହ ରହିଥିବା ରିପୋର୍ଟରୁ ଜଣାପଡ଼ିଛି । ସ୍ୱାସ୍ଥ୍ୟ ଯାଞ୍ଚ ହୋଇଥିବା ମୋଟ ଲୋକଙ୍କ ମଧ୍ୟରୁ ୪୪ ପ୍ରତିଶତ ମେଦବହୁଳତା, ୩୩ ପ୍ରତିଶତ ରକ୍ତହୀନତା, ୧୪ ପ୍ରତିଶତ ଉଚ୍ଚ ରକ୍ତଚାପ, ୫ ପ୍ରତିଶତ ମଧୁମେହ, ୩ ପ୍ରତିଶତ ଉଭୟ ମେଦବହୁଳତା ଓ ଉଚ୍ଚ ରକ୍ତଚାପ ଏବଂ ୨ ପ୍ରତିଶତ ଉଚ୍ଚ ରକ୍ତଚାପ ଓ ମଧୁମେହର ଶୀକାର ଥିବା ସ୍ୱାସ୍ଥ୍ୟ ବିଭାଗ ରିପୋର୍ଟରୁ ଜଣାପଡ଼ିଛି ।
ପ୍ରକାଶାଯୋଗ୍ୟ, ଆରୋଗ୍ୟମ୍ ପ୍ରକଳ୍ପ ପାଇଁ ୮୫.୯୪ ଲକ୍ଷ ଟଙ୍କା ବ୍ୟୟ ହୋଇଛି । ‘ଡିଜିଟାଲ୍ ଡାଇଗ୍ନୋଷ୍ଟିକ୍ ଡିଭାଇସ୍ ୱିଥ୍ ମୋବାଇଲ୍ ଆପ୍ଲିକେସନ୍’ ସହାୟତାରେ ସ୍ୱାସ୍ଥ୍ୟ ପରୀକ୍ଷା କରାଯାଇଛି । ସ୍ୱାସ୍ଥ୍ୟ ବିଭାଗ ଏହାର ପରିଚାଳନା ପାଇଁ ୧୯ଟି ଟିମ୍ ଗଠନ କରିଥିଲା । ଏହି ଟିମ୍ ବସ୍ତି ଅଞ୍ଚଳରେ ଘରକୁ ଘର ଯାଇ ନମୂନା ସଂଗ୍ରହ କରିଥିଲେ । ରୋଗ ନିରୂପଣ ସହ ସମ୍ପୃକ୍ତ ବ୍ୟକ୍ତିର ଏକ ଡିଜିଟାଲ୍ ହେଲଥ୍ ପ୍ରୋଫାଇଲ୍ ପ୍ରସ୍ତୁତ ହୋଇପାରିବ । ଆଗାମୀ ଦିନରେ ଉକ୍ତ ପ୍ରୋଫାଇଲ୍କୁ ନେଇ ସ୍ୱତନ୍ତ୍ର ଡାଟାବେସ୍ ପ୍ରସ୍ତୁତ କରି ଆଇଡି ତିଆରି କରାଯିବ । ଏହି ଆଇଡି ଅନୁସାରେ ରିକିତ୍ସା ଏବଂ ଅନ୍ୟାନ୍ୟ ପ୍ରତିଶେଧକ ବ୍ୟବସ୍ଥା କରାଯିବ ବୋଲି ସ୍ୱାସ୍ଥ୍ୟ ବିଭାଗର ସୂଚନା । ତେବେ ଏଭଳି ଏକ ଭିନ୍ନ ପଦକ୍ଷେପ ପାଇଁ ଆରୋଗ୍ୟମ୍ ଆଇଏସ୍ଓ ପ୍ରମାଣପତ୍ର ସହ ସ୍କଚ୍ ଆୱାର୍ଡ ପ୍ରାପ୍ତ କରିଛି ।
